Muna ngonde a Desemba, wantu ayingi mu nza betalanga mafoto yovo fwaniswa ya Yesu nze nsedia. Osiwanga vana fulu kidilanga e bulu. Nga tufwete sungamenanga Yesu nze nsedia?— * Yambula twabadika e mpil’ambote tufwete kunsungamena. Tulenda longoka diambu diamfunu kwa buka kia avungudi a mameme bakala muna nzanza wakala lukufi ye Beteleme muna fuku wauna.

Kuna kinsalukisa, mbasi mosi wamoneka kwa avungudi. Wabavovesa vo: “O unu kun’evata dia Davidi i nuwutukìlu o Mvuluzi, wa Kristu Mfumu.” O mbasi wakudikila diaka vo besolola Yesu ‘wazingwa nlele, walekeswa muna dikilwa.’ Vana vau, mbasi zayingi zamoneka yo ‘kembelela Nzambi.’

Aweyi wadi mona kele vo owidi ambasi bekembelelanga Nzambi?— Avungudi bamona e kiese. Bavova vo: “Mbula twenda kaka yakuna Beteleme, twamon’owu uvangamene.” I bosi, “basolwele Maria yo Yosefe, ye kimwana-mwana kilekeso muna dikilwa.”

Ke kolo ko, akaka bayenda kuna Beteleme muna kingula Maria yo Yosefe. Vava avungudi babazayisa mana mavangama, awonso basivika kikilu. Nga omwene kiese muna zaya mambu mama mambote?— Yeto awonso tuzolanga Nzambi, kiese tumonanga. Owau, yambula twazaya e kuma luwutuku lwa Yesu lwatwasila kiese kiayingi. Muna baka mvutu za kiuvu kiaki, tufwete teka zaya mana mabwa vitila lukazalu lwa Maria.

Lumbu kimosi, mbasi mosi wayikilwanga vo Ngambiele wakingula Maria. Wasia nsilu vo mwana kewuta Maria ‘Nene kekala, mwan’a Mpungu keyikilwa . . . Okala se Ntinu . . . e Kintinu kiandi ke kikala nsuka ko.’

Maria ozolele zaya una divangamena e diambu diadi wau vo kazaye nitu a yakala ko. Ngabiyele unzayisi vo: ‘O mwand’avelela ukwiza kwa ngeye, o nkum’a Mpungu ukuyitalela. Dianu vo, ndiona owutwa oyikilwa vo wavelela, Mwan’a Nzambi.’ Nzambi wavanga esivi mu fila moyo a Mwan’andi tuka kun’ezulu yamu vumu kia Maria.

Nga wamona kala fwaniswa isonganga “wantu tatu a ngangu” ana bakingula Yesu kumosi ye avungudi?— E fwaniswa yayi itoma monekanga mu kolo kia nkinzi wa lumbu kia luwutuku lwa Yesu. Kansi, e fwaniswa yayi ke ina ngwizani ko ye dina uvovanga o Nkand’a Nzambi. O wantu tatu awaya bavanganga mana Nzambi ketumbanga kadi afimpi a ntetembwa bakala. Yambula twabadika oma mavangama vava balwaka. Nkand’a Nzambi uvovanga vo: “Bezidi kuna nzo, bamwene e kingyana-ngyana yo Maria wa ngwʼandi.” Ozevo, Yesu kakala diaka nsedia ko ona wasiwa muna dikilwa, kansi wakituka se kingyana-ngyana wazinganga kumosi yo Yosefe yo Maria.

Aweyi afimpi a ntetembwa basololwela Yesu?— “Ntetembwa” yabafila, e ntetembwa yayi yabafila ntete kwa Erodi wa Ntinu kuna Yerusaleme ke kuna Beteleme ko. Nkand’a Nzambi uvovanga vo Erodi wavava solola Yesu muna kumvonda. Owau yindula edi. Nani wavaikisa ntetembwa ina yafila afimpi a ntetembwa kwa Erodi?— Ke Yave wa Nzambi aludi ko, kansi Satana wa Nkadi Ampemba wa mbeni andi.

O unu, Satana ofilanga wantu mu badikila Yesu nze nsedia. Kansi, Ngambiele wa mbasi wavovesa Maria mu kuma kia Yesu vo: ‘Okala se Ntinu . . . e Kintinu kiandi ke kikala nsuka ko.’ Owau, Yesu oyalanga kuna zulu nze Ntinu, ke kolo ko ofwasa mbeni zawonso za Nzambi. I una tufwete sungamenanga Yesu ye tufwete samunanga e ludi kiaki kw’akaka.