Nga okwikilanga muna nsilu a Nkand’a Nzambi wa lufuluku e? * E vuvu kia wanana diaka ye azolw’eto afwa kiakiese kikilu. Nga wantu besinga fulwa kikilu e? Muna zaya e mvutu za kiuvu kiaki, diambote twabadika e nona kia antumwa za Yesu Kristu.

Antumwa bakwikilanga muna lufuluku lwa mafwa. Ekuma? Diantete, bamona Yesu ona wafwa yo fuluka. Vava kafuluka, Yesu wamoneka kwa antumwa, wamoneka mpe kwa “nkama tanu” za wana-ngudi nkumbu mosi. (1 Korinto 15:6) Vana ntandu, wantu bakwikila muna lusansu lwa lufuluku lwa Yesu lwasonekwa, nze una usonganga nsangu zambote zina antumwa basoneka.—Matai 27:62–28:20; Maku 16:1-8; Luka 24:1-53; Yoane 20:1–21:25.

Diazole, antumwa nkumbu tatu bamona Yesu vava kafula wantu. Entete kuna Naini, Kafanau ye kuna Betania. (Luka 7:11-17; 8:49-56; Yoane 11:1-44) O lufuluku lwansuka lwa nkundi a Yesu, i lwau tuvovela mu longi diadi. Yambula twabadika dina diavangama.

‘O mpangi aku fuluka kefuluka.’ Yesu wavovesa mvovo miami kwa Mareta wau vo mpangi andi Lazaro wafwa kakala se vioka lumbu yá. Mareta kabakula e nsas’a mvovo mia Yesu ko vana vau. Mareta wavutula vo, “Nzeye wo vo ofuluka,” kansi wayindulanga vo e diambu diadi kuna sentu kaka diadi vangamena. Yindula una Mareta kamona vava Yesu kavova vo “mono i lufuluku yo moyo,” yo fula mpangi andi muna lufwa.—Yoane 11:23-25.

Akweyi kayenda o Lazaro muna lumbu yá kakala wafwa? Vava Lazaro kafuluka, kavova kana diambu dimosi ko mu kuma kia fulu kayenda vava kafwa. Kadi, Lazaro kakala yo moyo ulembi fwanga ko wayenda kun’ezulu. Vava kafula Lazaro, Yesu kankatula kuna zulu ko yo kumvutula va ntoto kimana kalembi mona diaka e kiese kia zulu vana ndambu a Nzambi. O Lazaro akweyi kakala muna lumbu yá kafwa? Lazaro waleka kakala muna ziami.—Kimpovi 9:5, 10.

Sungamena vo Yesu watezanesa lufwa yo muntu olele ona osikameswa muna lufuluku. Nkand’a Nzambi uvovanga vo: ‘Ubavovese vo,  o nkundi eto Lazaro owondokele yo tulu; kansi nkwenda yansikamesa.’ I bosi, alongoki bavovese Yesu vo: “E Mfumu wau kawondokele yo tulu, vuluka kevuluka.” Yesu lufwa lwa Lazaro kavovelanga, kansi, alongoki babanzanga vo Lazaro tulu kalekanga. I bosi, Yesu wabavovesa vo: ‘Lazaro ofwidi.’ (Yoane 11:11-14) Yesu wafula Lazaro muna vutulwisa moyo andi yo kala diaka entwadi ye yitu yandi. Ekwe kiese yitu ya Lazaro bamona!

O lufuluku kavanga o Yesu ova ntoto luna se kini kia mana kesinga vanga kuna sentu vava keyala se Ntinu a Kintinu kia Nzambi. * Vava ke yala se Ntinu ova ntoto, Yesu ovutulwisa o moyo kwa wantu bena muna ziami, i sia vo muna nyindu a Nzambi. E kiaki i kuma Yesu kavovela vo: “Mono i lufuluku.” Yindula e kiese omona vava owanana diaka ye azolw’aku ana bafwa. Ekwe e kiese bemona awana befuluka!—Luke 8:56.

Yesu wavovesa Mareta vo: ‘On’okwikilang’omu mono, kana nkutu ofwidi, ozinga diaka. Konso ona mpe win’o moyo, okwikilang’omu mono, kefwa nkutu ko yakwele mvu.’ (Yoane 11:25, 26) Awana kefula o Yesu muna funda dia mvu dia luyalu lwandi, bezinga yakwele mvu avo basongele kwikizi muna yandi.

Vitila kafula Lazaro, Yesu wayuvula Mareta vo: ‘Ng’okwikila wo e?’ Mareta wamvutula vo: “Ingeta, e Mfumu; nkwikidi wo vo nge i Kristu, wa Mwan’a Nzambi.” (Yoane 11:26, 27) Nga ozolele kala yo lukwikilu nze luna Mareta kakala lwau e? E ntete, ofwete zaya ekani dia Nzambi mu kuma kia wantu. (Yoane 17:3; 1 Timoteo 2:4) O zayi wau ulenda kumika lukwikilu lwau. Ekuma olembi lombela kwa Mbangi za Yave basonga dina Nkand’a Nzambi ulonganga mu kuma kia diambu diadi? Oyau, bekala ye kiese kia mokena yaku mu kuma kia vuvu kia lufuluku.