NTU A DIAMBU WA FUKWA
Ekuma Ofwete Sambila?
Nanga olenda kukiyuvula, ‘avo Nzambi ozeye mawonso, ekuma mfwete sambila diaka?’ E kiuvu kiaki kiamfunu. Kadi Yesu wavova vo Nzambi ‘ozeye mana tuvwidi o mfunu una ke twanlombele ko.’ (Matai 6:8) Davidi wa Ntinu a Isaele yankulu wabakula e diambu diadi vava kavova vo: “Kadi ke vena diambu va lubini luame ko, onge, e Yave, ozeye dio kala.” (Nkunga 139:4) Ozevo, ekuma tufwete sambila diaka kwa Nzambi? Muna baka e mvutu za kiuvu kiaki, yambula twabadika dina Diambu dia Nzambi divovanga mu kuma kia sambu y’asambidi a Nzambi. *
“Nufinama Nzambi, oyandi mpe okunufinama.”—Yakobo 4:8
E SAMBU KIKUTUFINAMESANGA YO NZAMBI
Kana una vo Nkand’a Nzambi uvovanga vo Yave * wa Nzambi ozeye mawonso, usonganga mpe vo yandi kazolele kaka zaya ko mana mebwanga muna zingu ki’asambidi andi. (Nkunga 139:6; Roma 11:33) O nyindu andi alunga ke una nze komputadore ko ilundanga kaka mambu. Kieleka, Nzambi ovwanga ngindu zeto mfunu kadi ozolele vo twamfinama. (Nkunga 139:23, 24; Yakobo 4:8) I dianu Yesu kakasakesela alandi andi basambanga kanele vo S’au ozeye mana bavwidi mfunu. (Matai 6:6-8) Vava tuzayisanga ngindu zeto kwa Mvangi eto, ediadi dikutufinamesanga yo yandi.
Ezak’e ntangwa, dilenda kala diampasi mu zaya dina tufwete lomba muna sambu. Kansi, Nzambi olenda zaya mana tulembele vova yo sadila zayi wandi walunga muna lungisa e nsatu zeto. (Roma 8:26, 27; Efeso 3:20) Tufinamanga Nzambi vava tubakulanga vo okutusadisanga kana nkutu mu mambu makete.
‘NGA NZAMBI OVANANGA MVUTU ZA SAMBU YAWONSO?’
Nkand’a Nzambi uvovanga vo Nzambi a Mpungu-ngolo owanga e sambu ya selo yandi yakwikizi, kansi usonganga mpe e kuma kalembi wilanga sambu ya wantu akaka. Muna bonga e nona, vava mavangu mansoki mawokela kuna Isaele yankulu, Nzambi watuma Yesaya wa ngunza mu zayisa nkangu vo: ‘Kana una vo nusamba nsamba zayingi, kiwá kwame ko.’ (Yesaya 1:15) Dialudi, Nzambi ke wanga nsambu y’awana bevezanga nsiku miandi ko ngatu ana besambanga y’ekani diambi.—Ngana 28:9; Yakobo 4:3.
Kuna diak’e sambu, Nkand’a Nzambi uvovanga vo: ‘Konso dina tulomba mun’owu wa luzolo luandi, wá kekutuwá.’ (1 Yoane 5:14) Nga diadi disongele vo Nzambi ovananga mvutu za konso ndomba z’asambidi andi vana vau? Ve. Badika nona kia Paulu wa ntumwa, nkumbu tatu kadodokela Nzambi kimana kankatula “lusende muna nitu.” (2 Korinto 12:7, 8) Nanga Paulu kimbevo kia meso kilembi sasukanga kakala kiau. E kimbevo kiaki kiankendelekanga kikilu. Paulu wavewa lukau lwa wuka ye fulumuna nkutu wantu, kansi diavavanga vo kazizidila kimbevo kia yandi kibeni. (Mavangu 19:11, 12; 20:9, 10) Kana una vo e mvutu katambula ke zau ko kavingilanga, Paulu watambulwila mvutu za Nzambi.—2 Korinto 12:9, 10.
‘E kiaki i vuvu tuna kiau oku kwa yandi, ovo, konso dina tulomba mun’owu wa luzolo luandi, wa kekutuwá.’—1 Yoane 5:14
Dialudi vo wantu akaka beyikwanga muna Nkand’a Nzambi batambula mvutu za sambu yau mu mpil’esivi. (2 Ntinu 20:1-7) Kansi, ediadi ke nkumbu miayingi ko diavangamanga. Minkwikizi miakaka bakendalala vava bamona vo Nzambi kavana mvutu za sambu yau ko. Davidi wa Ntinu wayuvula vo: ‘Nkia kolo okumpilakana, e Yave?’ (Nkunga 13:1) Kansi, vava Davidi wa nkwa kwikizi kabakula vo nkumbu miayingi Yave kateka kumvuluza, ediadi diakumika vuvu kiandi muna Nzambi. Davidi wakudikila diaka vo: “Muna walakazi waku mbundidi e vuvu.” (Nkunga 13:5) Nze Davidi, asambidi a Nzambi o unu bafwete zindalala muna sambu yavana bebakula mvutu za Nzambi muna ndomba zau.—Roma 12:12.
AWEYI NZAMBI KEVANINANGA E MVUTU?
Nzambi ovananga e mvutu muna mambu tuvwidi mfunu.
Mase ma nzolwa ke ntangwa zawonso ko bevananga lekwa kwa wan’au vava belombanga yo. Diau adimosi mpe, ezak’e ntangwa Nzambi ke lungisanga ndomba zeto ko nze una tulombelanga zo yovo muna ntangwa ina tuzolele. Kansi, tulenda kala ye vuvu vo Mvangi eto nze se dia nzolwa, olungisa nsatu zeto muna ntangwa ifwene ye muna mpil’ambote.—Luka 11:11-13.
Nzambi olenda vana mvutu mu mpila ke tubakwidi ko.
Adieyi tuvova avo vena ye diambu diampasi tunwananga diau? Avo Nzambi kavene mvutu muna mpil’esivi ko nga disongele vo Yave kawidi sambu kieto ko? Ke wau ko. Vana fulu kiakala ye ngindu zazi, tufwete vava zaya kana vo Nzambi okutuyikamanga mu mpila ina ke tubakulanga ko. Muna bonga e nona, dilenda kala vo nkundi mosi anzolwa ovangidi mawonso muna kutusadisa muna ntangwa ifwene. (Ngana 17:17) Dilenda kala vo Yave ofididi nkundi ndioyo muna kutusadisa. Vana ntandu, Nzambi olenda sadila Nkand’a Nzambi muna vana mvutu za sambu yeto. Muna Nkand’andi, tulenda solola umbakuzi tuvwidi mfunu muna zizidila diambu diampasi ditubwididi.—2 Timoteo 3:16, 17.
Vana fulu kia vengomona mpasi, Nzambi nkumbu miayingi ovananga nkuma kwa nkangu andi muna zizidila zo. (2 Korinto 4:7) Muna bonga e nona, Yesu vava katontwa, wau vo kazola ko vo nkumbu a Nzambi yayiviswa, wadodokela S’andi kimana kavengomona ntonta zazi, Yave watwika mbasi muna kumika Mwan’andi. (Luka 22:42, 43) Diau adimosi mpe, Nzambi olenda sadila nkundi anzolwa muna kutukasakesa vava tukalanga mu mpasi. (Ngana 12:25) Wau vo dilenda kala diampasi mu bakula e mvutu zazi, tufwete sia sungididi mu mpila ina Nzambi kevaninanga mvutu za sambu yeto.
Nzambi ovananga mvutu za sambu yeto muna ntangwa kasikidisa.
Nkand’a Nzambi uyikanga vo Nzambi wa Mpungu-ngolo osonganga dienga diandi kw’alembami muna ‘ntangw’afwana.’ (1 Petelo 5:6) Ozevo, avo tumwene vo Nzambi ozingilanga muna vana mvutu za ndomba zeto, ka tufwete yindula ko vo Yave katuvwidi mfunu ko. Kansi, muna ngangu zandi zisundidi, Mvangi eto anzolwa ofimpanga ndomba zeto kadi ozeye edi diambote mu kuma kieto.
“Nusakalel’o koko kwankuma kwa Nzambi, kanukundidika muna kolo kifwene.”—1 Petelo 5:6
Muna bonga e nona, yindula vo mwan’aku akete ulombele vo wansumbila mvelo yovo nkomba. Nga vana vau okunsumbila wo? Avo mwene vo kena ye ntela ya nata mvelo ko, olenda baka nzengo zalembi wo kunsumbila. Kuna kulanda, olenda kumvana kina kalombele avo mwene vo nluta kikuntwasila. Diau adimosi mpe, Nzambi olenda lungisa ‘zolela yeto ya ntima’ muna ntangw’afwana avo tuzindalele muna sambu.—Nkunga 37:4.
KALA YE VUVU VO YAVE OWANGA E SAMBU
Nkand’a Nzambi uwondelelanga Akristu akieleka vo ke bavidisi vuvu kiau ko muna sambu. Kansi, akaka balenda vova vo, ‘ediadi diasazu mu vova kansi diampasi mu vanga.’ Avo tunwananga ye mpasi se tuka kolo, dilenda kala diampasi mu vingila mvutu za sambu yeto. Kansi, tufwete sungamena luludiku lwa Yesu lwakwamanana muna sambu.
Yesu watá kingana kia nkento mosi w’ansona wakwamanana lomba kwa mfundisi ambi kimana kansadisa muna mfundu kakala wau. (Luka 18:1-3) Kana una vo kuna lubantiku o mfundisi kazola kunsadisa ko, kansi wavova vo: ‘Ikunlandila kunda, kiatokaneswanga kaka muna ndomb’andi.’ (Luka 18:4, 5) Mun’owu wa sono kiaki, muna nding’a Kingerekia, o mfundisi walungisa ndomb’a nkento ndioyo kimana kayambula “kuntokanesa” yovo “yivisa nkumbu andi.” * Avo mfundisi ambi wasadisa nkento ansona kimana nkumbu andi yalembi yiviswa, o Nzambi nkia nduta keluta landila kunda kw’awana “bekumbokelanga fuku yo mwini?” Yesu wavova vo: “Okubalandila-landila kunda.”—Luka 18:6-8.
“Nulomba, ozevo nuvewa.”—Luka 11:9
Tulenda yoya muna lomba lusadisu ntangwa zawonso, kansi diambote twakwamanana songa luzindalalu. Avo tuzindalele muna sambu, tusonga vo lusadisu lwa Nzambi tuvwidi mfunu muna zingu kieto. Tubakula mpe mvutu za Nzambi mu ndomba zeto yo kutusadisa muna kumfinama. Tulenda mpe kala ye vuvu vo Yave ovana mvutu za sambu yeto avo tukwamanene lomba kuna lukwikilu.—Luka 11:9.
^ tini. 3 Avo tuzolele vo Nzambi kawá sambu yeto, tufwete sia ngolo muna lemvokela nkanikinu miandi. Avo tuvangidi wo, tulenda mona nkum’a sambu nze una usonganga elongi diadi. Muna zaya diaka mambu makaka, tala kapu kia 17 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave yovo bandula wo muna internete muna www.pr418.com/kwy.
^ tini. 5 Yave, i nkumbu a Nzambi nze una yasengomonwa muna Nkand’a Nzambi.
^ tini. 22 Kuna nz’ankulu, Nzambi wavavanga vo afundisi kuna Isaele basonga ngemba kw’akento ansona ye minkondwa-mase.—Nsiku 1:16, 17; 24:17; Nkunga 68:5.
Nanga Oyangalela Mpe Malongi Mama
MVUTU ZA YUVU YA BIBILA
Nga Nzambi Owá Sambu Yame?
O Nzambi muna wá e sambu kiaku kifwete kala ngwizani yo luzolo lwandi.
MVUTU ZA YUVU YA BIBILA
Nki Mfwete Lomba Muna Sambu?
Zaya e kuma ke dinina diambi ko mu yika mana mekututokanesanga kwa Nzambi muna sambu.
ESSENTIAL BIBLE TEACHINGS
Nga Nzambi Owanga e Sambu Yawonso?
Adieyi tuvova vo sambu ya muntu ya loko? Adieyi tuvova avo yakala obangikanga o nkaz’andi, kansi olombanga mpe nsambu za Nzambi?
