“N DENDA zizidila konso diambu, kansi kilendanga zizidila ntonta ko.” E mvovo miami misonganga vo wantu akaka kuna nsi a ntima tontwa bezolanga. Kansi, akaka bebadikilanga ntonta nze mbeni ona fwete sundwa. Adieyi obenze? Avo wanane ye ntonta, nga o bwa yovo fwete zo sunda?

Dialudi vo ke ntonta zawonso ko zitwasanga e mpasi. Muna bonga e nona, avo odidi yo yukuta kansi oveve diaka dia lekwa kiakaka nanga ke dikutwasila vonza ko. Kansi, okuyivana muna mavangu mambi musungula mana mesikamesanga luzolo lwa tá zumba, dilenda twasa vonza. E Bibila kikutuwondelelanga vo: ‘On’ota zumba yo nkento i munkondwa-ntima, on’ovanga wo moyo andi kefwasa.’—Ngana 6:32, 33.

Avo owanane ye ntonta za tá zumba, adieyi ofwete vanga? E Bibila kivovanga vo: “I luau lulu o luzolo lua Nzambi, o luvelelo lueno, nwakenga zumba, konso muntu vovo nwina, kazay’o baka kiandi muna luvelelo, yo zitu”. (1 Tesalonika 4:3, 4) Aweyi olenda siamisina luzolo lwalu? Badika mambu tatu malenda kusadisa.

O tala mambu ma nsoni dilenda wokesa luzolo lwa tá zumba. Muna songa e ngwizani ina vana vena tungununa ye lokokela, Yesu walukisa vo: “Konso on’otungununa nkento, kanlengokelw’o moyo, zumba kia nsi a ntima katele yandi.” Wakudikila mpe vo: “E disu diaku dialunene ovo dikuteses’esakuba, dunguna dio, waveta dio.” (Matai 5:28, 29) Adieyi Yesu kazola vova?  Muna zizidila ntonta, tufwete baka nzengo zalembi tala mavangu masafu.

Muna bong’e nona: Avo ntemo wa lampada uminikinu muna meso kuna kinsalukisa, nga okwamanana wo tala? Nkatu. Nanga o vengesa meso maku muna tanina mo. Diau adimosi mpe, avo lembi wo kana omwene mavangu ma zumba muna nkanda, komputadore yovo televizau, vengesa meso maku vana vau. Lunga-lunga ngindu zaku kimana zalembi yiva. Juan, ona wakala ye fu kia tala mavangu ma zumba wavova vo: “Vava imonanga nkento ambote-mbote, nkumbu miayingi ikalanga yo luzolo lwakwamanana kuntungununa. Kansi, isianga e ngolo za vengomona meso mame yo kukivovesa vo: ‘Samba kwa Yave! Ofwete samba owau!’ Vava isambanga, luzolo lwalu lukulukanga.”—Matai 6:9, 13; 1 Korinto 10:13.

Badika nona kia Yobi wa nkwa kwikizi ona wavova vo: “Nkangidi ekangu yo meso mame; ozevo aweyi ntadila ndumba?” (Yobi 31:1) Ekuma olembi bakila nzengo za mpila yayi?

Sadila elongi edi: Avo mwene foto dina ye mambu ma nsoni, vengesa meso maku muna nzaki zawonso. Tanginina nsoneki a Bibila ona wasamba vo: “Vengomona meso mame muna tala mambu makondwa mfunu.” —Nkunga 119:37.

Wau vo tu wantu alembi lunga, ezak’e ntangwa tunwananga ye zolela yambi. Bibila kivovanga vo: “Konso muntu vana ken’ovukumunwa, ovo otwalakeso kwa diandi’keto, yo nekenwa. I bosi, eketo, ovo diyimiti, diwutidi esumu.” (Yakobo 1:14, 15) Aweyi olenda vengela ntambu wau?

Vava owanananga ye ntonta, sungamena dio vo ngeye kibeni ofwete sola dina ovanga. Nwana muna sunda zolela yayi yambi. Katula mambu mama mambi muna ngindu zaku. Yambula yindula mambu ma nsoni. Troy, ona wakala ye fu kia tala mavangu ma zumba muna internete  wavova vo: “Yasia ngolo muna katula mambu mama muna ngindu zame yo yindula oma mambote. Diampasi diakala kadi nkumbu miayingi yavutukilanga tala mavangu ma zumba. Kansi, yasunda e fu kiaki.” Elsa, ona wanwananga ye ntonta za tá zumba vava kakala nleke osungamenanga vo: “Muna kuyivana muna salu kia Yave yo sambanga, yalenda venga ngindu zambi.”

Sadila elongi edi: Avo diambu diambi oyindwidi, vana vau samba! Sunda ngindu zambi muna zadisa nyindu aku ye ‘mambu maludi, mazitu, mansongi, mavelela, mabiza, ma nsangu zambote ye konso fu kiambote kia lusanisinu.’—Filipi 4:8.

Avo muntu una kala y’etima dia vanga diambu diambi, diasazu dikalanga mu bwa kele vo owananene ye ntonta. (Ngana 7:6-23) Adieyi tulenda vanga muna lembi bwa?

E Bibila kivovanga vo: “O nlungaladi omwene mbi, oswekamene; atunga, lutakana, badilu o nkanu.” (Ngana 22:3) Ozevo, lunga-lunga ntambi zaku. Teka badika e ntonta olenda wanana zau ye mpila olenda zo sundila. (Ngana 7:25) Yakala dimosi oyikilwanga vo Filipe ona wasunda fu kia tala mambu ma nsoni wavova vo: “Yasia komputadore vana fulu kina wantu awonso balenda yo mwena yo sia mo programa ikakidilanga mambu ma nsoni. Isadilanga kaka internete vava wantu akaka bekalanga mu nzo.” Troy ona oyikilu kala wavova vo: “Yabaka nzengo zalembi tala filme zisonganga mavangu ma zumba yo venga wantu bena ye fu kiavovela mambu ma nsoni. Kizolele kuyisia mu vonza ko.”

Sadila elongi edi: Fimpa lutovoko lwaku, yindula dina ofwete vanga muna venga ntonta olenda wanana zau.—Matai 6:13.

Adieyi tuvova avo ovenge ngolo kansi obwidi muna ntonta? Kuyoyi ko, kwamanana nwana. E Bibila kivovanga vo: “Nsongi, mbwa nsambwadi kebwa yo vumbuka diaka.” (Ngana 24: 16) Dialudi, S’eto ezulu okutukasakesanga kimana ‘twalembi yoya.’ Nga otambulwila lusadisu lwandi lwa nzolwa? Ozevo, kuyambula samba ko. Kumika lukwikilu lwaku muna longokanga Diambu diandi. Siamisa nzengo zaku za lungana muna tukutakanu. Sungamena nsilu a Nzambi: “Ikuvamisa elo, ikusadisa.”—Yesaya 41:10.

Cody, ona oyikilu kala wavova vo: “Yasia ngolo muna sunda fu kia tala mambu ma nsoni. Nkumbu miayingi yavutukilanga e fu kiaki, kansi muna lusadisu lwa Nzambi yasunda kio.” Dylan, ona oyikilu kala wavova vo: “Ke diadi kala diampasi ko muna tá zumba yo nkw’ame a salu. Kansi, kuna ziku kiawonso yamvovesa vo ‘kizolele ko!’ Diakiese kikilu wau vo ngina ye ntona zavelela. E diambu disundidi o mfunu, i zaya vo yayangidika Yave.”

Avo ozizididi e ntonta, oyangidika Nzambi!—Ngana 27:11.