Wau vo Yave * wa Nzambi a Mpungu-ngolo ye Mvangi a lekwa yawonso, wantu ayingi balenda banza vo yandi i nkwa kuma muna mambu mawonso mevangamanga ova ntoto, makala mambote yovo mambi. Kansi, badika dina o Nkand’a Nzambi uvovanga mu kuma kia Nzambi aludi:

• “O Yave wansongi muna nzila zandi zawonso.”—Nkunga 145:17.

• ‘Ngyenda zawonso za [Nzambi] zansongi. O Nzambi nkwa ziku, yo kondw’o vilwa, wansongi kwandi yo singama.’—Nsiku 32:4.

• ‘Yave nkwa walakazi wayingi, ye nkenda.’—Yakobo 5:11.

Ke Nzambi ko otwasanga mambu mambi ngatu vukumuna wantu mu vanga e mbi. Nkand’a Nzambi uvovanga vo: ‘Ke vakadi on’ovukumunwa ovova ko vo, kwa Nzambi mvukumwinu.’ Ekuma? E kuma kadi, “Nzambi kalendi vukumunwa kwa bi ko, ngatu vukumuna muntu yandi kibeni.” (Yakobo 1:13) Nzambi ke tontanga wantu ko yovo kubavukumuna mu vanga e mbi. Nzambi ke twasanga mambu mambi ko ngatu fila wantu bavanga e mbi. Ozevo, nani i nkwa kuma muna mambu mambi mebwanga?

Muna songa mosi muna kuma wantu bemwenanga e mpasi Nkand’a Nzambi uvovanga vo: ‘E kolo ye mambu ma kinsalukisa mebwilanga wantu awonso.’ (Kimpovi 9:11) Avo sumbula kibwidi, ana bena va ndambu balenda mona mpasi yovo ve mun’owu wa fulu bena. Vioka tezo kia 2.000 ma mvu, Yesu Kristu wayika sumbula kia nzo yabwa yo vonda 18 dia wantu. (Luka 13:1-5) Ke bafwa mu kuma kia bi bavanganga ko, kansi vana ndambu a nzo yabwa bakala. Muna ngonde a Yanuali ya mvu wa 2010, luyalu lwa nsi ya Haiti lwayika vo 300.000 ma wantu bafwa mu kuma kia nzakama zangolo za ntoto. Yau awonso bafwa, yo wantu ambote yo wantu ambi. Konso muntu mpe olenda bakama kimbevo.

Akaka balenda yuvula vo: ‘Ekuma Nzambi kalembi kakidila sumbula yayi? Ekuma kalembi taninanga wantu ambote kimana balembi bwilwa sumbula?’ Kele vo Nzambi kakidilanga mambu mambi diadi songa vo ozayanga mambu una ke mavangamene ko. Wau vo Nzambi ovwidi e wisa kia zaya mambu ma kusentu, tulenda kiyuvula: Nga Nzambi osadilanga e wisa kiandi kia teka zaya mambu mebwa?—Yesaya 42:9.

Nkand’a Nzambi uvovanga vo: “O Nzambi eto wina kun’ezulu, ovangidi konso una kazolele.” (Nkunga 115:3) Yave ke vanganga mambu  kivangi-kivangi ko, kansi ovanganga kaka mana kazeye vo mamfunu. I diau mpe kevanganga muna zaya mana mebwa kuna ntwala. Muna bonga e nona, vava mbi yawokela muna mbanz’a Sodomo ye Ngomora Nzambi wavovesa Abarayama vo: “Se nkulumuka, yatala ovo bamene vanga mun’owu wa kazu kiau kina kizidi oku ngina, ovo ke wau ko, nzaya.” (Etuku 18:20, 21) Una mbi ke yawokele ko muna mbanza zazi, Yave kasadila wisa kiandi ko mu zaya una mbi yadi wokelelela. Ozevo, ezak’e ntangwa Yave obakanga nzengo za lembi zaya mawonso mebwanga. (Etuku 22:12) Kansi, avo Yave obakidi nzengo za lembi zaya mawonso mebwanga, ke sinsu kia lutovoko ko kwa yandi. Wau vo “mavangu mandi malunga,” Nzambi osonganga tezo muna mpila kezayilanga mana mebwa kuna ntwala ye kani diandi. Ke komekenanga wantu ko bavanga mambu. * (Nsiku 32:4) Ediadi aweyi disongele? Disongele vo: Nzambi osolanga mana kazolele teka zaya.

Wantu mpe bena ye kuma muna mbi iwokelanga. Tala mpila Nkand’a Nzambi uyikilanga mavangu malenda twasa vonza. “Konso muntu vana ken’ovukumunwa, ovo otwalakeso kwa diandi’keto, yo nekenwa. I bosi, eketo, ovo diyimiti, diwutidi esumu; vo i’sumu, ovo dizikukidi, diwutidi lufwa.” (Yakobo 1:14, 15) Vava wantu bekuyivananga mu mavangu yovo zolela yau yambi ediadi dilenda kubatwasila e mpasi. (Roma 7:21-23) Lusansu lusonganga vo wantu bevanganga mambu mambi metwasanga ulolo wa mpasi. Wantu ambi bevukumunanga akaka mu kituka yimpumbulu, i dianu e mbi iwokelelanga.—Ngana 1:10-16.

Nga Nzambi ofwete kakidila wantu mu vanga mambu mambi? Badika una Nzambi kavangila muntu. Nkand’a Nzambi uvovanga vo Nzambi wavanga wantu muna fwaniswa kiandi. Muna kuma kiaki, wantu balenda tanginina fu ya Nzambi. (Etuku 1:26) Wantu bavewa nswa wa kuyisolela yo songa kwikizi kiau muna Nzambi mu vanga oma mambote vana meso ma Nzambi. (Nsiku 30:19, 20) Avo Nzambi kakomekenanga wantu mu vanga mambu, ke diadi kala mfunu ko mu kutuvan’o nswa wa kuyisolela. O wantu badi kala nze makina, mawonso badi vanga makubikwa madi kala. Diau adimosi mpe diadi vangama kwa wantu kele vo mawonso bevanganga mateka kanwa. Diakiese kikilu wau vo Nzambi watuvana o nswa wa vanga mana  tuzolele. Ediadi ke disongele ko vo e mpasi betwasanga wantu ye nsola zambi bevanganga zikwamanana bangika wantu.

Avo oyuvwidi nkwa dibundu dia Hindu yovo Budista e kiuvu kina vana fukwa ki’Eyingidilu diadi e mvutu kekuvana i zazi: “Mambu mambi mevangamanga kwa wantu ambote mu kuma kia nsiku wa Karma. I sia vo bena tambula nsendo wa vilwa bavanga muna zingu kiau.” *

O tanga malongi ma Karma ke mekutusadisa ko mu zaya dina Bibila kivovanga mu kuma kia lufwa. Kuna mpatu ya Edene, Mvangi wavovesa Adami wa yakala diantete vo: “Konso nti wina muna mpatu, di’odia; vo i nti a zayila wete yo bi, kudie wo ko: kadi muna lumbu odia wo, fw’ofwa.” (Etuku 2:16, 17) Kele vo Adami kasumukina Nzambi ko, wadi zinga yakwele mvu. Lufwa i tumbu twatambula mu kuma kia kolamena nsiku a Nzambi. Vava wan’au bawutuka o ‘lufwa lwasambukila wantu awonso.’ (Roma 5:12) Ekiaki, i kuma kiyikilwanga vo, “e mfutu esumu fwa.” (Roma 6:23) Bibila kivovanga mpe vo: “On’ofwidi kala, olungisilu mun’esumu.” (Roma 6:7) Muna mvovo miakaka, lufwa luvunzanesanga masumu kavanga o muntu vava kakala moyo.

Mafunda ma wantu bekwikilanga muna nsiku a Karma, bevovanga vo e mpasi za wantu kanwa zakanwa. Minkwikizi miami ke betokananga ko mu kuma kia mpasi zau ye za wantu akaka. Kansi, lukwikilu lwalu lufilanga wantu mu dimbula e vuvu vo e mpasi zifokoka. Bekwikilanga vo diambu dimosi kaka dilenda sadisa muntu mu vevoka mu mpasi, i wutuluka. Kansi, elongi diadi diaswaswana kikilu ye dina dilongwanga muna Nkand’a Nzambi. *

Ke muntu ko i tuku diantete dia mbi. Satana wa Nkadi Ampemba, ona wakala mbasi akwikizi a Nzambi, “katelamena muna ludi ko,” watwasa sumu mu nza. (Yoane 8:44) Wafila wantu mu kolamena Nzambi kuna mpatu a Edene. (Etuku 3:1-5) Yesu Kristu wanyikila vo ‘nkwa mbi’ ye ‘nyadi a nza.’ (Matai 6:13; Yoane 14:30) O wantu betangininanga Satana, vava bevezanga nsiku mia Yave. (1 Yoane 2:15, 16) Tutanganga muna 1 Yoane 5:19 vo: ‘E nza yawonso mu wisa kia ndiona wambi ilele.’ Vena ye vangwa yakaka ya mianda bakolamena Nzambi yo yikama Satana. Nkand’a Nzambi uvovanga vo Satana ye nkwiya miandi ‘betungianisang’e nza yawonso’ yo twasa “tâtu kwa nza.” (Lusengomono 12:9, 12) Ozevo, Nkadi Ampemba wa Satana i tuku diantete mu mpasi za wantu.

Dia ludi vo Nzambi ke nkwa kuma ko mu mpasi zibwilanga o wantu ngatu kubabangika. Wasia nsilu vo ofokola e mbi nze una usonga elongi dilanda.