Simita, * nkento wa mvu 35 kuna mbanz’a Daca, kuna nsi ya Bangladesh wazayakana vo muntu ambote. Wazayakana mpe vo nsadi ambote ye nkwa ngemba ona wazolanga sadisa akaka mu zaya Nzambi. Esi nzo ye akundi andi bakendalala kikilu vava Simita kabakama kimbevo kiamvonda mu nzaki.

Nga Simita, James yo nkaz’andi kimbuta kia vioka 30 ma mvu bakala kiau, bazayakana mpe vo wantu ambote. Vava bayenda kingula akundi au kuna weste ya Estados Unidos, ke bavutuka diaka ku nzo au ko kuna Nova York. Bafwa mu sumbula kia kalu yo twasa ntantu ye nkenda zayingi kwa yitu ye akw’au a salu.

O unu, ke divavanga ko vo muntu kazayiswa vo e mbi mu wokela kaka ina. Vita zivondanga masoladi yo wantu akaka bena vo ke masoladi ko. Ulolo wa wantu befwanga mu kuma kia umpumbulu yo nsoki. Sumbula kia makalu ye mayela ma vonza mevondanga wantu a mpila mu mpila. Sumbula ya mvula, tembwa yampwena ifwasanga mbanza ye mavata. Nsoki ye fu kia sia mpambula kiwokelanga. Nanga wabwilwa kala mpasi zazi.

Ke diambi ko mu vanga e yuvu nze yayi:

• Ekuma mambu mambi mebwilanga wantu ambote?

• Nga Nzambi i nkwa kuma muna mpasi zazi?

• Nga mambu mambi mu nkatu mevangamenanga yovo wantu betwasanga mo?

• Nga i Karma, i sia vo mfutu wa mambu mambi kateka vanga o muntu?

• Avo vena yo Nzambi wa Mpungu-ngolo, ekuma kalembi taninanga wantu ambote?

• Nga wantu besinga vevoka muna mbi ye mpasi?

Muna zaya e mvutu za yuvu yayi, tufwete zaya e mvutu za yuvu yole yamfunu: Ekuma mambu mambi mebwilanga wantu awonso? Adieyi Nzambi kevanga?