EKUMA AKAKA BEKATIKISILANGA? Ulolo wa wantu beyindulanga vo Nzambi obadikilanga wantu vo asumuki ye ke bafwana siwa sungididi ko. Kendra, ona wayela kimbevo kia lukendalalu wakitumbanga wau kalembi lemvokela nkanikinu mia Nzambi una ufwene. Wavova vo: “Ediadi diamfila mu yambula samba.”

NKAND’A NZAMBI ADIEYI ULONGANGA? Yave ke sianga kaka sungididi muna masumu maku ko, kansi ovavanga bakula nkia mpila muntu una. Nkand’a Nzambi uvovanga vo: “Oyandi ozeye mpangw’eto; osungamene wo vo tu ntoto.” Edi disundidi o mfunu, Nzambi ‘ke kutuvutulwila mun’owu wa masumu meto ko,’ kansi okutulolokanga vava tuvilukanga o ntima.—Nkunga 103:10, 14.

Badika e nona kia Davidi wa ntinu a Isaele ona oyikilu kala muna longi diantete. Wasamba kwa Nzambi vo: ‘O meso maku mambona una kiavangamene ko, e yikwa yame yawonso yasonama muna nkand’aku . . . Unsata, e Nzambi, wazaya ntim’ame.’ (Nkunga 139:16, 23) Davidi wakala ye ziku vo kana una vo wavanga masumu mampwena, Yave wabakula luviluku lwandi lwa ntima.

Yave otomene kuzaya ke mu wantu akaka ko. Nkand’a Nzambi uvovanga vo: ‘O muntu ndose ketalanga, kansi Yave ntima ketalanga.’ (1 Samuele 16:7) Nzambi ozeye mawonso mu kuma kiaku, luvila lwaku, mpila wasansilwa ye kiwuntu kiaku. Okumonanga yo bakula e ngolo ovanganga muna vanga luzolo lwandi kana una vo vilwa ovanganga.

O Nzambi aweyi kesadilanga ‘umbakuzi’ wandi muna kufiaulwisa?