NTU A DIAMBU WA FUKWA | OLENDA KALA YE NGWIZANI AMBOTE YO NZAMBI
Nga Omonanga vo Wafinama Una yo Nzambi?
“O kala ye ngwizani ambote yo Nzambi ngindu divuvikanga. Dina nze ngeye otaninwanga kwa Nzambi ntangwa zawonso.”—CHRISTOPHER, TOKO DIMOSI KUNA GANA.
“Nzambi omonanga e mpasi zaku zawonso, okusonganga o zola yo kuvua o mfunu.”—ANA WA MVU 13, ALASKA, E.U.A.
“E diambu disundidi o mfunu i zaya vo una ye ngwizani ambote yo Nzambi!”—GINA, NKENTO WA MUSI JAMAICA UNA YE TEZO KIA MVU 45.
Christopher, Ana yo Gina ke yau kaka ko bena ye ngwizani ambote yo Nzambi. Ulolo wa wantu mu nza yawonso bekwikilanga vo Nzambi nkundi au. Adieyi tuvova mu kuma kiaku? Nga omonanga vo wafinama una yo Nzambi? Avo ke wau ko, nga ozolele finama Nzambi? Nanga olenda kiyuvula: ‘Nga o mpasi muntu olenda kala nkundi a Nzambi wa Mpungu-ngolo? Avo i wau, mu nkia mpila?’
OLENDA KALA NKUNDI A NZAMBI
Bibila kisonganga vo olenda kala ye ngwizani ambote yo Nzambi. Kivovanga vo Nzambi wayikila Abarayama wa selo kiandi vo ‘nkundi ame.’ (Yesaya 41:8) Tala mpe e mboka yasonama muna Yakobo 4:8: “Nufinama Nzambi, oyandi mpe okunufinama.” E kiaki i ziku kisonganga vo olenda kala ye ngwizani ambote yo Nzambi. Kansi wau vo Nzambi ke monekanga ko, aweyi olenda ‘kumfinamena’ yo kala ye ngwizani ambote yo yandi?
Muna zaya e mvutu za kiuvu kiaki, badika dina divangamanga vava wantu bevanganga kikundi. Entete divavanga vo bazayana e nkumbu. I bosi, bemokenanga ntangwa zawonso yo songaziana e ngindu, ediadi diwokesanga kikundi kiau. Vava bevanganga mambu muna wete dia muntu yo nkwandi, e kikundi kiau kisiamanga. Diau dimosi mpe dilenda vangama muna kala ye ngwizani ambote yo Nzambi. Tala una olenda wo vangila.
