Ku mbanz’a Baku, Azerbaijão yawutukila. I mwana wanzole muna wana wole twawutuka. Se diame Muçulmano kakala, ngudi ame Nyuda. Mase mame batoma zolananga yo tambulwila lukwikilu lwa muntu yo nkwandi. Ngudi ame wayikamanga Papa muna nkinzi wa ngonde a Ramadã wa dibundu dia muçulmano, o Papa mpe wayikamanga Mama muna nkinzi a Nduta wa Ayuda. Muna nzo eto mwakala ye Alcorão, Torá (nkanda tanu miantete mia Bibila) ye Bibila.

Yakibadikilanga vo i Muçulmano. Kana una vo kiakatikisanga ko vo Nzambi una, kansi vakala ye mambu mantokanesanga. Yakiyuvulanga: ‘Ekuma Nzambi kavangila wantu? Ekuma muntu kafwete mwena mpasi mu zingu kiandi kiawonso yo tubwa diaka kuna bilungi bia tiya? Wau vo wantu bevovanga vo mawonso mevangamanga i luzolo lwa Nzambi, yakiyuvulanga: ‘Nga Nzambi otwasanga mpasi za wantu yo yangalela lubangamu lwau?’

Vava yalungisa mvu 12, yayantika samba e sambu kia namaz. E kiaki i sambu besambanga esi Muçulmano nkumbu tanu muna lumbu. Muna kolo kiakina, se diame wankotesa mu sikola ya Ayuda kumosi yo mpangi ame. Mambu mayingi twalongokanga kumosi ye malongi ma Torá ye nding’a Kiyibere. Vitila twalongoka, twasambanga mun’owu wa kisi nsi kia Ayuda. Muna nsiuka, yasambanga sambu kia namaz kuna nzo, i bosi muna mwini kuna sikola yasambanga sambu ya Ayuda.

Kansi, yavavanga zaya mvutu za ziku za yuvu yame. Nkumbu miayingi yayuvulanga afidi a nsambila ya kiyuda: “Ekuma Nzambi kavangila wantu? Aweyi Nzambi kebadikilanga se diame una vo Muçulmano? Se diame muntu ambote, kansi ekuma kebadikilwanga vo wafunzuka? Ekuma Nzambi kamvangila?” Kansi, e mvutu bampana ke zakiá ko.

Muna mvu wa 2002 yayambula kwikila muna Nzambi. Vava twayenda kuna Alemanha, lumingu lumosi kaka lwavioka se diame wabakama kimbevo kia ntima, kavovanga diaka ko ngatu nikuka. Tuka mvu miayingi yasambanga mu kuma kia mavimpi ye wete dia esi nzo eto. Wau vo yakwikilanga vo Mpungu-ngolo una yo nkuma watanina moyo, yandodokelanga lumbu yawonso mu kuma kia mavimpi ma s’ame. Yakwikilanga vo ‘ke diampasi ko kwa Nzambi mu vana mvutu za ndomba zame.’ Yakala ye ziku vo okumpanina mun’owu wa sambu yame. Kansi, se diame wafwa.

Yakendalala kikilu kadi yayindulanga vo Nzambi ketokanenanga mpasi za wantu ko. Yabanza: ‘Nanga mu mpila yambi isambilanga yovo Nzambi kena ko.’ Kiakala diaka yo luzolo lwasamba sambu kia namaz ko. Kiavuanga diaka mabundu mankaka mfunu ko, kwa mono Nzambi kakala diaka ko.

Vioka ngonde sambanu, Mbangi za Yave badodela kielo kieto. Wau vo ke twayangalelanga malongi ma Kikristu ko, mono yo mpangi ame twavava kubasonga kuna ndekwa vo malongi mau ke makieleka ko. Twabayuvula: “Ekuma Akristu besambilanga Yesu, kuluzu, Maria ye teke yankaka kana una vo e vangu diadi ditumbwanga muna Nsiku Kumi?” Muna lusadisu lwa Bibila, Mbangi za Yave batusonga vo Akristu akieleka ke bafwete sambila teke ko, e sambu yawonso kwa Nzambi kaka ifwete filwa. Ediadi diansivikisa kikilu.

I bosi twayuvula diaka: “Adieyi tuvova mu kuma kia longi dia nzambi mu ntatu? Avo Yesu i Nzambi, aweyi kazingila va ntoto yo vondwa kwa wantu?” Basadila diaka Bibila yo sasila vo Yesu ka Nzambi ko, kafwanana mpe yo Nzambi ko. Mbangi za Yave basasila vo e kiaki i kuma ke bekwikilanga muna longi dia nzambi mu ntatu ko. Yasivika diaka yo yindula vo ‘Akristu awaya baswaswana mvimba!’

Kana una vo i wau, yavava diaka zaya e kuma wantu befwilanga ye e kuma Nzambi keyambulwilanga e mpasi. Mbangi za Yave bansonga nkanda Zayi Ufilanga ku Moyo a Mvu ya Mvu, a wakala ye kapu yavananga e mvutu za yuvu yame. Vana vau, bayantika longoka yame Bibila.

Muna konso longi twalongokanga, yabaka e mvutu za yuvu yame muna Bibila. Yalongoka vo Yave i nkumbu a Nzambi. (Nkunga 83:18) E fu kiandi kisundidi i zola. (1 Yoane 4:8) Nzambi wavanga wantu kadi wazola vo e nza yakala yo wantu kimana bamona kiese kia zinga. Yabakula vo kana vo Nzambi oyambulanga umpumbulu, kansi omenganga wo ye ke kolo ko ofokola wo. Yalongoka mpe vo o ukolami wa Adami yo Eva mfwilu watwasa kwa wantu. (Roma 5:12) Azolw’eto befwanga mu kuma kia sumu diau, ediadi i diau mpe diavangama kwa se diame. Kansi, muna nz’ampa Yave osukisa mpasi zazi zawonso yo futumuna wantu afwa.​—Mavangu 24:15.

Bibila kiavana mvutu za ziku za yuvu yame yawonso. Yayantika diaka kwikila muna Nzambi. Vava yatoma zaya Mbangi za Yave, yabakula vo mu kintwadi kia wana-ngudi bezingilanga mu nza yawonso. E kintwadi yo zola kwau kwansivikisa kibeni. (Yoane 13:34, 35) Mana yalongoka mu kuma kia Yave mamfila muna kunsadila, muna kuma kiaki yabaka nzengo za kituka mosi muna Mbangi za Yave. Yavubwa kina kia 8 kia ngonde a Yanuali ya mvu wa 2005.

E ludi kia Bibila kiasoba mpila ame yabadikila e zingu. E mpila ina Diambu dia Nzambi dikieseselanga e mambu yampana luvuvamu. E vuvu kia lufuluku, kiampana kiese yo lufiaulwisu lwa zaya vo isinga mona diaka se diame nze una Nzambi kasila nsilu muna Diambu diandi.​—Yoane 5:28, 29.

Vioka mvu 6, ngina ye kiese wau vo yakazala yo Jonathan ovuminanga Nzambi. Twalongoka vo e ludi mu kuma kia Nzambi ke kiampasi ko muna kio bakula ye kiamfunu kikilu. Muna kuma kiaki, tuna ye kiese kia zayisa lukwikilu lweto ye vuvu kia lufuluku kwa akaka. O unu, nzeye wo vo Mbangi za Yave Akristu akieleka.