Salvador: Kizeye mambu mayingi ko mu kuma kia mabundu. Ozevo, kina ye mayingi ko muna mokena yaku.

André: Ntondele wau unsongele ngindu zaku. Mono nkumbu ame André. E nkumbu aku nani?

Salvador: Nkumbu ame Salvador.

André: Ngiangalele muna kuzaya.

Salvador: Mono mpe ngiangalele.

André: E Salvador, nga u munkwikizi?

Salvador: Ingeta. Kansi, vava yakota sikola zandá yayambula kwenda ku nzo a nzambi.

André: Mbakisi. Nkia malongi walanda kuna sikola?

Salvador: Malongi matadidi kadilu kia wantu estudos sociais ye lusansu lwa wantu história. Kansi, lusansu lwa wantu i malongi itoma yangalelanga. Kadi lusansu lutoma songanga lunungunuku lwa wantu mu mvu miami miawonso.

André: Lusansu lulenda sivikisa kibeni. E Bibila mpe nkand’a tusansu. Nga osadilanga Bibila muna lufimpu lwaku?

Salvador: Nkatu. Nzeye wo vo nkanda wambote, kansi kiasidi wo yindula ko vo Bibila nkand’a tusansu.

André: Mbwene vo ziku kia mambu ovavanga zaya. Avo umpene fitangwa ndenda kusonga nona ya tusansu twa ziku tuna mu Bibila.

Salvador: Ke diambu ko. Kansi, kina ye Bibila ko.

André: Ok. Tulenda sadila Bibila kiame. E nona kiantete kina muna 1 Tusansu kapu kia 29, tini kia 26 ye 27. Sono kiaki kivovanga vo: “I ngyala kayala Davidi wa mwan’a Yisai muna Isaele yawonso. E kolo kayala Isaele mvu makumaya; mvu nsambwadi muna Keberone, yo makumatatu ye tatu muna Yerusaleme.”

Salvador: Aweyi sono kiaki kisongelanga vo lusansu lwalu lwakieleka?

André: Vakala ye kolo wantu bakatikisanga kana vo Davidi muntu kieleka kakala.

Salvador: Kinga! Ekuma bafidisila mpaka muna diambu diadi?

André: E kuma kadi kavakala mambu mayingi ko masonganga e ziku vo Davidi muntu kieleka kakala. Kansi, muna 1993 buka kimosi kia asatuludi kiasolola tadi diakala ye mvovo miasekolwa vo “Nzo ya Davidi wa Ntinu a Isaele.”

Salvador: Kiazaya wo ko.

André: O muntu ankaka wakatikiswa i Pontio Pilato ona wakala nyadi muna lumbu ya Yesu. Muna Luka kapu kia 3 tini kia 1, oyikwanga kumosi ye ayadi akaka a tandu kiakina. Nga olenda kio tanga?

Salvador: Ingeta. Kivovanga vo: “O Pontio Pilato wakala nyazi a Yuda, o Erodi nkumbi a Ngalili.”

André: Ntondele. Vioka mvu miayingi, akwa ngangu bakatikisanga kana vo Pontio Pilato muntu kieleka kakala. Kansi, vioka mvu 50, tadi dimosi diasololwa kuna Oriente Médio diasonama nkumbu andi.

Salvador: Hum. Kiasidi wá mambu mama ko!

André: Ngina ye kiese kia kuzayisa mo.

Salvador: Muna vova e ludi, izitisanga Bibila kansi kiyindulanga ko vo mfunu kina mu lumbu yeto. Kilenda kala ye mambu mambote, kansi kiyindulanga ko vo kilenda twasa nluta muna zingu kieto.

André: Wantu ayingi bekwikilanga mu diambu ovovele. Kansi, e ngindu zame muna diambu diadi zaswaswana. E kuma kadi tuka kuna lubantiku e nsatu zeto za lumbu ke lumbu ka zasoba ko. Muna bonga e nona, tuvuidi nsatu za madia, mvuatu ye fulu kia zingila. Tuna mpe ye nsatu za mokena ye akaka yo kala ye zingu kia nzo kiakiese. Nga mambu mama ke mau ko tuvuidi mfunu yeto awonso?

Salvador: Ingeta.

André: Bibila kilenda kutusadisa mu mambu mama mawonso. I kuma Bibila kiyikilwanga vo nkanda ankulu kansi wamfunu mu lumbu yeto.

Salvador: Adieyi ozolele vova?

André: Yambula yatoma sasila. E nkanikinu mia Bibila se kolo miasonekwa, kana una vo i wau mfunu mina o unu nze una miakala vava miasonekwa.

Salvador: Mu nkia mpila?

André: E nkanikinu mia Bibila milenda kutusadisa mu kala ye tezo mu kuma kia nzimbu, kala ye zingu kia nzo kiakiese yovo kala nkundi ambote. Bibila kilenda kutuvana luludiku lwa mfunu. Nga kukwikidi ko vo okala se yovo yakala diambote diampasi kikilu unu? Salvador: Diampasi kikilu. Mono yo nkaz’ame tulungisi mvu umosi tuka twakazala, kansi nkumbu miayingi tutantananga.

André: Tala, e Bibila kina ye nkanikinu milenda kutusadisa. Muna bonga e nona, tutanga e sono kia Efeso kapu kia 5 tini kia 22, 23 ye 28. Nga olenda kio tanga?

Salvador: Ingeta. Kivovele vo: ‘Yambula akento basakalela akazi au nze kuna kwa Mfumu. Kadi yakala i ntu a nkaz’andi wauna Kristu kenena se ntu a nkutakani, yandi i mvuluzi a nitu yayi.’ Tini kia 28 kivovele vo: ‘Diau adimosi mpe, ayakala bafwete zolanga akento au nze nitu za yau kibeni. Yakala ona ozolele nkento andi, ukizolele.’

André: Ntondele. Nga kukwikidi ko vo avo akazi basadidi luludiku lwalu e zingu kiau kikala kiakiese?

Salvador: Nanga kiakiese kikilu kikala. Ediadi dia sazu mu vova kansi diampasi mu vanga.

André: Kieleka, ke vena muntu ko alunga. Muna kapu tutangidi muna ye tini ikutukasakesanga twasonganga e tezo. * Divavanga vo akazi bakalanga ye tezo yo sia wete dia muntu yo nkwandi vana fulu kiantete. Bibila kisadisanga mono yo nkaz’ame mu kala ye tezo.

Salvador: Kiazayanga wo ko.

André: E nzil’a internete ya Mbangi za Yave ina ye mambu mamfunu mevovelanga longo ye zingu kia nzo. Avo ozolele ndenda kusonga mana mena mo.

Salvador: Ke diambu ko.

André: Ok. E nzil’eto i yayi: www.pr418.com. Avo oziwidi yo mpila yayi ikalanga.

Salvador: Mafoto mambote mena mo!

André: Mafoto mama mesonganga e salu kia umbangi tusalanga mu nza yawonso. Tala vana vasonama “Lundilu dia Nkanda.” Avo oziwidi dio, owana fulu kina olenda soneka diambu dina ozolele vavulula. Nga vena ye diambu ozolele zaya?

Salvador: Ingeta. Nzolele zaya diambu ditadidi “Singika e Ntatani.”

André: Ok. Tala, Eyingidilu diadi divovelanga e diambu osolele. Muna longi diadi muna ye mambu 4 tufwete vanga muna singika ntantani. Tala e tini kiaki. Nga olenda kio tanga?

Salvador: Ingeta. Kivovele vo: “Muna longo e mbokena zina nze menga, zola yo luzitu luna nze ntima ye mafulu mekumikanga e ngwizani.” Hum, ngiangalele e mpila basasidi diambu diadi.

André: Ntondele muna ntangilu aku. Tala e sono kia Bibila basidi vava. Niema vana ntandu a sono muna ziula kio.

Salvador: Ingeta. Efeso 5:33. Kivovele vo: “Konso muntu, mbula kazol’owandi nkento nze i yandi kibeni; vo i nkento, kavumina nkaz’andi.”

André: Nga omwene dina e sono kivovele? Konso muntu kafwete vana kina nkwandi kevuanga o mfunu.

Salvador: Kibakisi ko.

André: O yakala ovavanga vo nkento kanzitisa. O nkento ovavanga vo yakala kansonga o zola, ke wau ko?

Salvador: I wau kikilu.

André: Avo yakala osongele zola kwa nkaz’andi, nga ke dikala diasazu ko kwa nkento muna kunzitisa?

Salvador: Nanga disadisa kikilu.

André: E sono kiaki kia Bibila kana una vo se vioka 2.000 ma mvu kiasonekwa, kisonganga nsatu za konso muntu yo vana luludiku lulenda singika longo avo tusadidi lo. Nze una tumwene muna nona kiyikilu kala, o “ntima ye mafulu” i sia vo zola yo luzitu longo luzingisanga.

Salvador: Owau mbwene vo mu Bibila mambu mayingi mena mo.

André: Diamatondo wau vo obakwidi. Nzolele wanana yaku diaka muna zaya e ngindu zaku mu kuma kia kunku kiaki, “Mpila Yá za Singikila e Ntatani” kina mu longi diadi muna nzil’eto ya internete. *

Salvador: Ke diambu ko. Mono yo nkaz’ame se twafimpa longi diadi.