Ku mbanza yakete iyikilwanga vo Ancram kuna Nova York, Estados Unidos yasansukila. Wantu a mbanza yayi ngombe batwelanga. Lutangu lwa ngombe muna mbanza yayi lwavioka lutangu lwa wantu.

Mu mbanza yayi nzo a Nzambi imosi kaka yakala mo, i muna twasambilanga. Kina kia lumingu, nkaka ame ayakala wakungunanga nsapatu zame i bosi yayendanga ku nzo nzambi ye Bibila kiame kiakete kina nkaka ame ankento kampana. Mono ye aleke ame twalongwa o mfunu wasala, zitisa yo sadisa akaka yo vutula matondo muna nsambu tuvuanga.

Vava yakola, yavaika muna nzo yo kituka longi a sikola. Yuvu yayingi yakala yau mu kuma kia Nzambi ye zingu. Alongoki ame akaka ngangu bakala zau. Akaka ke bakala ye ngangu ko, kansi basalanga kwayingi. Akaka muna yau ke bakala ye mavimpi mambote ko, kansi akaka bakala ye mavimpi mambote. E diambu diadi diantokanesanga kikilu. Ezak’e ntangwa, mase ma alongoki ana ke bakala ye ngangu zayingi ko bavovanga vo, “I wau Nzambi kazolele vo mwan’ame kakala.” Yakiyuvulanga e kuma Nzambi kayambulwila vo wana akaka bawutukanga ye kimbevo. Vana ntandu, e nsedia ke bevanganga diambu diambi ko.

Yakiyuvulanga mpe, ‘Nkia diambu diamfunu mfwete vanga muna zingu kiame?’ Yamonanga vo zingu kiame nswalu kiaviokanga. Mu kanda diambote yasansukila, mu sikola zambote yatangila, ya kala mpe ye salu kina yazolanga. Kansi, yamonanga vo diambu diakondwanga muna zingu kiame. E diambu kaka yavingilanga i kazala, kala ye nzo yambote, wuta wana, kwamanana sala yavana yadi kwenda zingila muna nzo zilunga-lunganga e boba. Yakiyuvulanga kana vo vena ye mambu mankaka mfwete vanga muna zingu.

Lumbu kimosi, mono ye akundi ame a salu twayenda mu nkangalu kuna nsi za Mputu. Twayenda kingula nzo a nzambi ya Abadia de Westminster, Notre-Dame de Paris, Vaticano ye nzo za nzambi zankaka zakete. Muna fulu yawonso yayendanga, yayuvulanga e yuvu yame. Vava yavutuka ku nzo ame kuna Sloatsburg, Nova York, yakingula nzo za nzambi zayingi. Kansi, ke vakala muntu ko walenda kumpana mvutu za yuvu yame.

 Lumbu kimosi, nlongoki ame wakala ye mvu 12 wampanga yuvu tatu. Entete, wangiuvula kana vo yazaya wo vo Mbangi a Yave kakala. Yamvutula vo ingeta. I bosi, wangiuvula kana vo yakala yo luzolo lwa zaya mayingi mu kuma kia Mbangi za Yave. Yamvutula diaka vo ingeta. Kuna mfoko, wangiuvula e fulu yazingilanga. Vava yanzayisa kuna yazingilanga, twabakula vo lukufi yazingilanga ye nzo au. Kiayindulanga ko vo e yuvu ya dumbelele ndiona yadi soba zingu kiame yakwele mvu.

Ke vavioka kolo ko, waningamesa mvelo andi vana mwelo a nzo ame yo yantika longoka yame e Bibila. Yamvanga yuvu ina yateka yuvula kwa mfumu zayingi za mabundu. Nswaswani ye mfumu zazina​—o dumbelele wansonga mvutu zasikididi ye zakiá muna Bibila kiame.

E mambu yalongoka muna Bibila mampana kiese kiayingi. Yatoma sivika vava yatanga sono kia 1 Yoane 5:19 kivovanga vo: ‘E nza yawonso muna wisa kia ndiona wambi ina.’ Yayangalala vava yalongoka vo ke Nzambi ko otwasanga e mpasi tumonanga kansi Satana otwasanga zo. Ke kolo ko​—Nzambi ofokola e mpasi zazi. (Lusengomono 21:3, 4) Yabakula vo tulenda zaya Diambu dia Nzambi avo ditomene sasilwa. Kana una vo Mbangi a Yave wandonganga mvu 12 kaka kakala miau, yabakula vo e ludi i ludi kwandi kana nkutu vo nleke olongele kio.

Kana una vo i wau, yavava zaya kana vo Mbangi za Yave bevanganga mana belonganga. Muna bonga e nona, dumbelele wandonga vo Akristu akieleka besonganga fu nze luzindalalu ye ngemba. (Ngalatia 5:22, 23) Muna kuma kiaki, yantonta mu zaya kana vo yandi mpe osonganga e fu yayi. Lumbu kimosi, kuna lukanu kialwaka mu ola ina twalongokanga ko. Yakiyuvula: ‘Nga okumpingila kikilu? Nga ofunga makasi wau vo ntangwa mviokese?’ Vava yaningamesanga e kalu diame, yamona vana mwelo a nzo ame vava kamvingilanga. Watikuna yavana ndambu a kalu yo vova vo: “Fiakete kaka fisidingi nga mvutukidi kuna nzo yo vovesa mama kabokela kuna lupitalu ye mapolisia mu zaya kana nkia diambu dibwididi. Kadi kulwakanga mu ola yayi ko.”

Lumbu kimosi, yanyuvula kiuvu kiampasi eki kadi lenda vanina mvutu ko. Yazola zaya kana vo ovana mvutu kivani-kivani. Vava yamvanga kiuvu, watoma kuntala yo vova vo: “Kiuvu kiaki kiampasi. Yambula yasoneka kio, bosi iyuvula kio kwa mase mame.” Vava kavutuka diaka kunkingula, wantwasila Eyingidilu diavananga mvutu za kiuvu kiakina. Wau vo nkanda mia Mbangi za Yave miavana mvutu za yuvu yame yawonso​—e diadi diamfinamesa yo yau. Yakwamanana longoka ye dumbelele kiakina mu mvu umosi, i bosi yavubwa yo kituka se Mbangi a Yave. *

Vava yabaka mvutu za yuvu yame, yavava zo zayisa kwa wantu awonso. (Matai 12:35) Kuna lubantiku, yitu yame bambangika mu kuma kia lukwikilu lwame. Kansi, kuna kwalanda lubangamu lwakuluka. Vitila kafwa, ngudi ame wayantika longoka Bibila. Kana una vo kavubwa ko, ngina ye ziku vo wakala yo luzolo lwa sadila Yave.

Muna mvu wa 1978 yakazala yo Elias Kazan wa Mbangi a Yave. Muna mvu wa 1981, twabokelwa twenda sadila kuna Betele * ya Estados Unidos. Vioka mvu 4 muna salu kia Betele, Elias wafwa. Kana una vo kinsona yamonanga, o kwamanana sadila ku Betele diansadisa mu sia sungididi mu salu yo tambula lufiaulwisu.

Muna mvu wa 2006 yakazala diaka yo Richard Eldred ona osadilanga ku Betele. Mono yo Richard tuyangalelanga e lau dia sadila ku Betele. O zaya e ludi mu kuma kia Nzambi, diansadisa mu solola e mvutu za yuvu yame yo kala ye kani diasikila muna zingu. Yavua nsambu zazi mu kuma​—kia yuvu tatu ya dumbelele kimosi.