Oyindula vo awana bafwa befutumuka nga dia uzowa? Ka diau ko Paulu kayindulanga. Muna mvovo miandi miavumunwinwa wasoneka vo: “Ovo muna zingu kiaki kaka tusididi Kristu e vuvu, kuna kwa wantu awonso nga tusundidi o lukendalalu. Kansi wau kiafulwa Kristu muna mafwa, i ntomoni mun’awana balele.” (1 Korinto 15:19, 20) Paulu wakala ye ziku vo lufuluku lukala kikilu. O lufuluku lwa Yesu i ziku kisonganga diambu diadi. * (Mavangu 17:31) I kuma Paulu kayikila Yesu vo”ntomoni,” kadi i muntu antete wafulwa yo vewa elau dia vwa moyo a mvu ya mvu. Wau vo Yesu i muntu antete wafulwa, e diadi disongele vo akaka mpe fulwa befulwa.

Vena ye diambu diankaka disonganga vo lufuluku diambu diakieleka. Yave i Nzambi aludi. “Nzambi . . . kalendi vuna ko.” (Tito 1:2) Yave ke vunanga ko. Nga Yave olenda sia nsilu wa lufuluku lembi wo lungisa? Ediadi ka dilendi vangama ko.

Ekuma Yave kakubikila lufuluku? Mu kuma kia nzola andi. Yobi wayuvula vo: ‘O muntu ovo ofwidi, nga olenda zinga diaka?’ Wavutula vo: ‘Obokela, yatambulwila. Osi’etima mun’evangu dia moko maku.’ (Yobi 14:14, 15) Yobi wakala ye ziku vo S’andi ezulu una yo luzolo lwa kumfutumuna. Nga Nzambi wasoba? ‘Mono Yave kiasoba ko.’ (Malaki 3:6) Yave wakinu yo luzolo lwa vutulwisa moyo, mavimpi ye kiese kwa awana bafwa. O lwalu i luzolo kekalanga lwau konso se dia nzolwa avo ofwidilu mwana. Nswaswani yo se, Yave kena kaka yo luzolo ko, kansi ovuidi nkuma wafutumuna wantu.—Nkunga 135:6.

 Yave ovana nkuma kwa Mwan’andi mu futumuna ana bafwa. Ediadi kiese kiayingi ditwasa kw’awana bafwilwa azolw’au. Aweyi o Yesu kemonanga mu kuma kia lufuluku? Vitila kafutumuna Lazaro, Yesu wamona e mpila mpangi ye akundi a Lazaro bakendalela, muna kuma kiaki ‘Yesu wadila.’ (Yoane 11:35) Lumbu kiankaka, Yesu wawanana yo nkento ansona wa musi Naini ona wafwilwa mwan’andi a mosi kaka. Yesu wamfwila nkenda yo kumvovesa vo “kudidi ko.” I bosi, wafutumuna mwand’andi. (Luka 7:13) Ozevo Yesu ntantu zayingi kemonanga mu kuma kia lufwa. Yesu osinga mwesa kiese kiayingi kwa wantu vana fulu kia kubamwesa e nkenda.

Nga wakendalala kala mu kuma kia lufwa? Nanga olenda yindula vo lufwa ka lufokoka ko. Kansi, Nzambi osinga fokola lufwa vava kesadila Mwan’andi muna futumuna mafwa. Nzambi ozolele vo wazaya diambu diadi. Ozolele mpe vo wamonana diaka ye azolw’aku. Yindula vava ovanga nkubika ye azolw’aku lembi vambana diaka yau mu kuma kia lufwa.

Lionel ona oyikilu kala wavova vo: “Kuna kwalanda, yalongoka ludi mu kuma kia lufuluku. Kuna lubantiku, diampasi diakala muna kwikila mu longi diadi kadi kiakala ye vuvu ko muna wantu bandonga diambu diadi. Kansi, vava yafimpulula longi diadi muna Bibila, yabakula vo dialudi kikilu. Ngina ye luzolo lwa mona diaka nkak’ame.”

Nga ozolele zaya mambu mankaka? Mbangi za Yave bekala ye kiese kia kusonga muna Bibila kiaku e kuma benena ye ziku vo lufuluku kala kieleka lukala. *