Konso mvu tunietekanga yo kaya mafunda ye mafunda ma Nkand’a Nzambi ye nkanda miakaka. Tutunganga mavula yo sadila máquina ma nietekena e nkanda mu nza yawonso. Mafunda ye mafunda ma nkutakani zilungananga mu fulu yambote ya nsambila iyikilwanga vo Maseka ma Kintinu. Akweyi kutukanga e nzimbu zisadilwanga e salu yayi yawonso?

E salu yeto yawonso mu tukau twa mvevo isadilwanga. (2 Korinto 9:7) Eyingidilu diazole diavaikiswa muna mvu wa 1879 diavova vo: “Tukwikilanga vo e salu kia vaikisa e Torre de Vigia de Sião [nze una Eyingidilu diayikilwanga] kina ye lusadisu lwa YAVE, muna kuma kiaki ke tulomba nzimbu kwa wantu ko muna vaikisa o nkanda wau.” Yamu wau twakinu landa luludiku lwalu.

Tukau twawonso tufilwanga muna mavula meto yovo siwa muna nkel’a tukau ikalanga muna konso Seka dia Kintinu. Kansi, ke tulombanga tini kia kumi ko, zietesa longa yovo lomba nzimbu mu kuma kia salu yovo nkanda mieto. Ke tufutwanga ko muna samuna nsangu zambote, longa muna nkutakani yo tunga fulu ya nsambila. Yesu wavova vo: “Ngovo nutambwidi, nuvan’e ngovo.” (Matai 10:8) Awonso besadilanga muna mavula meto, kuna vula dia sina kumosi ye Selo Yambuta ya Mbangi za Yave ke befutwanga nzimbu ko.

O tukau mpe tusadilwanga mu sadisa awana bebwilwanga e sumbula. Akristu a tandu kiantete bavananga tukau mu sadisa mpangi zau zakala mu mpasi. (Roma 15:26) Diau dimosi mpe, o unu tusadisanga mpangi zeto zibwilwanga e sumbula muna tungulula nzo zau, Maseka ma Kintinu, kubavana madia, mvuatu ye nlongo.