Vitila wavanga konso diambu nanga okukiyuvulanga, ‘nkia nluta dikuntwasila?’ Avo tuvangidi kiuvu kiaki mu kuma kia sambu, nga disonga vo tu akwa loko? Nkatu. Kadi, yeto awonso tuzolele zaya kana vo e sambu nluta kikilu kitwasanga. Kana nkutu Yobi wa muntu ambote wayuvula vo: ‘Avo ibokele, nga okumputula?’—Yobi 9:16.

Muna malongi mavitidi, tulongokele vo e sambu ke kivuvikanga kaka ntima ko. Nzambi aludi owanga kikilu e sambu. Avo tusambidi mu mpila yambote yo lomba mana mena ngwizani yo luzolo lwandi, wá kekutuwá. Nzambi okutuwondelelanga vo twamfinama. (Yakobo 4:8) Nkia nluta tuvua avo tusambidi kwa Nzambi? Yambula twazaya.

Nga otelamwang’o moyo vava obwilwanga e diambu diampasi? Nkand’a Nzambi ukutukasakesanga vo muna ntangwa yayi tufwete ‘kwamanan’o samba’ yo yambula vo “e ndomba zeto . . . zazayiswa kwa Nzambi.” (1 Tesalonika 5:17; Filipi 4:6) Nkand’a Nzambi usonganga mpe vo avo tusambidi kwa Nzambi, “o luvuvamu lua Nzambi, luna luviokele nyindu wawonso, luyingila ntima [mieto], yo makani [meto] muna Kristu Yesu.” (Filipi 4:7) Tulenda vua luvuvamu muna yekeka e ntokani zeto zawonso kwa Se dieto dia zulu. Muna Nkunga 55:22, tukasakeswanga vo ‘twayekek’ezitu dieto kwa Yave, yandi okutusadisa.’

 Wantu ayingi mu nza bevuanga luvuvamu lwalu. Hee Ran wa musi Coréia do Sul wavova vo: “Vava ibwilwanga mambu mampasi, avo nsambidi mu kuma kia mambu mama imonanga vo mpevokele, ivuanga mpe nkuma wa zizidila.” Cecilia kuna Filipinas wavova vo: “Wau vo i ngudi, itokananga mu diambu dia sansa wana yo lunga-lunga ngudi ame una vo mbevo. Kansi, o samba kukunsadisanga mu lembi telamwa moyo yo kuyivana mu salu yame ya lumbu ke lumbu. Ngina ye ziku vo Yave okunsadisa muna kubalungalunga.”

Nga onwananga ye mpasi yovo diambu disianga zingu kiaku mu vonza? O samba kwa “Nzambi a fiauzi wawonso” dilenda kusadisa. Nkand’a Nzambi uvovanga vo Nzambi  ‘okutufiaulwisanga muna mpasi zeto zawonso.’ (2 Korinto 1:3, 4) Lumbu kimosi vava Yesu katokananga kwayingi, ‘wafukama yo samba.’ Nkia nluta diantwasila? “O mbasi otukidi kun’ezulu unsengomokene, unkindisi.” (Luka 22:41, 43) O Nekemiya wa nkwa kwikizi mpe wabangikwa kwa yimpumbulu ana bavava kunsima kalembi sala e salu kia Nzambi. Wasamba vo: “E Nzambi, unkumik’o moko.” Mana mavangama kuna kwalanda mesonganga vo Nzambi wansadisa mu sunda wonga yo sala e salu kiandi una ufwene. (Nekemiya 6:9-16) Reginaldo wa musi Gana wayika e nluta ketambulanga vava kesambanga, wavova vo: “Vava isambanga musungula muna ntangw’a mpasi, imonanga nze mono nzayisi mpasi zame kwa muntu una yo nkuma wa kunsadisa yo kumfiaulwisa mu lembi mona wonga.” Dialudi, Nzambi olenda kutufiaulwisa vava tusambanga kwa yandi.

E nzengo zakaka tubakanga zilenda vanga diambu kwa yeto kibeni ye azolw’eto. Aweyi tulenda bakila nzengo zambote? Nkand’a Nzambi uvovanga vo: ‘Ovo muntu vovo nwina wakondwa ngangu [musungula vava kenwananga ye mpasi], mbula kalomba kwa Nzambi, on’ovananga kw’awonso kuna mvevo lembi semba, zivewa kwa yandi.’ (Yakobo 1:5) Avo tulombele ngangu muna sambu, Nzambi olenda sadila mwand’andi avelela muna kutusadisa mu baka nzengo zambote. Ozevo, tulenda lomba mwand’avelela kadi Yesu wavova vo, ‘o Tata kun’ezulu, . . . ovan’o mwand’avelela kw’awana bekunlomba.’—Luka 11:13.

Yesu wazayanga mfunu wa lomba lusadisu kwa Se diandi mu baka nzengo zamfunu. Nkand’a Nzambi ukutuzayisanga vo vava kiafwana e ntangwa ya sola wantu 12 ana badi kituka se ntumwa zandi, Yesu ‘wasamba kwa Nzambi fuku wawonso.’—Luka 6:12.

Nze Yesu, wantu ayingi o unu bekasakeswanga vava bemonanga una Nzambi kavanina e mvutu za sambu yau muna baka nzengo zambote. Regina kuna Filipinas wayika mambu mayingi mampasi kamona vava yakala diandi kafwa. Wavaikiswa ku salu, wasansa o wana yandi mosi ye makaka. Adieyi diansadisa mu baka nzengo zambote? Wavova vo: “O samba kwa Yave i diambu diansadisa.” O Kwabena kuna Gana wayika e kuma kalombela lusadisu kwa Nzambi, wavova vo: “Yavaikiswa mu salu kina yafutilwanga nzimbu zayingi. Muna ntangwa yayina, nkumbu miayingi yasambanga kwa Yave kansadisa mu baka nzengo zambote. Yabakula vo Yave wansadisa mu solola salu kiambote kikunsadisanga mu lungisa e nsatu zame muna mwanda ye muna nitu.” Ngeye mpe olenda vua lusadisu lwa Nzambi muna sambanga mu kuma kia mambu malenda siamisa e ngwizani aku yo yandi.

Nluta miakete kaka tuvovele mina olenda vua muna lusadisu lwa sambu. (Tala nona yakaka muna babu kina yo ntu a diambu vo, “ Nluta mia Samba.”) Kansi, muna vua nluta miami ofwete zaya Nzambi yo luzolo lwandi. Avo ozolele zaya Nzambi, tukasakese wavava Mbangi za Yave yo lomba elongi dia Nkand’a Nzambi. * I diambu diantete olenda vanga muna finama ndiona “owanga sambu.”—Nkunga 65:2.