Adieyi obenze? Nga Nzambi oyangalelanga e vita? Avo i wau, nkia sambu kekalanga vava wantu benwananga e vita o unu? O zaya e mvutu za yuvu yayi dilenda soba e ngindu zaku mu kuma kia vita. Muna bonga e nona, avo ozeye wo vo Nzambi otondanga e vita yo yikama e buka kia wantu ana ozolanga, nanga oyangalala mu zaya vo wantu a buka kiaku besunda e vita zawonso benwana. Kansi, aweyi omona avo ozeye wo vo Nzambi wantu a buka kiakaka keyikamanga? Nanga ku sambu diadina okwenda.

Kansi, vena ye diambu disundidi o mfunu. O zaya e ngindu za Nzambi mu kuma kia vita, dilenda soba e ngindu zaku mu kuma kiandi. Avo u mosi muna awana bamona e mpasi za vita, nanga ovava zaya e mvutu za yuvu ilende: Nga Nzambi ovukumunanga wantu banwana e vita? Nga otokananga mu kuma kia mpasi zitwasanga e vita? Nga Nzambi meso kezimanga muna diambu diadi?

Olenda sivika mu zaya vo e mvutu za Nkand’a Nzambi zaswaswana ye mana wantu ayingi beyindulanga. Tuka kuna nz’ankulu yamu wau, e ngindu za Nzambi mu kuma kia vita ke zasoba ko. Yambula twafimpa Nkand’a Nzambi mu zaya una Nzambi kabadikilanga e vita kuna nz’ankulu ye muna tandu kiantete vava Yesu kakala ova ntoto. Ediadi dikutusadisa mu zaya una Nzambi kebadikilanga e vita o unu, dikutusadisa mpe mu zaya kana vo e vita zifokoka yovo ve.