O LUKAU LWA NTALU lukutufilanga mu vutula matondo. Yesu wasonga ziku kia diambu diadi, vava kawuka wantu 10 bakala ye kimbevo kia wazi, ke basasukanga ko mu mvu miayingi. Kansi mosi muna yau “ovutukidi, okembelele Nzambi muna nding’angolo.” Yesu wayuvula vo: “Nga ke kumi ko diveleleso e? Ozevo, evua akweyi bena?” (Luka 17:12-17) Nkia diambu tulongokele? Tulenda vilakana mu sazu o mambu mambote tuvangilwanga kwa akaka.

O lukûlu i lukau lusundidi. I lukau lusundidi e ntalu twavewa. Aweyi olenda songela luyangalalu lwaku muna dina Nzambi kavanga mu kuma kiaku?

• Zaya o Mvani a Lukau. O lukûlu ke luvananga moyo a mvu ya mvu kwa wantu awonso ko. Kadi muna sambu kiandi kwa Nzambi, Yesu wavova vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.” (Yoane 17:3) Avo muntu  uvovese vo vena yo muntu mosi wavuluza o moyo aku vava wakala mwana, nga kuvava zaya mayingi ko mu kuma kia muntu ndioyo ye ekuma kavuluzila o moyo aku? O Yave wa Nzambi, ona wakubika lukûlu muna vuluza mioyo mieto, ozolele vo watoma kunzaya kimana twakala ye ngwizani ambote yo yandi. Nkand’a Nzambi ukutuwondelelanga vo, “Nufinama Nzambi, oyandi mpe okunufinama.”—Yakobo 4:8.

• Kwikila muna lukûlu. “Ndiona okwikila muna Mwana, una yo moyo a mvu ya mvu.” (Yoane 3:36) Okwikila aweyi disongele? Disongele vo tufwete vanga diambu muna kwikila muna lukûlu. (Yakobo 2:17) Nkia diambu? O lukau muna kituka se lwaku, ofwete tamba moko yo tambula lo. Diau adimosi mpe, ofwete vanga ngolo kimana wavua nluta mia lukûlu. Adieyi ofwete vanga? Ofwete zaya nsiku mia Nzambi yo lemvokela mio muna zingu kiaku. * Sambanga kwa Nzambi kaloloka masumu maku ye kasadisa wakala ye ntona zavelela. Finama Nzambi ye vuvu kiasikila vo kuna sentu lukûlu lutwasa luvuvamu lwa kwele mvu ye mawete kwa awonso bekwikilanga muna lukûlu.—Ayibere 11:1.

• Wenda Muna Luyindulu lwa Lufwa lwa Yesu. Yesu wasikidisa e lumbu tufwete yindulanga e nkubika ya lukûlu konso mvu. Mu kuma kia luyindulu lwalu, Yesu wavova vo: “I wau wuwu nuvanganga muna luyindulu lwame.” (Luka 22:19) Mbangi za Yave beyindula lufwa lwa Yesu kina kia 11 kia Abidi mu mvu wa 2017, kunima ndimuk’a ntangwa. Lukutakanu lwalu ola mosi luvanganga, mufilwa longi disasila o mfunu wa lufwa lwa Yesu ye nsambu lutwasanga o unu ye zina tuvua kuna sentu. Muna mvu waviokele, tezo kia 20.000.000 dia wantu balungana muna Luyindulu lwa lufwa lwa Yesu. Tubokele wiza lungana yeto muna songa luyangalalu lwaku muna lukau lwampwena katuvana o Nzambi.