1 Korinto 1:1-31
1 Paulu, ona wasolwa se ntumw’a Kristu Yesu muna luzolo lwa Nzambi, yo Sosetene wa mpangi eto,
2 kuna kwa nkutakani a Nzambi ina momo Korinto, yeno nwavaulwa muna Kristu Yesu, nwasolwa se aveledi, ye awonso ana bevovelanga nkumbu a Mfumu eto, Yesu Kristu muna fulu yawonso, Mfumu au ye Mfumu eto mpe:
3 Yambula e nsambu ye luvuvamu lutuka kwa Nzambi wa Se dieto yo Mfumu eto Yesu Kristu lwakala yeno.
4 Ivutulanga matondo kwa Nzambi ame mu kuma kieno wau nwavewa nsambu za Nzambi muna Kristu Yesu;
5 e kuma kadi muna mambu mawonso i nuvuamisìnu muna yandi, muna ngangu za vova ye muna zayi wawonso,
6 wauna umbangi wa Kristu usikididi omu yeno,
7 kimana nwalembi kondwa konso lukau, ekolo nuvingilanga lusengomoko lwa Mfumu eto Yesu Kristu ye tima diawonso.
8 Okunusikidisa mpe yakuna nsuka, kimana nwakondwa tumbu muna lumbu kia Mfumu eto Yesu Kristu.
9 Nzambi nkwa kwikizi, wanubokela nwakala e ntwadi yo Mwan’andi, Yesu Kristu wa Mfumu eto.
10 Ampangi, inudodokele muna nkumbu a Mfumu eto Yesu Kristu vo, nuvova dimosi yeno awonso, ke vakadi mpambula ko vovo nwina, kansi nukala kaka nwayikana muna nyindu mosi ye lukanu lumosi.
11 Kadi, e mpangi zame, akaka muna nzo a Keleo bansamunwini vo, ntantani zina vovo nwina.
12 Edi nzolele vova vo, konso muntu vovo nwina ovovele vo: “Omono kwa Paulu mvuilu,” “Omono kwa Apolo,” “Omono kwa Kefa,”* “Omono kwa Kristu.”
13 Nga Kristu ovambuilu e? Nga Paulu wavondelwa vana nti mu kuma kieno e? Nga mu nkumbu a Paulu nwavubilwa?
14 Ntondele Nzambi wau yalembi vuba kana mosi vovo nwina, nanga Keresepo kaka yo Ngayo,
15 kimana valembi kala mosi ovova vo mu nkumbu ame nwavubilwa.
16 Elo, esi nzo a Setefana mono mpe yabavuba. Katula awaya, kizeye ko kana vena diaka yo muntu yavuba.
17 Kadi Kristu kantuma ko ngienda vubi, kansi yasamuna kaka e nsangu zambote; ke mu ngangu za vovela* ko, kimana o nti ampasi* a Kristu walembi vezua.
18 E diambu dia nti ampasi* i uzowa kw’awana bena muna nzil’a lufwasu, kansi kwa yeto twina muna nzil’a luvuluzu, i nkum’a Nzambi.
19 Kadi diasonama vo: “Sukisa nsukisa e ngangu z’akwa ngangu, bembola mbembola o lulungalalu lw’alungaladi.”
20 Nkwa ngangu, andieyi? O nsoneki,* andieyi? Mfidi a mpaka za tandu* kiaki, andieyi? Nga Nzambi kakitwidi e ngangu za nza ko se uzowa?
21 Kana una vo e nza muna ngangu zandi ke izayidi Nzambi ko, o Nzambi muna ngangu zandi wamona vo diambote kavuluza awana bekwikilanga muna uzowa wa nsangu zitelekwanga.
22 Kadi Ayuda balombele sinsu, Mingerekia bavavidi e ngangu;
23 kansi oyeto Kristu wavondelwa vana nti tusamunanga, kuna kwa Ayuda i sakuba, kansi kuna kwa esi zula* i uzowa.
24 Kansi kuna kw’awana babokelwa, Ayuda ye Mingerekia, Kristu i nkum’a Nzambi ye ngangu za Nzambi.
25 E kuma kadi, eki kibadikilwanga vo uzowa wa Nzambi kiviokele ngangu za wantu, eki kibadikilwanga vo lutovoko lwa Nzambi kiviokele ngolo za wantu.
26 Ampangi, nutala e mboka ina kanubokela, ke vena akwa ngangu ayingi ko muna kinitu,* yovo ayingi akwa nkuma ngatu ayingi bawutukila muna makanda ma tunda,
27 kansi Nzambi wasola lekwa ya uzowa ya nza, kafusulwisa akwa ngangu e nsoni; Nzambi wasola lekwa yatovoka ya nza, kafusulwisa lekwa yangolo e nsoni;
28 Nzambi wasola e lekwa ya nza yakondwa mfunu ye lekwa yavezwa, ye lekwa yalembi kala, kafwasa e lekwa ikalanga,
29 kimana ke vakadi muntu ko okuyisana vana ndose a Nzambi.
30 Kansi muna Nzambi i nwinina e ntwadi yo Kristu Yesu, ona utusengomwene ngangu za Nzambi, ndungidi, luveleleso yo lukûlu,
31 kimana diakala wauna wasonama vo: “Ndiona okuyisana, yambula kayisanina muna Yave.”
Mvovo vana yand'a lukaya
^ Oyikilwanga mpe vo Petelo.
^ Yovo “mvovo mia ngangu.”
^ Tala Nsas’a Mvovo.
^ TalaNsas’a Mvovo.
^ I sia vo, ndiona otomene zaya Nsiku.
^ Tala Nsas’a Mvovo.
^ Awana bena vo ke Ayuda ko.
^ Yovo “muna nkanikinu mia wantu.”
