1 Korinto 10:1-33
10 Ampangi, nzolele nwazaya wo vo mase meto, yau awonso kuna nsi a tuti bakala, yau awonso baviokela muna mbu,
2 yau awonso bavubilwa muna Mose, kuna nsi a tuti ye muna mbu,
3 yau awonso dia kwau kumosi kwa kimwanda badia,
4 yau awonso banua maza mamosi ma mwanda. Kadi banuina muna tadi dia mwanda dina diabalandanga, e tadi diadi i Kristu.
5 Kansi, ayingi muna yau Nzambi kabayangalela ko, bafwila muna makanga.
6 Mambu mama masonama se mbandu kwa yeto, kimana twalembi zola oma mambi wauna oyau bazolela mo.
7 Ke tusambidi teke ko nze una bavanga akaka muna yau; wauna wasonama vo: “O nkangu ufongele mu dia yo nua. I bosi, utelamene mu sakana.”
8 Ngatu tá zumba,* wauna akaka muna yau batela e zumba,* 23.000 bafwa muna lumbu kimosi.
9 Ke tutonti Yave ko, wauna akaka muna yau bantontela, batatikwa kwa nioka yo fwa.
10 Ke tuyidima ko, wauna akaka muna yau bayidima, bavondwa kwa mfwasi.
11 Mambu mama mababwila se mbandu, masonekwa muna kutulukisa, oyeto tulwakilu kwa nsuka za tandu.
12 Dianu vo, ndiona obenze vo telama katelamene, mbula katoma tala kalembi bwa.
13 Ke vena ntonta nutontwa ko ina yalembi luakila akaka. Kansi, Nzambi nkwa kwikizi, ke yambula ko vo nwatontwa e ntontwa ina ke nulendi zizidila ko, kansi kumosi ye ntonta, oteta mpe nzila kimana nwalenda yo zizidila.
14 Dianu vo, azolw’ame, nutina nsambila za teke.
15 Mpovele nze kuna kw’alungaladi; yeno kibeni nutoma fimpa dina mpovele.
16 E mbungw’a lusambulu ina tusambula, nga ke mu kala ntwadi ko muna menga ma Kristu e? E mbolo ina tubukuna, nga ke mu kala ntwadi ko muna nitu a Kristu e?
17 Kadi mbolo imosi kaka ina, oyeto mpe kana una vo ayingi twina, nitu mosi kaka, kadi yeto awonso mbolo imosi tudianga.
18 Nutala Isaele a kinitu: Awana bedianga yimenga, nga ke bena ntwadi ye ziku ko e?
19 Ozevo, adieyi mpova? E kimenga kia teke, nga má kiamfunu e? Yovo e teke má kiamfunu e?
20 Ve; kansi mpovele vo ina esi zula* bekelelanga yimenga, kwa nkuya bekelelanga yo, ke kwa Nzambi ko; kizolele ko vo oyeno nwakala e ntwadi ye nkuya.
21 Ke nulendi nua mbungw’a Yave ye mbungw’a nkuya ko; ke nulendi dila vana “meza ma Yave” ko ye vana meza ma nkuya.
22 ‘Nga Yave tumwesesa nsongo e’? Oyeto nga tunsundidi e ngolo e?
23 Mambu mawonso mansongi, kansi ke mawonso ko metwasanga nluta. Mambu mawonso mansongi, kansi ke mawonso ko mekumikanga.
24 Konso muntu kavavi wete wa yandi kibeni ko, kansi wete wa nkw’andi kaka.
25 Konso kina kitekwanga vana zandu dia mbizi nudia kweno, kansi ke nuyuvula ko mu kuma kia ntona zeno,
26 kadi “e nza ye yawonso ina mo, ya Yave.”
27 Avo mundembi-kwikila unubokelese nwenda dila kuna nzo andi, avo nuzolele wo, nudia konso ina kekunuvana, ke nuyuvula ko mu kuma kia ntona zeno.
28 Kansi avo muntu unuvovese vo, “Ekiaki kiakelelwa kimenga,” ke nudie ko mu kuma kia ndiona unuvovese wo ye mu kuma kia ntona.
29 Ke ntona zaku ko ngikidi, kansi za muntu ankaka. Ekuma luvevoko lwame lufundisilwa kwa ntona za muntu ankaka?
30 Avo ndidi yo vutula matondo kwa Nzambi, ekuma ivovelw’e mbi muna kina mvutulwidi matondo?
31 Dianu vo, kana nudia, kana nunua, konso mana nuvanga, nuvangila mawonso muna nkembo a Nzambi.
32 Ke nukadi sakuba ko kuna kwa Ayuda, Mingerekia ye muna nkutakani a Nzambi,
33 wauna omono ivavilanga yangidika wantu awonso muna mambu mawonso, kivavanga wete wa mono kibeni ko, kansi wete wa ndonga kaka, kimana bavuluzwa.
