1 Korinto 11:1-34
11 Nuntanginina, wauna omono itangininanga Kristu.
2 Inusanisini wau vo muna mambu mawonso nukunsungamenanga yo tatidila tusansu wauna yanuzayisila to.
3 Kansi, nzolele nwazaya wo vo, o ntu* a konso yakala i Kristu; o ntu* a nkento i yakala; o ntu a Kristu i Nzambi.
4 Konso yakala osamba yovo sakula yo ntu wafukwa, ntu* andi kefusulwis’e nsoni;
5 konso nkento osamba yovo sakula yo ntu walembi fukwa, ntu* andi kefusulwis’e nsoni, kadi diau adimosi kwandi yo tendwa luvanda.
6 Kadi o nkento avo kafukidi ntu andi ko, kafwete zengwa e nsuki; kansi avo diansoni kwa nkento kazengwa e nsuki yovo tendwa luvanda, kafwete fuka o ntu andi.
7 O yakala kafwete fuka ntu ko, kadi yandi i fwaniswa kia Nzambi yo nkembo andi, kansi o nkento i nkembo a yakala.
8 Kadi o yakala katuka mu nkento ko, kansi nkento i watuka muna yakala.
9 Vana ntandu, yakala kasemenwa mu kuma kia nkento ko, kansi o nkento mu kuma kia yakala.
10 Kiaki i kuma o nkento kafwete kadila ye dimbu kia lusakalalu kuna ntu andi mu kuma kia ambasi.
11 Mun’owu wa Mfumu, o nkento kavambuka muna yakala ko ngatu yakala kavambuka muna nkento.
12 Kadi wauna o nkento kasemenwa muna yakala, i una mpe o yakala kewutilwanga kwa nkento; kansi e lekwa yawonso kwa Nzambi yasemwa.
13 Yeno kibeni nufimpa edi: Nga diansongi kwa nkento mu samba kwa Nzambi yo ntu walembi fukwa?
14 Una twavangilwa, nga ke ukunulonganga ko vo diansoni kuna kwa yakala mu kala ye nsuki zandá,
15 kansi kuna kwa nkento e nsuki zandá i nkembo kuna kwa yandi e? E kuma kadi e nsuki zavewa kwa yandi se fukwa.
16 Kansi, avo muntu wazola fila mpaka mu landa fu kiankaka, ke tuna ye fu kiankaka ko, kana nkutu muna nkutakani za Nzambi.
17 Wau inukanikini omama, kinusanisini ko, e kuma kadi ke nulungalakananga muna wete ko, kansi muna bi kaka.
18 Ediantete, ngwidi vo vava nukalanga vamosi muna nkutakani, mpambani nukalanga zau; muna mankaka nkwikidi wo.
19 Kadi e mpambani kala zikala vovo nwina, kimana ana betondwa kwa Nzambi bazayakana.
20 Avo nukutakene vamosi, ke dilendakana ko mu dia Nlekelo a Mfumu una ufwene.
21 Kadi vava nudianga wo, akaka beteka kuyidilanga nlekelo* au, dianu vo ekolo mosi kena mu nzala, wankaka mu nkolwa.
22 Nga ke nwina ye nzo za dila yo nuina ko e? Yovo nkutakani a Nzambi nuvezanga yo mwesa nsoni awana ke bena ya má ko e? Adieyi ndenda kunuvovesa? Nga yanusanisina e? Kikunusanisina ko.
23 Kadi una yatambula kwa Mfumu, i wau mpe inusongele, muna fuku una kayekolwa o Mfumu Yesu, obongele mbolo,
24 una katondele, obukunwini yo, ovovele vo: “Eyayi nitu ame isunzulanga, ivewa mu kuma kieno. Nuvanganga wo muna luyindulu lwame.”
25 Diau dimosi kavanga ye kopo, vava bamanisa dia e nlekelo, ovovele vo: “E kopo diadi kangu diampa disunzulanga muna diambu dia menga mame. Nuvanganga wo, konso ntangwa nunua yo, muna luyindulu lwame.”
26 Kadi konso ntangwa nudia e mbolo yayi yo nua kopo diadi, lufwa lwa Mfumu nusamunanga, yavana kekwiza.
27 Dianu vo, konso ona odia e mbolo yovo nua e kopo dia Mfumu wau kalembele fwana, nkanu kenata muna nitu yo menga ma Mfumu.
28 O muntu kateka kuyifimpa kana vo wafwana, i bosi kedia e mbolo yo nua e kopo.
29 Kadi ndiona odidi yo nua, lembi bakula nsas’a nitu,* uyisidi muna mfundu.
30 Kiaki i kuma ayingi muna yeno batovokele yo yela, ndonga balele muna lufwa.*
31 Kansi avo tubakwidi owu twina, ke tufundiswa ko.
32 Kansi, vava tufundiswa, tulongwa kwa Yave kimana twalembi tumbwa kumosi ye nza.
33 Dianu vo ampangi, avo nulungalakene mu dia nlekelo, nuvingila akaka.
34 Avo muntu una ye nzala, yambula kadia kuna nzo, kimana nwalembi lungalakena muna mfundu. Vo i mana masidi isingika mo vava nkwiza.
Mvovo vana yand'a lukaya
^ I sia vo, mfumu.
^ I sia vo, mfumu.
^ I sia vo, mfumu.
^ I sia vo, mfumu.
^ I sia vo, madia ma nkokela.
^ I sia vo, nitu a Kristu.
^ O lwalu i lufwa lwa kimwanda.
