1 Korinto 12:1-31
12 Ampangi, muna diambu dia tukau twamwanda, kizolele ko vo nwakala ku bubu.
2 Nuzeye wo vo vava nwakala esi zula,* nwavilakeswanga kwa teke ke yivovanga ko yo kwenda konso kuna nwafilwanga.
3 Owau nzolele nwazaya wo vo ke vena muntu ko ovovelanga muna mwand’a Nzambi, kavova vo: “Yesu wasibwa!” ke vena mpe muntu ko olenda vova vo: “Yesu i Mfumu!” nanga muna mwand’avelela kaka.
4 Vena ye tukau twaswaswana, kansi mwanda wau umosi;
5 vena ye uselo waswaswana, kansi Mfumu yandi mosi;
6 vena ye salu yaswaswana, kansi Nzambi yandi mosi ona ovanganga mawonso muna awonso.
7 Kansi, o lusengomoko lwa mwanda, luvewanga kwa konso muntu muna wete dia akaka.
8 Kadi mosi oveno diambu* diangangu muna mwanda, wankaka mpov’a zayi muna mwanda wau mosi,
9 wankaka lukwikilu muna mwanda wau mosi, wankaka tukau twa nguka muna mwanda wau mosi,
10 kansi wankaka mavangu ma nkuma, wankaka sakula, wankaka umbakuzi wa mambu mavumunwinwa, wankaka ndinga zaswaswana ye wankaka nsekol’a ndinga.
11 Kansi mawonso mama, mwanda wau umosi uvanganga mo, uvananga kwa konso muntu mun’owu wa luzolo lwandi.
12 Kadi wauna e nitu mosi inina ye yîkwa yayingi, e yîkwa yawonso ya nitu yayina, kana una vo yayingi, i nitu mosi kaka, i wau wina mpe Kristu.
13 Kadi yeto awonso muna mwanda wau mosi twavubilwa yo kituka se nitu mosi, kana tu Ayuda, kana tu Mingerekia, kana tu abundu yovo avevoki, yeto awonso mwanda wau umosi twatambula.
14 Dianu vo, e nitu ke kîkwa kimosi ko, kansi yîkwa yayingi.
15 Avo kulu kuvovele vo, “Wau vo ki koko ko, ki kîkwa kia nitu ko,” muna diadi nga ke kîkwa kia nitu ko e?
16 Avo kutu kuvovele vo, “Wau vo ki disu ko, ki kîkwa kia nitu ko,” muna diadi nga ke kîkwa kia nitu ko e?
17 Kele vo e nitu yawonso yakala se disu, o kutu akweyi kwadi kala? Avo nitu yawonso yakala se kutu, o nzunu akweyi wadi kala?
18 Kansi owau, Nzambi osidi konso kîkwa kia nitu wauna kayangalele.
19 Kele vo yîkwa yawonso yakala se kîkwa kimosi, e nitu akweyi yadi kala?
20 Kansi owau e yîkwa yayingi, kansi nitu imosi kaka.
21 Disu ka dilendi vova kwa koko ko vo, “Kivuidi mfunu ko,” yovo ntu wavova kwa malu vo, “Kinuvuidi mfunu ko.”
22 Kansi, e yîkwa ya nitu ina ibadikilwanga nze yatovoka, mfunu ina,
23 e yîkwa ya nitu ina tubadikilanga vo yakondwa o zitu, i yau tutoma zitisanga, e yîkwa ina ke yatoma vienga ko, i yau tutoma viengesanga,
24 vo i yîkwa yeto yavienga ke ivuidi wo mfunu ko. Kansi, o Nzambi wavanga e nitu, wavana o zitu kwa yîkwa ina yakondwa o zitu,
25 kimana mwalembi kala mpambula muna nitu, kansi e yîkwa yandi yavuwaziana o mfunu.
26 Avo kîkwa kimosi kimwene mpasi, yîkwa yawonso imona mpasi kumosi; avo kîkwa kimosi kikembeso, yîkwa yawonso ikembela kumosi.
27 Oyeno nu nitu a Kristu, konso muntu muna yeno i kîkwa kimosi.
28 Nzambi watumbika ankaka muna nkutakani, kôsi, antumwa; kôle, angunza; tatu, alongi; i bosi mavangu mankuma; tukau twanguka; asadisi; ngangu za twadisa; ye ndinga zaswaswana.
29 Nga awonso antumw’e? Nga awonso angunza e? Nga awonso alongi e? Nga awonso bevanganga mavangu mankuma e?
30 Nga awonso akwa tukau twanguk’e? Nga awonso ndinga zaswaswana bevovang’e? Nga awonso asekodi e?
31 Dianu vo, nusiamanana vava* tukau twanene. Omono ikunusonga e nzila iviokele mawonso.
Mvovo vana yand'a lukaya
^ Awana bena vo ke Ayuda ko.
^ Yovo “nsangu.”
^ Yovo “nuvavanga kuna vema.”
