1 Korinto 13:1-13
-
Zola—i nzila isundidi (1-13)
13 Avo mpovele muna ndinga za wantu ye ndinga za mbasi kansi kina yo zola ko, ngina nze zú dia ngunga yovo zú dia kimbalu.*
2 Avo ngina yo lukau lwa sakula yo bakula e mbumb’avauka yawonso yo zayi wawonso, avo ngina yo lukwikilu lwawonso luna ndenda yalulwila miongo, kansi kina yo zola ko, i mpavala kwame.*
3 Avo ndikidi ankaka muna vua kwame kwawonso, avo ngiekwele moyo ame kimana yakisana, kansi kina yo zola ko, ke dikuntwasila nluta ko.
4 O zola kuna yo luzindalalu yo walakazi. O zola ke kwina ye kimpala ko. Ke kukuyisana ko, ke kukuyitundidika ko,
5 ke kuvanga mambu malembi songa ko, ke kuvava wete wa yandi kibeni ko, ke kufunga makasi mu nzaki ko. O zola ke kubadikanga mbi ko.
6 Ke kumwena vilwa kiese ko, kansi kumwena ludi e kiese.
7 Kuzizidila mawonso, kukwikila mawonso, kusila mawonso e vuvu, kuzindalela mawonso.
8 O zola ke kusuka nkutu ko. Avo vena ye tukau twasakula, suka tusuka; avo vena ye ndinga,* suka zisuka; avo vena yo zayi, suka usuka.
9 Kadi o zayi weto wa ndambu, e nsakul’eto mpe ya ndambu;
10 kansi vava kikwiza owu walunga, owu wa ndambu suka usuka.
11 Vava yakala kimwana-mwana, yavovanga nze kimwana-mwana, yayindulanga nze kimwana-mwana, yabadikanga nze kimwana-mwana; kansi wau nkitukidi se mbuta, ngiambwidi oma ma kimwana-mwana.
12 Kadi owau tumwenanga muna pelo ke kitoma mwesanga ko, kansi muna tandu kiakina, tutoma mona. Owau o zayi wame wa ndambu kaka, kansi muna tandu kiakina, o zayi wame walunga ukala, wauna o Nzambi kanzayidi.
13 Owau matatu mama masidi: lukwikilu, vuvu, zola; kansi edi disundidi i zola.
Mvovo vana yand'a lukaya
^ I sia vo, sikilu kia miziki.
^ Yovo “kina mfunu ko.”
^ I sia vo, masivi mavovela mu ndinga zankaka.
