1 Korinto 14:1-40
14 Nutatidila o zola, nusiamanana vava* tukau twa mwanda, musungula o sakula.
2 Ndiona ovovelanga muna ndinga zankaka, ke kwa wantu ko kevovanga, kansi kuna kwa Nzambi, kadi ke vena muntu ko owá, kansi mbumb’avauka kevovanga muna mwanda.
3 Kansi, ndiona osakula, okumika, okasakesa yo fiaulwisa wantu muna mvovo miandi.
4 Ndiona ovovela muna ndinga zankaka, okuyikumika, kansi ndiona osakula, nkutakani kekumika.
5 Yadi zola vo yeno awonso nwavovela muna ndinga zankaka, kansi nzolele vo nwasakula. Kadi ndiona osakula osundidi ndiona ovovela muna ndinga zankaka, nanga vo kasekola, kimana e nkutakani yakumikwa.
6 Owau ampangi, avo ngizidi kunuvovesela muna ndinga zankaka, nkia nluta dikunutwasila avo ndembele kunuvovesela muna lusengomono, muna zayi, muna ungunza yovo muna longi?
7 Diau adimosi ye lekwa yakondwa moyo ina ivaikisang’e zú, kana tutu yovo kokolo. Ovo ke iswaswanisw’e zú ko, aweyi kizayilwa kina kisikilu kana vo tutu yovo kokolo?
8 Kadi avo e mpungi ivaikisi e zú dialembi sikila, nani okubama muna vita?
9 Diau dimosi, avo nuvovele e mambu malembi bakulwa, aweyi wantu bezayila dina nuvovele? Dikala nze yeno nuvovele kwa tembwa.
10 Kana una vo ndinga zayingi zaswaswana zina ova nza, kansi ke vena imosi ko ikondelo e nsasa.
11 Kadi avo kibakwidi ko dina divovelo, ozevo i nzenza kuna kwa ndiona ovovele dio, oyandi mpe ovovele dio, nzenza kuna kwa mono.
12 Diau adimosi mpe kwa yeno, wau nwina ye tima dia tambula tukau twa mwanda, nuvava wokesa tukau tuna tukumika e nkutakani.
13 Dianu vo, ndiona ovovela muna ndinga zankaka, yambula kasamba kimana kasekola zo.
14 Kadi, avo nsambidi muna ndinga zankaka, muna kuma kia lukau lwa mwand’avelela nsambidi, kansi kibakwila kio nsasa ko.
15 Ozevo, adieyi mvanga? Isamba muna lukau lwa mwand’avelela ntambwidi, e sambu mpe kina nsamba ibakwila kio e nsasa. Nyimbila nkunga muna lukau lwa mwand’avelela ntambwidi, nyimbila mpe nkunga una ibakwila e nsasa.
16 Avo ke wau ko, avo ovutwidi matondo muna lukau lwa mwanda, o muntu walembi longwa vovo nwina aweyi kevovela “Amen” muna sambu kiaku kia matondo wau kalembele bakula dina ovovele?
17 Kieleka, ovutwidi matondo mu mpila yambote, kansi muntu ndioyo kakumikinu ko.
18 Ntondele Nzambi wau nsundidi yeno awonso ovovela muna ndinga zankaka.
19 Kansi, diambote yavova mambu matanu malenda bakulwa muna nkutakani, kimana yalonga ankaka, ke mu vova mafunda kumi ma mambu ko muna ndinga zankaka.
20 Ampangi, ke nukadi yingiana-ngiana ko muna umbakuzi, kansi nukala se yingiana-ngiana muna mbi; nuzikuka muna umbakuzi.
21 Muna Nsiku mwasonama vo: “‘Mvovesela nkangu wau muna ndinga za nzenza ye muna nua mia nzenza, kana una vo ke ukungwila ko,’ u kavovele Yave.”
22 Dianu vo, ovova ndinga zankaka ke sinsu kia minkwikizi ko, kia mindembi-kwikila kaka, kansi osakula ke kwa mindembi-kwikila ko, kwa minkwikizi kaka.
23 Ozevo, e nkutakani yawonso avo ilungalakene vamosi yo vovela muna ndinga zankaka, i bosi vakota wantu balembi longwa yovo mindembi-kwikila, nga ke bevova ko vo nulaukidi e?
24 Kansi, avo yeno awonso nusakwidi, vakota muntu walembi longwa yovo mundembi-kwikila, oyeleswa yo toma fimpwa kw’awonso.
25 E mbumba za ntim’andi zisengomoka, dianu vo obukika e ndose andi yo kunda Nzambi yo vova vo: “Nzambi wina kieleka vovo nwina.”
26 Ampangi, adieyi nuvanga? Vava nukutakananga, omosi oyimbila nkunga, wankaka una ye longi, wankaka una ye lusengomono, wankaka ovovela muna ndinga yankaka ye wankaka nsekodi. Yambula mawonso mavangamena muna kumika.
27 Avo wantu bevovela muna ndinga yankaka, ke bavioki tezo kia wantu wole ko yovo atatu, bavova mosi-mosi, vafwete kala mpe ye nsekodi.
28 Kansi, avo ke vena nsekodi ko, bafwete kala e pi-i muna nkutakani yo vova kwa Nzambi muna ntima.
29 Yambula ngunza zole yovo zitatu zavova, akaka bavava zaya e nsasa.
30 Kansi avo muntu akaka omwene mona-meso ekolo kavuende vovo, ndiona ovovanga yambula kabutama.
31 Kadi yeno awonso nulenda sakula mosi-mosi, kimana awonso balongoka yo kasakeswa.
32 Tukau twa mwanda twa angunza tufwete sadilwa ye volo kwa angunza.
33 Kadi o Nzambi, ke Nzambi a mvuanga ko, wa luvuvamu kaka.
Wauna wina muna nkutakani zawonso z’aveledi,
34 yambula akento bakala kaka e pi-i muna nkutakani, kadi ke bena yo nswa wa vova ko. Kansi, yambula basonga lusakalalu wauna uvovele o Nsiku.
35 Avo diambu bazolele zaya, bafwete yuvula kwa akazi au kuna nzo, kadi diansoni kwa nkento kavova muna nkutakani.
36 Nga diambu dia Nzambi kwa yeno diatuka yovo kwa yeno kaka diayiza?
37 Avo muntu okuyibadikila vo ngunza yovo mwanda katambwidi, kafwete zaya vo oma inusonekene i nkanikinu a Mfumu.
38 Kansi avo muntu kazolele bakula diambu diadi ko, ku bubu kaka kekala.
39 Dianu vo ampangi, nusiamanana o sakula, kansi ke nusimi vovela muna ndinga zankaka ko.
40 Mambu mawonso yambula mavangamena muna unsongi ye muna mpila yambote.*
