1 Korinto 15:1-58
15 Ampangi, inususumwini, e nsangu zambote zina yanusamunwina, zina nwatambula mpe, i zina nusikididi.
2 Avo nusimbinini e nsangu zambote yanusamunwina, i zina nuvuluzilwa, avo ke wau ko, mu nkatu nukwikididi.
3 Kadi mana yateka kunuzayisa i mau mpe yatambula, i sia vo, Kristu wafwila muna masumu meto, wauna uyikwanga muna Sono;
4 waziama, kansi wafulwa muna lumbu kietatu wauna uyikwanga muna Sono;
5 wamoneka kwa Kefa,* i bosi kwa yau Kumi ye Zole.
6 I bosi wamoneka kw’ampangi vioka 500 mu nkumbu mosi, ayingi muna yau bakinu yeto, akaka balele kala muna lufwa.
7 Wamoneka kwa Yakobo, i bosi kwa ntumwa zawonso.
8 Kansi kuna kwalanda, wamoneka mpe kwa mono yawutuka se nsulu.
9 Kadi, mono i wandwelo vana vena antumwa, kiafwana yikilwa ntumwa ko, wau vo nkutakani a Nzambi yabangika.
10 Kansi muna nsambu za Nzambi i nginina owu ngina. E nsambu zazi ke zankatu ko kwa mono, kadi ifuntukanga lutila yau awonso; ke mono kwame ko, kansi nsambu za Nzambi kaka zina omu mono.
11 Ozevo, kana mono yovo yau, i wau tusamunanga, i wau mpe nwakwikidila.
12 Avo disamunwanga vo Kristu wafulwa muna mafwa, aweyi ankaka vovo nwina bevovelanga vo ke vena lufuluku lwa mafwa ko?
13 Avo ke vena lufuluku lwa mafwa ko, ozevo, Kristu kafuluka ko.
14 Kansi, o Kristu avo kafuluka ko, e salu kieto kia umbangi kiankatu, o lukwikilu lweno mpe lwankatu.
15 Ozevo, oyeto mpe tusolokele vo tu mbangi zaluvunu za Nzambi wau tuvovanga vo yandi wafula Kristu ona kafula ko, avo mafwa ke mefuluka nkutu ko.
16 Kadi avo mafwa ke mefulwa ko, o Kristu mpe kafulwa ko.
17 Vana ntandu, avo Kristu kafulwa ko, o lukwikilu lweno lwankatu; nwakinu mpe muna masumu meno.
18 Ozevo, awana mpe balele kala muna lufwa muna Kristu, bafwa e mvimba.
19 Avo mu zingu kiaki kaka tunina ye vuvu muna Kristu, ozevo, tuviokele awonso okendalala.
20 Kansi owau Kristu wafulwa muna mafwa, yandi i ntomoni* muna awana balele kala muna lufwa.
21 Kadi wauna o lufwa lwayizila muna muntu mosi, o lufuluku lwa mafwa muna muntu mosi mpe lwayizila.
22 Wauna wantu awonso befwilanga muna Adami, awonso muna Kristu mpe i bevuila moyo.
23 Kansi, konso muntu muna kamba kiandi: Kristu i ntomoni,* i bosi awana bavuilu kwa Kristu muna ngiz’andi.
24 I bosi, kuna mbaninu, otambika Kintinu kuna kwa Nzambi andi yo Se, wau kefukisa tuyalu twawonso, ye wisa yawonso ye nkuma,
25 kadi kafwete yala se ntinu yavana Nzambi kesia mbeni zawonso kuna nsi a tambi yandi.
26 O lufwa luna vo i mbeni a nsuka, lufukiswa e mvimba.
27 Kadi o Nzambi “wasakidika lekwa yawonso kuna nsi a tambi yandi.” Kansi wau kavovele vo ‘lekwa yawonso yasakidikwa,’ ediadi ke diyikanga Nzambi ko ona wansakidikila lekwa yawonso.
28 Kansi vava lekwa yawonso isakidikwa kwa yandi, o Mwana yandi kibeni okuyisakidika mpe kwa Nzambi, ona wansakidikila lekwa yawonso, kimana o Nzambi kakala mawonso muna awonso.
29 Ozevo, adieyi bevanga awana bevubwanga ye kani dia fwa? Avo mafwa ke mefuluka ko, ekuma bevubilwanga ye kani dia fwa?
30 Ekuma tukadilanga mu vonza ntangwa zawonso?
31 Lumbu ke lumbu ilwakilwanga kwa vonza kia lufwa. Kiaki i ziku kia lusanu lwame muna yeno ampangi, i lusanu lwame mpe muna Kristu Yesu wa Mfumu eto.
32 Avo yanwana ye bulu yamfuta kuna Efeso nze wantu akaka,* nkia mfunu dina kwa mono? Avo mafwa ke mefuluka ko, “yambula twadia yo nua, kadi o mbazi fwa tufwa.”
33 Ke nuvunginikwa ko. E yikundi yambi fu yambote ifwasanga.
34 Nuvunguka e ngindu muna vanga unsongi yo lembi sumuka, kadi akaka ke bena yo zayi wa Nzambi ko. Mpovele wo kimana nwamona e nsoni.
35 Kansi, wankaka olenda yuvula: “Mafwa aweyi mefulukila? Nkia mpila nitu befuluka yau?”
36 U zowa kwaku! Kina okunini ke kimena ko, avo ke kitekele fwa ko.
37 Kina okunini mpe, kukunini kio kiakola ko, kansi lunginga kaka, kiakala lwa masa yovo mbongo ankaka;
38 kansi Nzambi ovana kio e nitu konso una kazolele, konso mbongo ovana yo nitu andi.
39 E nitu zawonso ke zafwanana ko, e nitu a muntu yankaka, e nitu a ngombe yankaka, e nitu a nuni yankaka, e nitu a mbizi a maza yankaka.
40 Vena ye nitu ya zulu ye nitu ya nza; kansi o nkembo* a nitu ya zulu wankaka, o nkembo a nitu ya nza waswaswana mpe.
41 O nkembo* wa ntangwa wankaka, o nkembo wa ngonde wankaka, o nkembo wa ntetembwa mpe wankaka; konso ntetembwa yaswaswana muna nkembo.
42 Diau adimosi mpe yo lufuluku lwa mafwa. E nitu ikuninu muna uwolezia; ifulukila muna nitu ilembi wola.
43 Ikuninu muna luvezo; ifulukila muna nkembo. Ikuninu muna lutovoko; ifulukila muna nkuma.
44 Ikuninu nitu a kinsuni; ifuluka nitu a kimwanda. Avo vena ye nitu a kinsuni, vena mpe ye nitu a kimwanda.
45 Diasonama vo: “O muntu antete, Adami, wakituka se muntu amoyo.” Adami wansuka wakituka se mwanda uvananga moyo.
46 Kansi, e nitu a kimwanda ke yau ko i yantete. Nitu a kinsuni kaka, i bosi eyi ya kimwanda.
47 O muntu antete mu ntoto katuka, mu mbundukutu kavangilwa; o muntu anzole ku zulu katuka.
48 Owu wina ndiona wavangilwa muna mbundukutu, i wina mpe awana bavangilwa muna mbundukutu; owu wina ndiona watuka kuna zulu, i wina mpe awana bena kuna zulu.
49 Wauna twanatina e mpw’a ndiona wavangilwa muna mbundukutu, i una mpe tunatina e mpw’a ndiona watuka kuna zulu.
50 Ampangi, owu mpovele vo e nitu yo menga ke malendi vua Kintinu kia Nzambi ko, ngatu nitu iwolanga yavua nitu ilembi wola.
51 Tala! Mbumb’avauka ikunuzayisa: Ke yeto awonso ko tuleka muna lufwa, kitulwa kaka tukitulwa,
52 vana vau, muna ndab’a meso, vava kisikwa mpungi yansuka. Kadi mpungi vava isikwa, o mafwa mefuluka muna nitu ilembi wola, oyeto kitulwa tukitulwa.
53 Kadi nitu iwolanga ivuata nitu ilembi wola, eyi ifwanga ivuata eyi ilembi fwa.
54 Kansi, e nitu iwolanga vava ivuata nitu ilembi wola, eyi ifwanga vava ivuata eyi ilembi fwa, ozevo edi diasonama dilungana: “E lufwa lusukisu yakwele mvu.”
55 “E lufwa, e nsund’aku ayeyi? E lufwa, o manga* aku aweyi?”
56 O mang’a* lufwa i sumu, o nkum’a sumu i Nsiku.*
57 Kansi, tutondele Nzambi, kadi utuvene nsundidi muna Mfumu eto Yesu Kristu!
58 Dianu vo, e mpangi zame za nzolwa, nusikila, nukala ngingi, nuwokesa kaka e salu kia Mfumu ntangwa zawonso, wau nuzeye wo vo e salu kieno ke kiankatu ko muna Mfumu.
Mvovo vana yand'a lukaya
^ Oyikilwanga mpe vo Petelo.
^ I sia vo, wantete.
^ I sia vo, wantete.
^ Dilenda kala vo, “muna nyindu a kiwuntu.”
^ Yovo “wete.”
^ Yovo “wete.”
^ I sia vo, nkuma.
^ I sia vo, nkuma.
^ Yovo “Nsiku uvene nkum’andi kwa sumu.”
