1 Korinto 16:1-24
16 Vo i diambu dia kuba e nzimbu mu kuma kia aveledi, nulanda luludiku yavana muna nkutakani za Ngalatia.
2 Muna lumbu kiantete kia konso lumingu, konso muntu kafwete lunda má mun’owu wa mbakilu zandi, kimana valembi kala nkubidi-nkubidi vava ikwiza.
3 Kansi, vava iluaka, konso ana nutonda muna nkanda, i yau ituma banata lukau lweno lwa mvevo kuna Yerusaleme.
4 Avo diansongi vo omono mpe ngienda ko, bekwenda yame.
5 Kansi, se ngiza kwa yeno vava iviokela muna Makedonia, kadi muna Makedonia iviokela;
6 nanga se kala yeno yovo nanga yeno muna nsungi a kiozi, kimana nwenda kunsindika konso kuna ikwenda.
7 Kadi kizolele vioka kaka ko vava imonana yeno, nzolele vo yakala yeno mu fikolo, ovo Yave ozola.
8 Kansi, yakinu kwaku Efeso yamu Nkinzi a Pentekoste,
9 kadi mwelo ampwena a salu unziukidi, kansi atantu mpe ayingi.
10 Avo Timoteo olueke, nutoma tala kalembi kala ye wonga vovo nwina, kadi salu kia Yave kesalanga, nze i mono.
11 Dianu vo, ke vakadi muntu ko okumveza. Nunsindikila kuna luvuvamu, kimana keza kwa mono, kadi yandi ivingilanga kumosi ye ampangi.
12 Vo i Apolo wa mpangi eto, indodokele vo keza kwa yeno kumosi ye ampangi, kana una vo kena ye kani dia kwiza owau ko, kansi okwiza vava kekala ye ntangwa.
13 Nuyingila, nusikila muna lukwikilu, nukala yo unkabu,* nukumama.
14 Yambula mambu meno mawonso mavangamena muna zola.
15 Inudodokele ampangi: Nuzeye wo vo esi nzo a Setefana i alongoki antete muna Akaya, bayivana e mvimba muna sadila aveledi.
16 Nusakalela mpe wantu a mpila yayi ye awonso beyikamanga e salu yo funtuka.
17 Ngiangalele muna ngiz’a Setefana, Fotunato yo Akayiko, kadi bansadisi kikilu wau ke nuna yame ko.
18 Bavuvikidi o ntima* ame ye mieno mpe. Dianu vo, nusungamenanga wantu a mpila yayi.
19 E nkutakani za Asia zinutumini mavimpi. Akila yo Pereseka banutumini mavimpi muna Mfumu ye nkutakani ina muna nzo au.
20 Mpangi zawonso banutumini mavimpi. Nukayisa muntu yo nkw’andi ye mfiba avelela.
21 I mavimpi mame mama, muna koko kwame, mono Paulu.
22 Avo muntu kena yo zola ko muna Mfumu, yambula kakala muntu asibwa. E Mfumu eto, wiza!
23 E nsambu za Mfumu Yesu zakala yeno.
24 O zola kwame kwakala kwa yeno awonso muna Kristu Yesu.
