1 Korinto 2:1-16
2 Dianu vo ampangi, omono vava yayiza kwa yeno, kiasadila mpova yasivikisa ko ngatu ngangu zame wau yanusamunwina e mbumb’avauka ya Nzambi.
2 Kadi yabaka nzengo zalembi sia sungididi mu diambu diankaka vovo nwina, Yesu Kristu kaka, yandi wavondelwa vana nti.
3 Omono yayizila kwa yeno muna lutovoko, muna wonga ye muna zakamu diayingi;
4 e mpov’ame ye mana yalonga ke mu mvovo mia ngangu za kunuleba ko, kansi muna mwanda kaka ye nkuma,
5 kimana o lukwikilu lweno lwalembi kala muna ngangu za wantu, kansi muna nkum’a Nzambi.
6 Owau tuvovele e ngangu vana vena awana bazikuka, ke ngangu za tandu* kiaki ko ngatu ngangu za ayadi a tandu kiaki, awana befwaswa.
7 Kansi tuvovele ngangu za Nzambi muna mbumb’avauka, ngangu zaswekama, zina kateka kana o Nzambi muna nkembo eto, una ke kiakedi tandu* ko.
8 E ngangu zazi, ke vena nyadi a tandu* kiaki ko ozeye zo, kadi kele vo bazaya zo, nga ke bavonda Mfumu a nkembo ko.*
9 Kansi wauna wasonama vo: “E disu ke dimoni, o kutu ke kuwe, ngatu kota muna ntim’a muntu o mambu mana Nzambi kakubikila awana bekunzolanga.”
10 Kadi o Nzambi kwa yeto kasengomona mo muna mwand’andi, kadi o mwanda usatanga mambu mawonso, kana nkutu oma masina ma Nzambi.
11 Nani vana vena wantu ozeye mambu ma muntu avo ke mwanda* una muna yandi kibeni ko e? Diau adimosi mpe, ke mosi ko ozeye oma ma Nzambi, mwand’a Nzambi kaka.
12 Oyeto ke tutambwidi mwand’a nza ko, kansi mwand’a Nzambi kaka, kimana twazaya mana twavewa kwa Nzambi kuna mvevo.
13 Mambu mama mpe tuvovanga, ke mu mvovo twalongwa muna ngangu za wantu ko, kansi mu mana twalongwa kwa mwanda, wau tusasilanga mambu ma mwanda muna lusadisu lwa mwand’avelela.
14 Kansi, o nkwa kinitu ke tambulanga mambu ma mwand’a Nzambi ko, kadi ma uzowa kuna kwa yandi; kalendi mo zaya ko, e kuma kadi muna mwanda mesatilwanga.
15 Kansi, nkwa kimwanda osatanga mawonso, kansi yandi kibeni ke satwanga kwa muntu ko.
16 “Nani ozeye nyindu a Yave, kimana kanlonga?” Kansi oyeto tuna yo nyindu a Kristu.
Mvovo vana yand'a lukaya
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Yovo “ke bavondela Mfumu a nkembo ko vana nti.”
^ I sia vo, ntima.
