1 Korinto 3:1-23
3 Dianu vo, ampangi, kialenda kunuvovesela nze akwa kimwanda ko, kansi nze akwa kinitu kaka, nze yingiana-ngiana muna Kristu.
2 Kimvumina yanunwika, ke madia mangolo ko, kadi ke nulenda mo dia ko. Kana nkutu owau ke nulenda mo dia ko,
3 kadi nwakinu akwa kinitu. Wau vo vovo nwina vena ye kimpala ye ntantani, nga ke nu akwa kinitu ko yo kangalela nze wantu a nza?
4 Kadi vava mosi kevovanga vo, “Omono kwa Paulu mvuilu,” wankaka vo, “Omono kwa Apolo,” ke ma mpasi wantu ko nuvangang’e?
5 Ozevo, Apolo i nani? Elo, Paulu i nani? I mpasi selo, muna yau nwakwikidila, wauna Mfumu kavana kwa konso muntu.
6 Omono yakuna, Apolo wayitila maza, kansi Nzambi kaka wakolesa yo,
7 i dianu vo, ona wakuna ye ndiona wayitila maza mpavala, kansi Nzambi kaka wakolesa yo.
8 Ndiona wakuna ye ndiona wayitila maza yau amosi,* kansi konso muntu otambula nsendo mun’owu wa salu kiandi.
9 Kadi tu asadi kumosi yo Nzambi. Oyeno nu mpatu a Nzambi eyi ikunwanga, nu nzo a Nzambi.
10 Mun’owu wa nsambu za Nzambi zina yavewa, nze ntungi a ngangu,* yakuba e nkubilwa, kansi wankaka otungilanga vo. Konso muntu yambula katoma tala una ketungilanga vo.
11 Kadi ke vena muntu ko olenda kuba e nkubilwa ankaka avo ke ina yakubwa ko, i sia vo, Yesu Kristu.
12 Avo muntu otungidi vana nkubilwa, wolo, palata, matadi mantalu, nti, nianga yovo titi,
13 e salu kia konso muntu kisengomonwa muna lumbu kia lutonto, kadi e tiya tusenzeka mawonso, tusonga mpe una wina e salu kia konso muntu.
14 Avo tiya ke tubomwene ko e salu kia muntu vana nkubilwa, nsendo ketambula;
15 avo salu kia muntu kibomokene, mfwilu kebaka, kansi yandi kibeni vuluka kevuluka; elo, okala nze muntu ovulukidi va tiya.
16 Nga ke nuzeye wo ko vo oyeno nu tempelo a Nzambi, o mwand’a Nzambi omo yeno ukalanga e?
17 Avo muntu ofwasidi tempelo a Nzambi, o Nzambi okumfwasa; kadi e tempelo a Nzambi yavauka, oyeno nu tempelo yayi.
18 Ke vakadi muntu okuyivunginika ko: Avo muntu vovo nwina obenze vo nkwa ngangu omu tandu* kiaki, yambula kakituka se zowa, kimana kakala se nkwa ngangu.
19 E ngangu za nza yayi i uzowa kuna kwa Nzambi, kadi diasonama vo: “Obakilanga akwa ngangu muna umpuki wau.”
20 Diasonama diaka vo, “Yave ozeye wo vo e makani ma akwa ngangu ke mena mfunu ko.”
21 Dianu vo, ke vakadi muntu ko okuyisanina muna wantu; kadi yawonso i yeno,
22 kana Paulu, kana Apolo, yovo Kefa* kana nza, kana zingu, kana lufwa, kana lekwa ina owau yovo ina ikwiza, yawonso kwa yeno ivuilu;
23 kansi oyeno kwa Kristu nuvuilu; vo i Kristu, kwa Nzambi kavuilu.
Mvovo vana yand'a lukaya
^ Yovo “kani dimosi bena diau.”
^ Yovo “mfumu a salu wa nkwa ngangu.”
^ Tala Nsas’a Mvovo.
^ Oyikilwanga mpe vo Petelo.
