1 Korinto 4:1-21
4 O wantu bafwete kutubadikila vo tu ntaudi za Kristu ye selo ya mbumb’avauka a Nzambi.
2 Muna kuma kiaki, divavuanga kwa selo vo bawanuka ye kwikizi.
3 Kuna kwa mono, diambu diakete kwandi avo mfundisu kwa yeno yovo kuna mbazi a nkanu. Mono kibeni kikuyifundisanga nkutu ko.
4 Kadi kimwene diambu diambi ko omu mono. Kansi, muna diadi kiyilungisi ko; kadi Yave kaka i mfundisi ame.
5 Dianu vo, ke nuviti fundisa diambu ko yavana kekwiza o Mfumu. Ominika oma maswekama ma tombe yo sengomona makani ma ntima, konso muntu otambula lusanisinu lwandi kwa Nzambi.
6 Ampangi, muna wete dieno i ngikidi mambu mama mu kuma kia mono kibeni yo Apolo, kimana muna yeto nwalongoka nkanikinu owu: “Ke nulutakana mana masonama ko,” nwalembi kuyitundidika yo badikila mosi vo osundidi nkw’andi.
7 Nani usidi nswaswani ye ankaka? Nkia má wina kiau kina walembi tambula? Avo tambula watambula kio, ekuma okuyisanina nze kiau olembele tambula?
8 Nga nuyukwiti kal’e? Nga nwavuama kal’e? Oyeno nwayadidi kala, oyeto nkatu e? Yadi zola vo nwayantika kala oyala kimana oyeto mpe twayala yeno.
9 Kadi edi mbwene vo yeto antumwa, o Nzambi wasukinina kutuvaikisa muna kimpa, nze wantu bazengelwa tumbu kia lufwa, e kuma kadi tukitukidi se kimpa kitalwanga kuna kwa nza, kuna kw’ambasi yo wantu.
10 Oyeto tu mazowa muna diambu dia Kristu, kansi oyeno nu alungaladi muna Kristu; oyeto tu atovoki, kansi oyeno nwakumama; oyeno nuzitisu, kansi oyeto tuvezelo.
11 Yamu wau, nzala tufwa, vuina tumona, nkonga twina, wandwa tuwandwanga, ke tuna ye nzo ko,
12 tufuntukanga ye salu yo sadila muna moko meto. Avo tulevolwa, tusambula kaka; avo tubangikwa, tuzizidila kaka;
13 avo tuvovelwa e mbi, tuvutula kuna lulembamu;* tukitukidi se titi* ye fuku dia mvindu ya nza yawonso, yamu wau.
14 Inusonekene mambu mama, ke mu kunufusulwisa nsoni ko, kansi mu kunulukisa nze wan’ame anzolwa.
15 Kana una vo luna ye 10.000 ma akengi* muna Kristu, ke luna ye mase mayingi ko; kadi nkitukidi se dieno muna Kristu Yesu muna diambu dia nsangu zambote.
16 Dianu inudodokele vo, nuntanginina.
17 Kiaki i kuma inutumini Timoteo wa mwan’ame anzolwa ye nkwa kwikizi muna Mfumu. Okunusungamesa ndekwa zame* muna Kristu Yesu, wauna nlongelanga muna fulu yawonso ye muna nkutakani zawonsono.
18 Ankaka bazala ye lulendo vika sia vo kikwiza kwa yeno ko.
19 Kansi, ke kolo ko se ngiza kwa yeno, avo i luzolo lwa Yave, ke mu kwiza zaya e mvovo mi’awana bazala ye lulendo ko, kansi nkum’au.
20 Kadi e Kintinu kia Nzambi ke kisongelwanga muna mvovo ko, kansi muna nkum’a Nzambi kaka.
21 Adieyi nuzolele? Ngiza kwa yeno yo lubamba yovo muna zola ye mwand’a lulembamu e?
Mvovo vana yand'a lukaya
^ Sina, “tuwondelela.”
^ Yovo “mbole.”
^ Yovo “alongi.”
^ Sina, “nzila zame.”
