1 Korinto 5:1-13
5 Kieleka, ngwidi vo zumba* kina vovo nwina, e zumba* kina ke kiakedi nkutu ko vana vena esi zula*—muntu olekanga* nkaz’a se diandi.
2 Nga nuyisanini muna diambu diadi e? Ke ntantu ko nwadi mona kimana ndiona ovangidi dio kakatulwa vovo nwina?
3 Kana una vo kina yeno ko muna nitu, ngina yeno muna mwanda, dianu vo, mfundisi kala ona ovangidi e diambu diadi, nze mono ngina yeno.
4 Avo nukutakene muna nkumbu a Mfumu eto Yesu, yo zaya wo vo ngina yeno mpe muna mwanda yo nkum’a Mfumu eto Yesu,
5 nufwete yekola muntu ndioyo kwa Satana muna lufwasu lwa nitu,* kimana o mwanda* wavuluzwa muna lumbu kia Mfumu.
6 O lusanu lweno ke lwambote ko. Nga ke nuzeye wo ko vo e mfuna andwelo ifunisa mbumba wawonso e?
7 Nukatula e mfuna ankulu, kimana nwakala se mbumba wampa, wau vo ke luna ye mfuna ko.* Kadi Kristu wa meme dieto dia Nduta, wakelwa kala.
8 Dianu vo, yambula twadia e lambu, ke mu mfuna ankulu ko ngatu mu mfuna a umpumbulu ye mbi, kansi mu mbolo zakondwa mfuna, zakwikizi ye ludi.
9 Muna nkand’ame yanusonekena vo nuyambula kala kikundi ye minta-zumba,*
10 ke disongele ko vo minta-zumba* mia nza yayi yovo akwa loko yovo mivi ngatu asambidi a teke. Avo i wau, katuka nwadi katuka ova nza.
11 Kansi owau inusonekene vo nwayambula kala kikundi ye konso muntu oyikilwanga vo mpangi una vo munta-zumba* yovo nkwa loko yovo nsambidi a teke yovo nkwa malevo yovo nduvu a malavu ngatu mwivi, ke nudie yandi nkutu ko.
12 Nga diambu diame edi diafundisa awana bena kuna mbazi e? Ekuma nulembi fundisila awana bena muna kati,
13 wau vo Nzambi ofundisanga awana bena kuna mbazi e? “Nukatula o muntu a mbi vovo nwina.”
Mvovo vana yand'a lukaya
^ Muna Kingerekia, por·neiʹa. Tala Nsas’a Mvovo.
^ Muna Kingerekia, por·neiʹa. Tala Nsas’a Mvovo.
^ Awana bena vo ke Ayuda ko.
^ Sina, “ovuidi.”
^ Yovo “fwasa vangu diambi.”
^ Yovo “mwand’a nkutakani.”
^ Sina, “ke nwafuniswa ko.”
^ Tala Nsas’a Mvovo, “Zumba.”
^ Tala Nsas’a Mvovo, “Zumba.”
^ Tala Nsas’a Mvovo, “Zumba.”
