1 Korinto 6:1-20
6 Nga vena yo muntu vovo nwina obakanene diambu yo nkw’andi, okala yo unkabu wakwenda kumfunda kuna mbazi a nkanu kuna kwa avilwa, ke kwa aveledi ko e?
2 Nga ke nuzeye wo ko vo aveledi yau befundisa e nza? Wau vo yeno nufundis’e nza, nga ke nulenda fundisa yimambu-mambu yeno ko e?
3 Nga ke nuzeye wo ko vo ambasi tusinga fundis’e? Ozevo, ekuma ke nulendi fundisila mambu ma zingu kiaki ko e?
4 Avo mfundu wa mambu ma zingu kiaki nuna wau, nga nukwenda kw’afundisi ana ke betondwanga ko kwa nkutakani e?
5 Mpovele wo muna kunufusulwisa e nsoni. Nga vovo nwina ke vena nkwa ngangu ko wafwana zenga mambu vana vena mpangi zandi e?
6 Ekuma mpangi kefundilanga mpangi andi kuna mbazi a nkanu, vana vena mindembi-kwikila e?
7 Ozevo, diambu diambi kikilu nuna diau, wau nufundaziananga kuna mbazi a nkanu. Ekuma nulembele tambulwila e ngielele? Ekuma nulembele yambulwila vo banuyiya?
8 Kansi, oyeno nuvangang’e mbi yo yiya ankaka, ye mpangi zeno nkutu.
9 Nga ke nuzeye wo ko vo avilwa ke bevua Kintinu kia Nzambi ko e? Ke nuvunginikwa ko. Akwa mvukana za usafu, asambidi a teke, minta-zumba,* akala beyambulanga vo balekwa nze akento, akala belekananga ye akw’au akala,
10 mivi, akwa loko, nduvu za malavu, akwa luvezo ye mindia-nzimbu zangani ke bevua Kintinu kia Nzambi ko.
11 Akaka muna yeno i wau nwakala. Kansi nwasukulwa; nwaveleleswa yo lungiswa muna nkumbu a Mfumu eto Yesu Kristu ye muna mwand’a Nzambi eto.
12 Mambu mawonso mansongi kwa mono, kansi ke mawonso ko mena mfunu. Mawonso mansongi kwa mono, kansi mono kibeni kiyambula ko vo yabundunwa kwa konso lekwa.
13 O madia mena mu kuma kia vumu, e vumu mu kuma kia madia; kansi o Nzambi okitula yo se mpavala. E nitu ke ina mu diambu dia zumba* ko, kansi mu diambu dia Mfumu kaka, o Mfumu mu diambu dia nitu.
14 Kansi o Nzambi wafula o Mfumu, ye muna nkum’andi okutufula mpe muna mafwa.
15 Nga ke nuzeye wo ko vo e nitu zeno i yîkwa ya Kristu e? Ozevo, nga ndenda bonga yîkwa ya Kristu yalamika yo muna nkembi e? Ke wau ko!
16 Nga ke nuzeye wo ko vo konso ona olamini nkembi bekituka se nitu mosi e? Kadi o Nzambi ovovele vo, “yau wole bekala se nitu mosi.”
17 Kansi konso ona olaminini Mfumu una yo nyindu mosi yo yandi.
18 Nutina e zumba.* Konso sumu kasumukini o muntu, ke dina muna nitu andi ko, kansi konso ona otele zumba, nitu andi kasumukini.
19 Nga ke nuzeye wo ko vo e nitu zeno i tempelo a mwand’avelela una nutambwidi kwa Nzambi e? Oyeno mpe ke nuyivuidi ko,
20 kadi mu ntalu nwasumbilwa. Dianu vo, nukembelela Nzambi muna nitu zeno.
Mvovo vana yand'a lukaya
^ Tala Nsas’a Mvovo, “Zumba.”
^ Muna Kingerekia, por·neiʹa. Tala Nsas’a Mvovo.
^ Muna Kingerekia, por·neiʹa. Tala Nsas’a Mvovo.
