1 Korinto 7:1-40
7 Muna kuma kia dina nwasoneka, diambote vo yakala kalembi viakana* nkento;
2 kansi, muna kuma kia zumba* iwokele, konso yakala yambula kakala yo nkento andi ye konso nkento mpe yambula kakala yo yakala diandi.
3 O yakala yambula kalungisa e nsatu* za nkento, o nkento mpe yambula kavanga diau adimosi kwa yakala diandi.
4 O nkento kena ye wisa muna nitu andi ko, yakala diandi kaka; diau adimosi, o yakala mpe kena ye wisa muna nitu andi ko, nkento andi kaka.
5 Ke nuyimina muntu yo nkw’andi ko, nanga mu kolo kiakete kaka kina nuwizanene, kimana nwayivana muna sambu. I bosi nukala diaka, kimana nwalembi vukumunwa kwa Satana mu kuma kia kondwa kwa volo.
6 Nulenda vanga dina mpovele, kansi ke nsiku ko.
7 Yadi zola vo wantu awonso bakala nze mono. Kansi konso muntu una yo lukau lwandi kavewa kwa Nzambi, omosi owu, wankaka una.
8 Owau mpovele kwa mpumpa ye akento bafwilwa akala, diambote kwa yau avo bekala kaka nze mono.
9 Kansi avo ke bena ye volo ko, yambula basompa, kadi o sompa kusundidi o wete ke mu lakukw’o moyo ko.
10 Vo i awana basompa ibakanikini, kansi ke mono ko, Mfumu kaka, o nkento kafwete vambana yo yakala diandi ko.
11 Kansi avo ovambanene, yambula kakala kaka mpumpa avo ke wau ko kavutulwisa e ngwizani yo yakala diandi; o yakala kafwete yambula nkento andi ko.
12 Kansi kuna kw’akaka, mono mpovele, ke Mfumu ko: Avo mpangi una yo nkento wa mundembi-kwikila, o nkento mpe otondele kala yandi, o mpangi kafwete yambula nkento andi ko;
13 avo nkento mpe una ye yakala dia mundembi-kwikila, o yakala mpe otondele kala yandi, o nkento kafwete yambula yakala diandi ko.
14 Kadi yakala dia mundembi-kwikila ovaulwilu muna nkento andi, o nkento wa mundembi-kwikila ovaulwilu muna mpangi eto; avo ke wau ko, o wan’eno nga bafunzuka, kansi owau bavelela.
15 Kansi, avo mundembi-kwikila ozolele vambuka, yambula kavambuka; o mpangi yovo nsanga eto kakangama ko muna diambu diadi, kadi Nzambi mu luvuvamu kanubokelela.
16 E nkento, nani ozeye kana vo kuvuluza yakala diaku ko? Yovo, e yakala, nani ozeye kana vo kuvuluza nkento aku ko?
17 Kansi, wauna o Yave kavanina konso muntu ye kiandi kunku, yambula konso muntu kakangalela una o Nzambi kambokelela. O nkanikinu wau kwa nkutakani zawonso mpene wo.
18 Nga vena yo muntu wabokelwa wau kakala wazengwa? Kakituki mundembi-zengwa ko. Nga vena yo muntu wabokelwa wau kakala mundembi-zengwa? Yambula kalembi zengwa.
19 O zengwa ke kwina mfunu ko, olembi zengwa mpe ke kwina mfunu ko; edi dina o mfunu i lunda e nkanikinu mia Nzambi.
20 Konso muntu yambula kakala kaka wauna kakala vava kabokelelwa.
21 Nga ntaudi wakala vava wabokelwa? Kutokanena dio ko; kansi avo luvevoko ozolele, vanga wo.
22 Konso ona wabokelwa muna Mfumu, wau kakala se ntaudi, i mvevoki a Mfumu; diau adimosi mpe kwa konso ona wabokelwa wau kakala muntu wavevoka, i ntaudi a Kristu.
23 Oyeno mu ntalu nwasumbilwa; ke nukadi diaka ntaudi za wantu ko.
24 Ampangi, konso muntu yambula kakala kaka wauna kakala vava kabokelwa vana ndose a Nzambi.
25 Muna diambu dia mienze, kina ye nkanikinu a Mfumu ko, kansi ngindu zame kaka nsongele wau yafwilw’e nkenda kwa Mfumu kimana yakala ye kwikizi.
26 Edi ngindwidi vo mu kuma kia mpasi za tandu kiaki, diambote kwa yakala kakala kaka una kena.
27 Avo wakangama muna nkento, kuvavi kutuluka ko. Avo wakutuluka muna nkaz’aku, kuvavi nkento ko.
28 Kansi avo osompele, kusumukini ko. Avo mwenze osompele, kasumukini ko. Kansi awana bevanga wo mpasi bemona muna nitu. Omono kizolele ko vo nwamon’e mpasi zazi.
29 Ampangi, edi inusamunwini vo, e kolo kisidi kiankufi. Tuka owau, awana basompa yambula bakala nze ke basompa ko,
30 awana bedilanga bakala nze awana ke bedilanga ko, awana bena mu kiese bakala nze awana ke bena mu kiese ko, awana besumbanga bakala nze awana ke bena ye lekwa ko,
31 awana besadilanga e nza bakala nze awana ke besadilanga yo mvimba ko; kadi e mpw’a nza yayi mu soba ina.
32 Dianu, nzolele vo nwalembi tokana. O yakala una vo mpumpa otokanenanga oma ma Mfumu, i sia vo, una kalenda yangidikila Mfumu.
33 Kansi o yakala wasompa otokanenanga oma ma nza, i sia vo, una kalenda yangidikila nkaz’andi,
34 dianu vo e ngindu zandi zavambana. O nkento una vo mpumpa ye ndumb’a mwenze, otokanenanga oma ma Mfumu, kimana e nitu andi ye ngindu* zandi zakala zavelela. Kansi o nkento wasompwa otokanenanga oma ma nza, i sia vo, una kalenda yangidikila o nkaz’andi.
35 Omono inuvovese ediadi muna wete dia yeno kibeni, ke mu kunusima ko,* kansi nwavanga kaka edi diansongi, nwasadila mvimba o Mfumu lembi fwa diya.
36 Kansi avo muntu obenze vo ovanganga owu walembi songa muna kimpumpa,* avo wakola kwandi, ozevo owu difwete vangamena: Yambula kavanga dina kazolele; kasumukini ko. Yambula basompa.
37 Kansi avo muntu osikidisi dio muna ntim’andi, ye kavuidi dio mfunu ko, una ye wisa muna luzolo lwandi yo baka nzengo muna ntim’andi za lembi sompa,* diambote kevanga.
38 Konso ona osompele,* diambote kavangidi, kansi ona olembi sompa olutidi vanga diambote.
39 O nkento wakangama yo yakala diandi ekolo kena moyo. Kansi avo yakala diandi ofwidi, o nkento ovevokele kasompwa kwandi kwa konso ona kazolele, kansi muna Mfumu kaka.
40 Kansi muna ngindu zame, kiese kiayingi kekala kiau avo okala kaka una kena; edi mbenze vo omono mpe mwand’a Nzambi ngina wau.
Mvovo vana yand'a lukaya
^ I sia vo, kalembi vukana yo.
^ Muna Kingerekia, por·neiʹa. Tala Nsas’a Mvovo.
^ I sia vo, vukana.
^ Sina, “mwanda.”
^ Sina, “ke mu kunuleka ntambu ko.”
^ Yovo “muna kimwenze kiandi.”
^ Yovo “tatidila kimwenze kiandi.”
^ Yovo “ovene kimwenze kiandi muna longo.”
