1 Korinto 9:1-27
9 Nga ki mvevoki ko e? Nga ki ntumwa ko e? Nga kiamona Yesu wa Mfumu eto ko e? Nga oyeno ke nu salu kiame ko muna Mfumu e?
2 Avo ki ntumwa ko kuna kw’akaka, kuna kwa yeno i ntumwa kikilu! Kadi oyeno i dimbu kia kintumwa kiame muna Mfumu.
3 E mvutu zame kuna kw’awana bekumfundisanga i zazi:
4 Nga oyeto ke tuna yo nswa* wa dia yo nua ko e?
5 Nga oyeto ke tuna yo nswa ko wakangala yo nkento* wa munkwikizi nze ntumwa zankaka ye aleke a Mfumu yo Kefa?*
6 Nga mono kaka yo Banaba ke twina yo nswa ko wa yambula sala muna kuyidikila e?
7 Nani osalanga e salu kia kikesa muna nzimbu za yandi kibeni? Nani okuna mpatu a vinyu yo lembi dia bundu yandi? Yovo nani ovungulanga e kambi dia mameme yo lembi nua kimvumina kiau?
8 Nga mu ngindu zame mpovele mambu mama e? Yovo, o Nsiku mpe ke mambu mama ko uvovele?
9 Kadi muna Nsiku a Mose mwasonama vo: “Kukaki nu’a ngombe ko ekolo ibundanga masa.” Nga o Nzambi ngombe ketokanenanga?
10 Yovo muna wete dieto kavovele wo e? Kieleka, muna wete dieto diasonamena, e kuma kadi ndiona ovatanga ye ndiona obundanga masa, besalanga ye vuvu kia tambula kunku kiau.
11 Avo tukunini mambu ma mwanda vovo nwina, nga diambi avo tutambwidi lusadisu lweno muna kinsuni e?
12 Avo akaka bena yo nswa* wa tambula lusadisu kwa yeno, nga ke yeto ko tulutidi vua o mfunu wa lusadisu e? Kansi, ke tusadilanga nswa wau ko, tuzizidilanga mambu mawonso, kimana twalembi kakidila e nsangu zambote mu kuma kia Kristu.
13 Nga ke nuzeye wo ko vo awana besalanga salu kiavauka, lekwa ya tempelo bedianga? Awana besadilanga mpe vana ziku, nga ke vana ziku ko betambulwilanga kunku kiau e?
14 Kiaki i kuma o Mfumu kakanikina awana besamunanga nsangu zambote bazingila mpe muna nsangu zambote.
15 Kansi, omama kisidi mo sadila nkutu ko. Kisonekene mo ko kimana yavangilwa mo, kadi diambote yafwa kwame—ke mu yambula muntu ko kakitula lusanu lwame se lwankatu!
16 Avo nsamwini e nsangu zambote, ke kuma kia kuyisana ko, kadi i salu kiokio yayekekwa. Kadi tâtu kwa mono avo kisamwini e nsangu zambote ko!
17 Avo mu luzolo lwame nsadidi e salu kiaki, nsendo itambula; kansi kana nkutu kisadidi kio mu luzolo lwame ko, yakinu kaka ye uselo una yayekekwa.
18 Ozevo, o nsendo ame nki? Vava isamunanga e nsangu zambote, ngovo isamunanga zo, kimana yalembi sadila mu mpila yambi e wisa* kiame muna nsangu zambote.
19 Kana una vo mvevokele muna wantu awonso, mono kibeni ikikitwidi se mbundu kw’awonso, kimana yabaka wantu ayingi.
20 Kuna kwa Ayuda nkitukidi nze Nyuda, kimana yabaka Ayuda; kuna kw’awana bena kunsi a nsiku, nkitukidi nze mono ngina kunsi a nsiku, kana una vo mono kibeni kina kunsi a nsiku ko, kimana yabaka awana bena kunsi a nsiku.
21 Kuna kwa minkondwa nsiku, nkitukidi nze munkondwa nsiku, kana una vo kikondelo nsiku ko vana ndose a Nzambi, kansi kunsi a nsiku a Kristu ngina, kimana yabaka minkondwa nsiku.
22 Kuna kwa atovoki, nkitukidi nze ntovoki kimana yabaka atovoki. Muna mawonso nkitukidi nze wantu a mpila zawonso kimana yavuluza akaka avo dilendakana.
23 Mvanganga mawonso mu kuma kia nsangu zambote, kimana yasamuna zo kw’akaka.
24 Nga ke nuzeye wo ko vo awana belundumukanga muna nsaka za ntinu, awonso belundumukanga, kansi mosi kaka otambulanga nsendo? Nulundumuka mu mpila ina nufwete wo bakila.
25 Awonso ana bekalanga muna nsaka, volo besonganga muna mambu mawonso. Kanele vo bevanganga wo muna tambula kolowa iwola, kansi oyeto ina ilembi wola.
26 Dianu vo, kilundumukanga nkatu-nkatu ko; kiwandanga nkome nkatu-nkatu ko nze muntu owanda tembwa;
27 kansi iwandanga e nitu ame yo bunduna yo, kimana wau ntelekele kw’akaka, omono kibeni yalembi vidisa e dienga dia Nzambi.
Mvovo vana yand'a lukaya
^ Sina, “wisa.”
^ Yovo “sompa nsanga.”
^ Oyikilwanga mpe vo Petelo.
^ Sina, “wisa.”
^ Yovo “nswa.”
