1 Tesalonika 1:1-10
1 Paulu, Silwano* yo Timoteo, kuna kwa nkutakani ya esi Tesalonika muna Nzambi wa Se yo Mfumu Yesu Kristu:
Nsambu koko lwina ye luvuvamu.
2 Ntangwa zawonso tuvutulanga matondo kwa Nzambi vava tuyikanga yeno awonso muna sambu yeto,
3 kadi tusungamenanga salu kieno kia lukwikilu, mfuntu eno a zola yo luzindalalu lweno mu kuma kia vuvu kieno muna Mfumu eto Yesu Kristu vana ndose a Nzambi eto yo Se.
4 Ampangi azolwa kuna kwa Nzambi, tuzeye wo vo yandi unusolele,
5 kadi e nsangu zambote zina twasamuna ke zaluaka kwa yeno muna mvovo kaka ko, kansi muna nkuma yo mwand’avelela yo lusikidisu lwayingi, wauna nuzeye e mpila wantu twakala vovo nwina muna diambu dieno.
6 Nwakituka se atanginini eto yo Mfumu, wau nwatambulwila e diambu dia Nzambi muna mpasi zayingi ye kiese kia mwand’avelela,
7 dianu nukitukidi se mbandu kuna kwa minkwikizi miawonso muna Makedonia ye muna Akaya.
8 Kadi muna yeno, wantu awonso muna Makedonia ye Akaya bawidi e diambu dia Yave, e nsangu za lukwikilu lweno muna Nzambi zilueke mwawonso, ke dina mfunu ko twavova diaka diambu.
9 Kadi yau kibeni besamunanga e nsangu za ndwaka twaluaka vovo lwina muna nkumbu antete ye ngiambula nwayambula e teke yo viluka kwa Nzambi, nwasadila Nzambi amoyo ye ludi,
10 yo vingila Mwan’andi otuka kuna zulu, ona kafula muna mafwa, Yesu, ona okutuvuluza muna makasi mekwiza.
Mvovo vana yand'a lukaya
^ Oyikilwanga mpe vo Sila.
