1 Tesalonika 2:1-20
2 Ampangi, yeno kibeni nutomene wo zaya vo e nkingul’eto vovo lwina ke yakala yankatu ko.
2 Kana una vo twateka mona e mpasi yo tiangunwa kuna Filipi wauna nuzeye, twakala yo unkabu muna Nzambi eto wakunusamunwina e nsangu zambote za Nzambi muna lubangamu lwayingi.
3 Kadi owondelela twanuwondelela ke mpilakanu ko yovo usafu, ngatu umpuki,
4 kansi wauna twatondelwa kwa Nzambi yo vewa kiyekwa kia nsangu zambote, i una tuvovelanga, ke mu yangidika wantu ko, kansi Nzambi kaka ona ofimpanga e ntima mieto.
5 Kieleka, ke twavava kunuleba mu mvovo ko yovo sadila umpuki ye loko; o Nzambi i mbangi!
6 Ke twavavanga nkembo kwa wantu ko, kana nkutu kwa yeno yovo kw’akaka, kadi zitu diampwena twadi kala kwa yeno wau vo tu ntumwa za Kristu.
7 Kansi, twayisakidika vovo nwina, nze ngudi oyemekanga yo wonzakana wan’andi kuna zola kwawonso.
8 Wau vo twatoma kunuzola, ke twakala kaka ye kani dia kunusamunwina e nsangu zambote za Nzambi ko, kansi twayekola mpe mioyo mieto, kadi nwatoma zolakana kwa yeto.
9 Kieleka, ampangi nusungamene e salu kieto ye mfuntuk’eto. Muna lembi kala se zitu diampwena kwa yeno, twasalanga yo fuku yo mwini vava twanusamunwinanga e nsangu zambote za Nzambi.
10 Oyeno nu mbangi yo Nzambi mpe, kadi nwamona una twakadila ye kwikizi, unsongi yo kondwa tumbu kwa yeno minkwikizi.
11 Nutomene wo zaya vo twanuwondelelanga, yo kunufiaulwisa yo sila umbangi kwa konso muntu vovo nwina, nze una o se kevanganga kwa wan’andi,
12 kimana nwakangala e nkangala ifwene kuna kwa Nzambi ona okunubokelanga muna Kintinu kiandi yo nkembo andi.
13 E kiaki i kuma tuvutulwilanga mpe matondo kwa Nzambi, kadi vava nwatambula diambu dia Nzambi, dina nwawá kwa yeto, ke nwatambula dio nze diambu dia wantu ko, kansi wauna dina kieleka, diambu dia Nzambi kaka, dina disalanga omo yeno minkwikizi.
14 Kadi oyeno ampangi, nukitukidi se atanginini a nkutakani za Nzambi muna Kristu Yesu zina muna Yuda, kadi numweswang’e mpasi kwa esi kanda dieno, wauna oyau mpe bemweswanga e mpasi kwa Ayuda,
15 ana bavonda Mfumu Yesu ye angunza yo kutubangika. Ke beyangidikanga Nzambi ko, kadi batelamène wete dia wantu awonso,
16 bevavanga kutusima twalembi vova kwa esi zula* kimana bavuluzwa. Muna vanga wo, besakisanga o masumu mau. Kansi kuna mfoko, o makasi mandi mekubaluakila.
17 Kansi ampangi, vava twavambana yeno mu kolo kiakete, (muna kinitu, ke mu ntima mieto ko), mu kuma kia tima diayingi twakala diau, twavanga wawonso kimana twamonana yeno diaka.*
18 I kuma twazola kwizila koko lwina, elo, omono Paulu, yavava kwiza ke nkumbu mosi kaka ko, kansi nkumbu miole; kansi o Satana watukanga e nzila.
19 Akieyi i vuvu kieto yovo kiese yovo kolow’a lusanu vana ndose a Mfumu eto Yesu muna ngiz’andi? Nga ke yeno ko e?
20 Kieleka, oyeno i nkembo eto ye kiese kieto.
