1 Tesalonika 3:1-13
3 Dianu vo, una ke twalenda diaka zizidila ko e mpambana twavambana, twayindula vo diambote twakala yeto kaka kuna Atenai;
2 twatuma Timoteo wa mpangi eto ye selo kia Nzambi* muna nsangu zambote za Kristu, kanusikidisa* yo kunufiaulwisa muna lukwikilu,
3 kimana valembi kala muntu ovutuka manima* muna mpasi zazi. Kadi yeno kibeni nuzeye wo vo ke tulendi venga e mpasi zazi ko.*
4 Kadi vava twakala yeno, twateka kunuzayisa vo mpasi tumona, i diau mpe divangamene, wauna nuzeye.
5 Muna kuma kiaki, wau kialenda diaka zizidila ko e mpambana twavambana, yantuma kimana yazaya owu wina lukwikilu lweno, dikwa kala vo o Mvukumuni wanuvukumuna, e salu kieto kiakituka se kiankatu.
6 Kansi Timoteo wau katukidi kwa yeno, utuzayisi e nsangu zambote za lukwikilu yo zola kweno, ntangwa zawonso nukutuyindulanga ye kiese kiawonso, nuna ye tima dia kutumona wauna oyeto mpe twinina ye tima dia kunumona.
7 Dianu vo, ampangi, muna nkondwa ye mpasi zeto zawonso, nukutufiaulwisanga muna lukwikilu nusonganga.
8 Owau tukumamene diaka* wau nusikidi muna Mfumu.
9 Aweyi tulenda vutulwila matondo kwa Nzambi muna diambu dieno, muna kiese kiayingi tukunumwenanga vana ndose a Nzambi eto?
10 Fuku yo mwini tudodokelanga kikilu kimana twamonana yeno* yo kudikila dina dikondelo muna lukwikilu lweno.
11 Yambula Nzambi wa Se dieto yo Mfumu eto Yesu batuziulwila e nzila kimana twiza kwa yeno.
12 Vana ntandu, yambula Mfumu kanukudikila, elo, kanuwokesela o zola muna muntu yo nkw’andi ye kw’awonso, wauna oyeto tukunuzolelanga,
13 kimana kasikidisa ntima mieno, nwakondwa e tumbu yo kala wavelela vana ndose a Nzambi wa Se muna ngiz’a Mfumu eto Yesu ye aveledi andi awonso.
Mvovo vana yand'a lukaya
^ Dilenda kala vo, “osalanga kumosi yo Nzambi.”
^ Yovo “kanukumika.”
^ Sina, “nikunwa.”
^ Yovo “i zau twasolelwa.”
^ Sina, “tuna moyo.”
^ Sina, “ndose zeno.”
