1 Tesalonika 4:1-18
4 Vo i mankaka ampangi, wauna nwatambula kwa yeto o nkanikinu wa nkangala ina nufwete kangala muna yangidika Nzambi, wauna nukangalelanga, tunuwondelele yo kunudodokela muna Mfumu Yesu vo nuwokesa wo vanga.
2 Kadi nuzeye nkanikinu mina twanuvana muna Mfumu Yesu.
3 Kadi i luzolo lwa Nzambi lulu, nwakala nwavelela, nwayikenga ye zumba.*
4 Konso muntu vovo nwina kafwete zaya una kalenda kadila ye volo muna nitu* andi muna velela yo zitu,
5 ke mu zinu diasaka dia vukana ko nze esi zula* ana ke bazeye Nzambi ko.
6 Ke vakadi muntu ko oviokesa e tezo muna diambu diadi yo kota mpangi andi nsoki, kadi Yave olanda e kunda muna mambu mama mawonso, nze una twateka kunusamunwina yo kunulukisa kikilu.
7 Kadi o Nzambi katubokela muna usafu ko, kansi muna velela kaka.
8 Dianu vo, ndiona obembwele diambu diadi, kabembwele muntu ko, kansi Nzambi ona unuvene mwand’andi avelela.
9 Vo i diambu dia zola vana vena ampangi, ke dina mfunu ko twanusonekena, kadi yeno kibeni nwalongwa kwa Nzambi vo nwazolaziananga.
10 I wau nuvanganga kwa mpangi zawonso bena omo Makedonia yawonso. Kansi tunukasakese ampangi, nwawokesa wo vanga.
11 Nuvanga mawonso nwakadila kuna luvuvamu, nusianga e sungididi muna mambu ma yeno kibeni yo sala muna moko meno wauna twanukanikina,
12 kimana nwakangala e nkangal’ansongi vana vena awana bena kuna mbazi, ke nukondwa má ko.
13 Kansi ampangi, ke tuzolele ko vo nwalembi zaya e diambu dia awana balele muna lufwa, kimana nwalembi mona e ntantu zina bemonanga awana ke bena ye vuvu ko.
14 Kadi avo tukwikilanga vo Yesu wafwa yo fuluka, o Nzambi mpe muna Yesu ofula awana balele muna lufwa.
15 Kadi edi tunusamunwini muna diambu dia Yave, ankaka muna yeto ana bekala o moyo muna ngiz’a Mfumu ke bevita awana balele muna lufwa ko;
16 e kuma kadi o Mfumu yandi kibeni okulumuka tuka kuna zulu, ye mbok’a lutumu ye nding’a mbasi ambuta ye mpungi a Nzambi, awana bafwa muna Kristu yau beteka fuluka.
17 I bosi, oyeto tuzinganga owau, tusala yo moyo, tuzavunwa kumosi yo yau muna matuti kimana twawanana yo Mfumu muna ngambwila; muna mpila yayi i tukadila kumosi yo Mfumu ntangwa zawonso.
18 Dianu vo, nufiauziananga muna mambu mama.
Mvovo vana yand'a lukaya
^ Muna Kingerekia, por·neiʹa. Tala Nsas’a Mvovo.
^ Sina, “kinzu.”
^ Awana bena vo ke Ayuda ko.
