1 Tesalonika 5:1-28
5 Vo i diambu dia kolo ye nsungi, ampangi, ke dina mfunu ko muna kunusonekena.
2 Kadi yeno kibeni nutomene wo zaya vo e lumbu kia Yave kikwiza nze mwivi muna fuku.
3 Una se bevovanga vo, “Luvuvamu ye ngemba!” ozevo, o lubukumuku lukubaluakila kuna kinsalukisa, nze nsongo mia nkento owuta, ke bekala ye una betinina ko.
4 Vo i yeno ampangi, ke luna mu tombe ko, kimana e lumbu kiakina kia nuluakila nze mwivi,
5 kadi yeno awonso nu wan’a ntemo ye wan’a mwini. Oyeto ke tuvuilu kwa fuku ko ngatu kwa tombe.
6 Dianu vo, ka tuleki ko nze ankaka, kansi tuyingila yo lungalala.
7 Kadi awana belekanga, mu fuku belekanga, awana bekolwanga mu fuku bekolwanga.
8 Vo i yeto tuvuilu kwa mwini, yambula twalungalala yo vuata nkikw’a tulu a lukwikilu yo zola ye mpu a vita ina vo i vuvu kia luvuluku,
9 e kuma kadi, o Nzambi watusola, ke mu makasi ko, kansi muna vua luvuluku muna Mfumu eto Yesu Kristu.
10 Yandi watufwila, kimana kana tusikama yovo leka,* kumosi tukadila yandi o moyo.
11 Dianu vo, nukasakesanga* yo kumika muntu yo nkw’andi, wauna nuvanganga.
12 Tunudodokele ampangi, nwazitisanga awana befuntukanga yo vita o ntu vovo nwina muna salu kia Mfumu yo kunuwondelela;
13 nutoma kubazitisanga kuna zola muna diambu dia salu kiau. Nukadilanga kuna luvuvamu muntu yo nkw’andi.
14 Vana ntandu, tunukasakese ampangi, nulukisa* akolami, nufiaulwisa awana bakendalele, nusadisa ana batovokele, nukala yo luzindalalu kwa wantu awonso.
15 Nutoma tala, valembi kala muntu ovutula mbi muna mbi, kansi nuvavanga edi diambote kwa muntu yo nkw’andi ye kw’awonso.
16 Nuyangalala ntangwa zawonso.
17 Nusamba ntangwa zawonso.
18 Nuvutulanga matondo muna mambu mawonso. I luzolo lwa Nzambi lulu kwa yeno muna Kristu Yesu.
19 Ke nuzimi tiya twa mwanda ko.
20 Ke nuvezi ungunza ko.
21 Nufimpa mambu mawonso; nutatidila oma mambote.
22 Nuyikenga muna bi wa mpila zawonso.
23 Yambula Nzambi a luvuvamu kanuvelelesa emvimba. Ampangi, yambula o mwanda yo moyo ye nitu zeno zalundwa emvimba yo kondwa tumbu muna ngiz’a Mfumu eto Yesu Kristu.
24 Ndiona okunubokelanga nkwa kwikizi, ovanga wo kikilu.
25 Ampangi, nukwamanana kutusambidila.
26 Nuzingula mavimpi kwa mpangi zawonso ye mfibu avelela.
27 Inudodokele muna Mfumu vo nkanda wau watangwa kwa mpangi zawonso.
28 E nsambu za Mfumu eto Yesu Kristu zakala yeno.
