1 Timoteo 6:1-21
6 Awana bakangama muna vangu kia kintaudi, yambula babadikilanga e mfumu zau vo bafwene kikilu o zitu, kimana e nkumbu a Nzambi ye longi diandi dialembi tiangunwa.
2 Vana ntandu, awana bena ye mfumu za minkwikizi ke babavezi ko wau bena vo ampangi. Kansi bafwete luta kubasadila, kadi awana bevua e nluta muna salu kiau kiambote i minkwikizi ye azolwa.
Kwamanana longa mambu mama yo vana luludiku lwalu.
3 Avo vena yo muntu olonganga longi diankaka yo lembi yangalela longi diavimpi,* edi ditukidi kwa Mfumu eto Yesu Kristu, ngatu longi dina ngwizani yo vumi wa Nzambi,
4 ozele yo lulendo yo lembi bakula konso diambu. Wazola tantana yo fila e mpaka mu kuma kia mvovo. O mambu mama i mau metwasanga kimpala, zonza, makumbu,* nyindu ambi,
5 tantanena muna mambu makete ma wantu ana bayiva muna nyindu ye ke bazeye ludi ko, beyindulanga vo o vumi wa Nzambi i ndandu.
6 Kieleka, o vumi wa Nzambi yo yangalela ina una yau i ndandu kikilu.
7 Kadi ke twayiza ye lekwa ko ova nza, ke tulendi vo nata mpe lekwa ko.
8 Dianu vo, wau tuna ye madia ye mvuatu, tuyangalelanga yo.
9 Kansi, awana bazolele kikilu o vuama, muna umpukumuni ye sokolo bekuyisia ye zolela yayingi ya uzowa yo twasa e mpasi, eyi ifilanga wantu muna lufwasu yo lubukumuku.
10 Kadi, o zola nzimbu i tuku dia mambi mawonso, ankaka wau bayima o zola kwaku, bavuidi vengomoka muna lukwikilu, yo kuyisia muna ulolo wa mpasi.
11 Vo i ngeye muntu a Nzambi, tina mambu mama. Tatidila unsongi, vumi wa Nzambi, lukwikilu, zola, luzindalalu yo lulembamu.
12 Nwana ndwana yambote ya lukwikilu; toma simbinin’o moyo a mvu ya mvu una wabokelelwa yo sila umbangi wambote vana ndose a mbangi zayingi.
13 Vana ndose a Nzambi ona otaninanga mioyo mia lekwa yawonso, yo Kristu Yesu ona wasila umbangi wambote vana ndose a Pontio Pilato, ikanikini vo
14 toma lunda nkanikinu kimana wakondwa tona ye tumbu yamuna lusengomoko lwa Mfumu eto Yesu Kristu,
15 luna kesonga muna ntangwa andi, ona wina vo nkwa nsambu, yandi kaka i Nengolo. Yandi i Ntinu wa atinu ye Mfumu a zimfumu,
16 yandi kaka olembi fwa, ona okalanga muna ntemo ulembi finamwa, ona kamoneka kwa muntu ko ngatu lenda kumona. Kuna kwa yandi nkembo ye nkum’a mvu ya mvu. Amen.
17 Ludika* awana bena vo mvuama mu tandu* kiaki balembi kala akwa lulendo, balembi sia e vuvu kiau muna umvuama wavilu-vilu, kansi muna Nzambi kaka ona okutuvananga yawonso tumwenanga o wete.
18 Ubavovesa bavanganga o wete, bavuamina muna mavangu mambote, bakala avani a mvevo, bakayilanga ankaka,
19 bayilundilanga lusâlu, luna vo, nkubilw’ambote mu kuma kia lumbu ikwiza, kimana basimbinin’o moyo wina vo moyo kikilu.
20 E Timoteo, lunda kina wayekekwa, venga moko yakondwa mfunu itiangunanga oma mavelela ye mpaka zina ziyikilwanga vo “zayi” wa luvunu.
21 Ankaka wau bekuyisananga muna zayi wau, bavuidi vengomoka muna lukwikilu.
Yambula e nsambu zakala yaku.
Mvovo vana yand'a lukaya
^ Yovo “diambote; diamfunu.”
^ Yovo “mvovo mia lutiangu.”
^ Yovo “kanikina.”
^ Tala Nsas’a Mvovo.
