1 Yoane 1:1-10
1 Ndiona okalanga tuka kuna lubantiku, ona twawá, ona twamona muna meso meto, ona twatala yo simba muna moko meto, una vo i diambu dia moyo,
2 (elo, o moyo wasengomonwa, tumwene wo, tusilanga wo umbangi yo kunusamunwina o moyo wa mvu ya mvu una wakala yo Se ye wasengomonwa kwa yeto),
3 tukunusamunwinanga una twamona yo wá, kimana nwakala yeto e ntwadi. E kintwadi kieto kiaki i kina vana vena o Se yo Mwan’andi Yesu Kristu.
4 Tunusonekene mambu mama kimana kiese kieto kialunga.
5 E zazi i nsangu twawá kwa yandi, tukunusamunwinanga: O Nzambi i ntemo, muna yandi ke muna nkutu tombe ko.
6 Avo tuvovele vo, “Tuna yandi e ntwadi,” ekolo tukangalelanga muna tombe, luvunu tuvovele, ke tusadilanga ludi ko.
7 Kansi, avo tukangalelanga muna ntemo wauna yandi kibeni Nzambi kenena omu ntemo, tuna e ntwadi muntu yo nkw’andi, o menga ma Yesu wa Mwan’andi mekutuvelelesa muna masumu mawonso.
8 Avo tuvovele vo, “Ke tuna ye sumu ko,” vuna tukuyivunanga, e ludi ke kina omu yeto ko.
9 Avo tufunguna masumu meto, o Nzambi nkwa kwikizi ye nsongi, ololoka masumu meto yo kutuvelelesa muna vilwa wawonso.
10 Avo tuvovele vo, “Ke tusumukanga ko,” tukitwidi Nzambi se nkwa luvunu, e diambu diandi ke dina omu yeto ko.
