1 Yoane 2:1-29
2 E wan’ame anzolwa, inusonekene mambu mama kimana nwalembi sumuka. Kansi, avo muntu osumukini, tuna yo nsadisi* kuna kwa Se, o Yesu Kristu wa muntu ansongi.
2 Yandi i kimenga kia luloloko lwa masumu meto, ke meto kaka ko kansi ma nza yawonso mpe.
3 I wau wuwu tunina ye ziku vo tunzeye, avo tukwamanana lunda nkanikinu miandi.
4 Ndiona ovovele vo, “Mono inzeye,” kansi ke lundanga nkanikinu miandi ko, nkwa luvunu kwandi, e ludi ke kina muna yandi ko.
5 Kansi ndiona olundanga e diambu diandi, o zola kwa Nzambi kuna kieleka muna yandi. Muna diadi tuzeye wo vo tuna yandi e ntwadi.
6 Ndiona ovovele vo una yandi e ntwadi, kafwete mpe kangala wauna muntu ndioyo kakangalela.
7 Azolwa, kinusonekene nkanikinu wampa ko, kansi nkanikinu wankulu una nwatambula tuka kuna lubantiku. O nkanikinu wau wankulu i diambu dina nwawá.
8 Kansi, inusonekene nkanikinu wampa, una vo waludi kuna kwa Yesu ye kuna kwa yeno mpe, e kuma kadi e tombe mu vempoka se kina, o ntemo aludi utemene kala.
9 Ndiona ovovele vo mu ntemo kena, kansi mpangi andi kemenganga, wakinu mu tombe.
10 Ndiona ozolele mpangi andi mu ntemo kena, muna yandi ke mwina sakuba ko.
11 Kansi ndiona omengene mpangi andi mu tombe kena, mu tombe mpe kekangalelanga, kuna kekwendanga kazeye ko ko, kadi e tombe kifukidi meso mandi.
12 Inusonekène, e wan’ame anzolwa, kadi masumu meno malolokelo muna diambu dia nkumbu andi.
13 Inusonekène, yeno mase, kadi nunzeye ndiona okalanga tuka kuna lubantiku. Inusonekène, yeno matoko, kadi nusundidi ndiona wambi. Inusonekène, yeno yingiana-ngiana, e kuma kadi nuzeye o Se.
14 Inusonekène, yeno mase, kadi nunzeye ndiona okalanga tuka kuna lubantiku. Inusonekène, yeno matoko, kadi luna ye ngolo, e diambu dia Nzambi dina omo yeno, nusundidi ndiona wambi.
15 Ke nuzodi nza ko ngatu lekwa ina omu nza. Avo muntu ozolele nza, o zola kwa Se ke kwina mu yandi ko;
16 kadi yawonso ina omu nza—zolela ya nitu, zolela ya meso ye lusanu mu kuma kia mavua*—ke itukidi kwa Se ko, kansi mu nza itukidi.
17 E nza mu vioka yina ye zolela yandi mpe, kansi ndiona ovanganga luzolo lwa Nzambi, zinga kaka kezinga yakwele mvu.
18 E wan’ame, eyayi i ntangw’a mbaninu, wauna nwawá vo antikristu okwiza, kana nkutu owau antikristu ayingi bamonekene kala, muna yau i tuzayidi wo vo eyayi i ntangw’a mbaninu.
19 Mu yeto batuka, kansi ke bakala akw’eto ko; kadi kele vo bakala akw’eto, badi kala yeto yamu wau. Kansi bakatuka kimana diazayakana vo ke awonso ko i akw’eto.
20 Oyeno nwakuswa kwa ndiona wavauka, yeno awonso luna yo zayi.
21 Inusonekene, ke mu kuma kia sia ko vo ke nuzeye ludi ko, kansi mu kuma kia sia vo nuzeye kio, kadi ke vena luvunu ko lwatuka muna ludi.
22 Nani i nkwa luvunu, nga ke ndiona ko ovakulanga nkalu vo Yesu ke Kristu ko e? Yandi i antikristu, ndiona ovakulwilanga o Se yo Mwana o nkalu.
23 Konso ona ovakulanga Mwana o nkalu kena nkutu yo Se ko. Kansi konso ona otambulwilang’o Mwana, wina mpe yo Se.
24 Vo i yeno, mana nwawá tuka kuna lubantiku mafwete kala omo yeno. Avo mana nwawá tuka kuna lubantiku mekalanga omo yeno, nukala e ntwadi yo Mwana yo Se mpe.
25 O wau i nsilu katusila yandi kibeni—moyo a mvu ya mvu.
26 Inusonekène mambu mama mu kuma ki’awana bazolele kunuvukumuna.
27 Vo i yeno, e nkuswa ina nwatambula kwa yandi, ina kaka omo yeno, ke nuvuidi mfunu walongwa kwa muntu ankaka ko; kadi e nkuswa ina nwatambula kwa yandi ikunulonganga mambu mawonso, kadi yaludi ke yaluvunu ko. Nze una ikunulonganga, nukalanga e ntwadi yo yandi.
28 Dianu vo, e wan’ame anzolwa, nukala yandi e ntwadi kimana vava kesengomonwa, twakala yo unkabu wa vova yo lembi kumvavuka mu kuma kia nsoni muna ngiz’andi.
29 Avo nuzeye wo vo yandi i nsongi, nuzeye wo mpe vo konso ndiona ovanganga oma mansongi kwa yandi kawutwa.
