1 Yoane 3:1-24
3 Ekwe zola kwampwena katusongele o Se, wau tuyikilwanga vo wan’a Nzambi! I wau twina. Kiaki i kuma e nza ke ituzayidi ko, e kuma kadi ke yanzaya ko.
2 Azolwa, owau tu wan’a Nzambi, kansi owu tusinga kala ke wasengomweno ntete ko. Tuzeye wo vo vava kesengomoka tukala nze yandi, e kuma kadi tunkumona una kena.
3 Konso ona wina ye vuvu kiaki muna yandi, okuyivelelesanga wauna oyandi kenena wavelela.
4 Konso ona okuyivananga muna sumu, nsiku kekululanga, e sumu i kulula o nsiku.
5 Nuzeye wo mpe vo oyandi wasengomonwa kimana kakatula masumu meto, muna yandi ke mwina sumu ko.
6 Konso ona okalanga yandi e ntwadi ke kuyivananga muna sumu ko; konso ona okuyivananga muna sumu kamwene ko ngatu kunzaya.
7 E wan’ame anzolwa, ke nuyambula muntu ko kanuvunginika; ndiona okuyivananga muna mambu mansongi i nsongi, wauna oyandi kenena wansongi.
8 Ndiona okuyivananga muna sumu, wa Nkadi ampemba, e kuma kadi Nkadi ampemba osumukanga tuka kuna lubantiku.* E kiaki i kuma o Mwan’a Nzambi kasengomwenwa, kafwasa mavangu ma Nkadi ampemba.
9 Konso ona wawutwa kwa Nzambi ke kuyivananga muna sumu ko, kadi e mbongo* a Nzambi muna yandi ikalanga, kalendi kuyivana muna sumu ko, kadi kwa Nzambi kawutwa.
10 O wan’a Nzambi yo wan’a Nkadi ampemba bazayakene mu diambu edi: Konso ona olembi kuyivananga muna mambu mansongi ke wa Nzambi ko, ngatu ndiona olembi zolanga mpangi andi.
11 Kadi ezazi i nsangu nwawá tuka kuna lubantiku vo, tufwete zolaziananga;
12 ke nze Kaini ko, wina vo wa ndiona wambi, wavonda nleke andi. Ekuma kamvondela? E kuma kadi mavangu mandi mambi, vo i mavangu ma nleke andi mansongi.
13 Ampangi, ke nusiviki ko wau vo e nza inumengene.
14 Tuzeye wo vo tukatukidi muna lufwa twizidi oku moyo, e kuma kadi mpangi zeto tuzolanga. Ndiona okondelo zola, wakinu muna lufwa.
15 Konso ona omenganga mpangi andi, mumponda-muntu, nuzeye wo vo mumponda-muntu kena yo moyo a mvu ya mvu ko.
16 I wau wuwu tuzayidi o zola, oyandi wayekola moyo andi muna wete dieto, oyeto mpe tufwete yekola mioyo mieto muna wete dia mpangi zeto.
17 Konso ndiona una ye mavua ma nza yayi, omwene mpangi andi okondelo, kansi unkangidi o ntima,* aweyi o zola kwa Nzambi kukadila muna yandi?
18 E wan’ame anzolwa, ke tuzodi nzol’a mvovo ko ngatu ya lubini, kansi muna mavangu ye ludi.
19 Muna mpila yayi i tuzayidi wo vo ku sambu dia ludi i twina yo sikidisa* ntima mieto vana kena,
20 muna konso diambu tulenda tumbilwa kwa ntima mieto, kadi Nzambi osundidi ntima mieto, ozeye mambu mawonso.
21 Azolwa, avo ntima mieto ke mikututumbanga ko, tuna yo unkabu wa vova kuna kwa Nzambi;
22 tutambula konso dina tulomba kwa yandi, e kuma kadi nkanikinu miandi tulundanga yo vanga oma mazolakene vana meso mandi.
23 Kieleka, i wau wuwu o nkanikinu andi: twakwikila muna nkumbu a Mwan’andi Yesu Kristu yo zolaziana, wauna katuvanina o nkanikinu.
24 Vana ntandu, ndiona olundanga nkanikinu miandi una ntwadi yo Nzambi, o Nzambi mpe una yandi e ntwadi. Muna mwanda una katuvana i tuzayidi wo vo una yeto e ntwadi.
Mvovo vana yand'a lukaya
^ I sia vo, lubantiku lwa ukolami wandi.
^ I sia vo, mbongo yafwana yima bundu.
^ Yovo “kazolele kumfwila nkenda ko.”
^ Yovo “kwikidisa.”
