1 Yoane 4:1-21
4 Azolwa, ke nukwikila ko muna mvovo miawonso miavumunwinwa,* kansi nutonta mvovo miavumunwinwa *nwazaya kana vo mia Nzambi, kadi ngunza zayingi zaluvunu zivaikidi omu nza.
2 I wau wuwu nuzayila mvovo miavumunwinwa kana vo mia Nzambi: Konso mvovo miavumunwinwa misonganga e ziku vo Yesu Kristu mu nitu kayizila, mia Nzambi.
3 Kansi konso mvovo miavumunwinwa milembi songanga e ziku kia Yesu, ke mia Nzambi ko. Vana ntandu, miami i mvovo miavumunwinwa mia antikristu, mina nwawa vo kwiza mikwiza, owau omu nza se mina.
4 E wan’ame anzolwa, oyeno nu wantu a Nzambi, nubasundidi, e kuma kadi ndiona wina yeno e ntwadi osundidi ke mu ndiona una e ntwadi ye nza ko.
5 Oyau i wantu a nza; kiaki i kuma bevovelanga oma ma nza, e nza mpe ikubawanga.
6 Oyeto tu wantu a Nzambi. Konso ona ozeye Nzambi okutuwanga; konso ona wina vo ke muntu a Nzambi ko ke kutuwanga ko. I wau wuwu tuzayidi e nswaswani muna mvovo miavumunwinwa mialudi ye mvovo miavumunwinwa mialuvunu.
7 Azolwa, yambula twazolananga, kadi o zola kwa Nzambi kwatuka, konso ona ozolanga, kwa Nzambi kawutwa, ozeye mpe Nzambi.
8 Ndiona olembi zolanga kazeye Nzambi ko, kadi o Nzambi i zola.
9 Muna mpila yayi kwasengomokena o zola kwa Nzambi omu yeto, o Nzambi watuma Mwan’andi mosi ova nza kimana twavuila moyo muna yandi.
10 I kwau kuku o zola, ke yeto ko twazola Nzambi, kansi yandi watuzola yo tuma Mwan’andi se kimenga kia luloloko lwa masumu meto.
11 Azolwa, avo i wau o Nzambi katuzolela, ozevo, yeto mpe tufwete zolaziana.
12 Ke vena nkutu muntu ko wamona Nzambi. Avo tuzolaziana, o Nzambi okala kaka omu yeto, o zola kwandi mpe kuwokela omu yeto.
13 I wau wuwu tuzayidi wo vo tuna yandi e ntwadi, oyandi mpe wina yeto e ntwadi, kadi utuvene mwand’andi.
14 Vana ntandu, yeto kibeni twamona yo sia umbangi vo o Se watuma Mwan’andi se Mvuluzi a nza.
15 Konso ona otambulwila vo Yesu i Mwan’a Nzambi, o Nzambi okala yandi e ntwadi, oyandi mpe okala e ntwadi yo Nzambi.
16 Oyeto tuzeye yo kwikila e nzola ina katuzolele o Nzambi.
Nzambi i zola, ndiona una muna zola, una e ntwadi yo Nzambi, o Nzambi mpe una yandi entwadi.
17 I wau wuwu o zola kuwokelele omu yeto, kimana twakala ye unkabu wavova muna lumbu kia mfundisa, kadi wauna oyandi kenena, oyeto mpe i una twinina omu nza yayi.
18 Muna zola ke mwina wonga ko, kansi o zola kwasikila wonga kukatulanga, kadi o wonga sima ukutusimanga. Dianu vo, o nkwa wonga kesikilanga ko muna zola.
19 Oyeto tuzolanga, kadi yandi wateka kutuzola.
20 Avo muntu ovovele vo, “Nzolele Nzambi,” kansi omenganga mpangi andi, nkwa luvunu kwandi. Kadi ndiona olembi zolanga mpangi andi ona kemonanga, kalendi zola Nzambi ko ona kalembele mona.
21 I wau wuwu o nkanikinu katuvana, konso ona ozolele Nzambi, kafwete zola mpe mpangi andi.
