1 Yoane 5:1-21
5 Konso ona okwikilanga vo Yesu i Kristu, kwa Nzambi kawutwa, konso ona ozolanga o Se, ozolanga mpe ndiona wawutwa kwa yandi.
2 Wau tuzolanga Nzambi yo lunda nkanikinu miandi i tuzayidi wo vo wan’a Nzambi tuzolanga.
3 Kadi i yau yiyi e nsas’a nzola muna Nzambi, twalunda nkanikinu miandi; e nkanikinu miandi ke miampasi ko,
4 kadi konso ona* wawutuka kwa Nzambi osundanga e nza. I yau yiyi e nsundidi isundang’e nza, lukwikilu lweto.
5 Nani olenda sunda e nza? Nga ke ndiona ko okwikilanga vo Yesu i Mwan’a Nzambi e?
6 I yandi ndioyo wayizila muna maza yo menga, Yesu Kristu, ke muna maza kaka ko, kansi muna maza yo menga. O mwanda usianga umbangi, kadi o mwanda i ludi.
7 Kadi lelwa tatu isianga umbangi:
8 mwanda, maza yo menga; yau tatu ngwizani ina.
9 Avo tutambulwidi umbangi wa wantu, o umbangi wa Nzambi usundidi. Kadi i wau wuwu o umbangi kasia o Nzambi, umbangi mu kuma kia Mwan’andi.
10 Ndiona okwikilanga muna Mwan’a Nzambi, wina yo umbangi muna yandi kibeni. Ndiona olembele kwikila muna Nzambi, unkitwidi se nkwa luvunu, kadi kakwikidi ko muna umbangi kasia o Nzambi mu kuma kia Mwan’andi.
11 I wau wuwu o umbangi, o Nzambi watuvana moyo a mvu ya mvu, o moyo wau muna Mwan’andi wina.
12 Ndiona wina yo Mwana, wina yo moyo wau; ndiona kena yo Mwan’a Nzambi ko, kena yo moyo wau ko.
13 Inusonekène mambu mama kimana nwazaya wo vo moyo a mvu ya mvu luna wau, oyeno nukwikilanga muna nkumbu a Mwan’a Nzambi.
14 I kiau kiki e ziku* tuna kiau kwa yandi, konso diambu tulombele mun’owu wa luzolo lwandi, okutuwá.
15 Wau tuzeye wo vo okutuwá muna konso diambu tulombele, tuzeye wo mpe vo tutambula mana tulombele, wau vo kwa yandi tulombele mo.
16 Avo muntu omwene mpangi andi osumukini e sumu dina vo ke dia lufwa ko, kalomba, o Nzambi okumvana o moyo. E ndomba yayi y’awana kaka besumukanga e sumu dina vo ke dia lufwa ko. Vena ye sumu dia lufwa. Mu kuma kia sumu diadi, kimvovese ko vo kalomba.
17 O vilwa wawonso i sumu, kansi vena ye sumu dina vo ke dia lufwa ko.
18 Tuzeye wo vo konso ona wawutwa kwa Nzambi ke kuyivananga muna sumu ko, kadi ona wawutwa kwa Nzambi* okunlunga-lunganga, ndiona wambi kalendi kumvanga mbi ko.*
19 Tuzeye wo vo kwa Nzambi tuvuilu, kansi e nza yawonso muna wisa kia ndiona wambi ina.
20 Tuzeye wo mpe vo Mwan’a Nzambi wayiza, watuvana ngangu kimana twavua zayi wa ndiona wa ludi. Muna Mwan’andi Yesu Kristu i twinina e ntwadi ye ndiona wa ludi. I yandi ndioyo i Nzambi aludi ye tuku dia moyo a mvu ya mvu.
21 E wan’ame anzolwa, nuyikenga muna teke.*
Mvovo vana yand'a lukaya
^ Sina, “konso lekwa.”
^ Yovo “vuvu.”
^ I sia vo, Yesu Kristu, wa Mwan’a Nzambi.
^ Yovo “kalendi kunsimba ko.”
^ Yovo “tûmba.”
