2 Korinto 1:1-24
1 Paulu, wa ntumw’a Kristu Yesu muna luzolo lwa Nzambi yo Timoteo wa mpangi eto, kuna kwa nkutakani a Nzambi ina momo Korinto, kumosi y’aveledi awonso bena muna Akaya yawonso:
2 Nsambu kwa yeno yo luvuvamu lutuka kwa Nzambi wa Se dieto yo Mfumu Yesu Kristu.
3 Nkembo kwa Nzambi yo Se dia Mfumu eto Yesu Kristu, Se dia nkenda ye Nzambi a fiauzi wawonso,
4 ona okutufiaulwisanga* muna mpasi zeto zawonso, kimana twalenda fiaulwisa awana bena muna konso mpasi, muna lufiaulwisu tutambulanga kwa Nzambi.
5 Kadi wauna e mpasi zeto muna Kristu ziwokelele, i una mpe uwokelele lufiaulwisu tutambulanga muna Kristu.
6 Avo tumona mpasi i mu kuma kia fiauzi yo luvuluku lweno; avo tufiaulwisu, i mu kuma kia fiauzi kikunusadisanga mu zizidila e mpasi zau zimosi tumonanga mpe oyeto.
7 E vuvu kieto muna yeno kiasikila, kadi tuzeye wo vo, wauna tumwenang’e mpasi kumosi, i tufiaulwisilwa mpe kumosi.
8 Kadi, ampangi ke tuzolele ko vo nwalembi zaya e mpasi twamona muna mvivu a Asia. Twakwamiswa e nkwamiswa iviokele ngolo zeto, ke twakala nkutu ye vuvu ko, musungula muna mioyo mieto.
9 Kansi, twabakula vo tumbu kia lufwa twazengelwa. Ediadi diavangama, kimana twalembi sia vuvu muna yeto kibeni, kansi muna Nzambi ona ofulanga mafwa.
10 Wau katuvuluza muna vonza kiaki kiampwena kia lufwa, okutuvuluza mpe, tuna ye vuvu muna yandi vo okwamanana kutuvuluza.
11 Oyeno mpe nulenda kutusadisa muna ndodokela zeno, kimana wantu ayingi bavutula matondo muna wete dieto, kadi tusongelo dienga muna mvutu za sambu ya wantu ayingi.
12 Kadi tukuyisaninanga muna diambu edi: e ntona zeto zisianga umbangi vo, muna vauka ye ludi kia Nzambi, i tukadilanga ova nza, musungula vovo nwina, ke mu ngangu za wantu a nza ko, kansi muna nsambu za Nzambi kaka.
13 Kadi ke tunusonekene mambu mankaka ko, nanga mana nulenda tanga* kaka yo bakula, ngina ye vuvu vo nukwamanana bakula mambu mama una ufwene,*
14 wauna nubakwidi wo vo oyeto i lusanu lweno, oyeno mpe nukala se lusanu lweto muna lumbu kia Mfumu eto Yesu.
15 Muna vuvu kiaki, yakana vo ngiza ntete kwa yeno, kimana nwamona kiese mu nkumbu yanzole;*
16 kadi yakala ye kani dia kunukingula vava ivioka kuna Makedonia, yanuvutukila diaka tuka kuna Makedonia, i bosi nwansindika kuna Yuda.
17 Vava yakana wo, nga diambu diansaka yabadikila dio e? Yovo, mana yakana, nga mu kinitu yakanina mo, kimana muna mvovo miami mwakala “Elo, elo” i bosi “Ve, ve”?
18 Kansi, Nzambi i nkwa kwikizi, dina tuvovele kwa yeno ke dina “elo” ye “ve” ko.
19 Kadi Yesu Kristu wa Mwan’a Nzambi, ona twasila umbangi vovo nwina, i sia vo, mono yo Silwano* yo Timoteo, ke “elo” ye “ve” ko, muna yandi “elo” kaka.
20 Kadi e nsilu mia Nzambi, kanele vo miayingi, muna yandi i “elo.” Dianu vo, muna yandi i tuvovele “Amen” kuna kwa Nzambi, kadi nkembo andi wizidi kwa yeto.
21 Kansi ndiona wasikidisa vo oyeno yo yeto kwa Kristu tuvuilu i Nzambi, yandi mpe watukusa.
22 Watusia mpe dimbu kiandi yo kutuvana lusikidisu lwa mana mekwiza,* i sia vo, mwanda muna ntima mieto.
23 Owau, ndididi moyo ame ndofi vana ndose a Nzambi vo muna kunutanina i yalembele kwizila koko Korinto.
24 Ke sia ko vo tu mfumu za lukwikilu lweno, kansi tu akw’eno asadi muna kiese kieno, kadi muna lukwikilu lweno i nusikididi.
Mvovo vana yand'a lukaya
^ Yovo “okutukasakesanga.”
^ Dilenda kala vo, “mana nwateka zaya.”
^ Sina, “yakuna nsuka.”
^ Dilenda kala vo, “nwabak’e nluta nkumbu miole.”
^ Oyikilwanga mpe vo Sila.
^ Yovo “mfutu.”
