2 Korinto 10:1-18
10 Omono Paulu, inudodokele muna lulembamu yo walakazi wa Kristu, kana una vo vana ndose eno i ntovoki, kansi avo kina vo ko i nkwa unkabu.
2 Inudodokele wo vo, avo ngizidi vovo nwina kizolele kabuka ko yo baka e nzengo zina nkanini kw’akaka ana bekutubadikilanga vo mu kinitu tukangalelanga.
3 Kadi, kana una vo tukangalela muna kinitu, ke tunwana ndwan’a kinitu ko.
4 Kadi e nwaninwa yeto ke ya kinitu ko, kansi ya nkum’a Nzambi kaka muna bangula matininu mangolo.
5 Tubangwidi makani mambi ye nkaku miawonso misiwanga mu kakidila o zayi wa Nzambi, tubundwini nyindu miawonso kimana miatumamena Kristu;
6 tukubamene mpe mu tumba ukolami wawonso, yavana kilunga o nlemvo weno.
7 Oyeno mpw’a lekwa nutalanga. Avo muntu una ye vuvu vo kwa Kristu kavuilu, yambula kabadika ediadi: Wauna oyandi kavuidilu kwa Kristu, oyeto mpe kwa yandi tuvuilu.
8 Kadi avo ikisanini kwayingi muna wisa kina twavewa kwa Mfumu muna kunukumika ke mu kunubangula ko, kifusuka nsoni ko.
9 Kadi kizolele songa ko vo vumisa ikunuvumisanga muna nkanda miame.
10 Kadi bavovele vo: “E nkanda miandi miazita ye miangolo, kansi avo olueke, e mpw’andi yatovoka, e mpov’andi mpe ke ina mfunu ko.”
11 O muntu ndioyo yambula kazaya vo, konso dina tuvova* muna nkanda avo ke tuna vo ko, i diau mpe tuvanga* avo tuna vo.
12 Ke tuvavanga kuyisia tezo kimosi ko ngatu kuyifwaninika ye ankaka ana bayisongele. Kadi vava bekuyitezanesanga muna yau kibeni yo kuyifwaninika muna yau kibeni, ke bena yo zayi ko.
13 Kansi oyeto ke tukuyisana lusanu luviokele tezo ko. Tukuyisanina kaka muna lunganisa e salu katuvana o Nzambi. E salu kiaki kialuaka mpe kwa yeno.
14 Kadi oyeto ke tunanukinanga kwayingi ko, nze vika sia vo ke twaluaka kwa yeno ko, kadi yeto twateka luaka kwa yeno ye nsangu zambote mu kuma kia Kristu.
15 Ke tukuyisana lusanu luviokele tezo ko, i sia vo, muna salu yangani, kansi tuna ye vuvu vo ekolo lukwikilu lweno luwokelanga, nutoma yangalela e salu kina tusadidi mu zunga kieto. Oyeto mpe tuwokesa diaka e salu,
16 kimana twasamuna e nsangu zambote muna zunga yankaka, twalembi kuyisanina muna zunga kiangani kiasadilwa kala.
17 “Kansi ndiona okuyisana, yambula kayisanina muna Yave.”
18 Kadi Yave ke yangalelanga muntu okuyisananga ko, kansi ndiona kaka kesanisinanga yandi kibeni.
