2 Korinto 11:1-33
11 Nzolele vo nwazizidila muna fi uzowa fiame. Kieleka, oyeno nukunzizidilanga.
2 Kadi nsongo inumwenene, nsongo zina za Nzambi,* e kuma kadi mono kibeni yanuzitikisa kwa yakala dimosi kimana yanusunzula se mienze miavelela kuna kwa Kristu.
3 Kansi, wonga ngina wau, dikwa kala vo, wauna nioka kavunginikina Eva muna umpuki wandi, e ngindu zeno zayiviswa yo vengomoka muna ludi yo velela kuna muna Kristu.
4 Kadi, avo vezidi muntu osamuna Yesu wankaka, ke ndiona twasamuna ko, avo nutambwidi mwanda wankaka, ke una nwatambula ko yovo nsangu zambote zankaka, ke zina nwatambulwila ko, diasazu kwa yeno mu tambulwila mana kavovele.
5 Kadi edi mbwene vo kisundidi keva ko vana vena e mbuta zeno za ntumwa, kana nkutu mu diambu dimosi.
6 Kanele vo ki mpovi ambote ko, kansi kikondelo zayi ko, muna mpila zawonso ye mambu mawonso twatoma kunukiesesela wo.
7 Yovo, nga sumuka yasumuka wau yakisakidika kimana oyeno nwatundidikwa, wau yanusamunwina e nsangu zambote za Nzambi e ngovo e?
8 Nga nkutakani zankaka ya yiya wau yatambula lusadisu lwau kimana yanusadila?
9 Vava yakala vovo nwina yo kondwa má, kiakala se zitu kwa muntu ko, kadi ampangi ana batuka kuna Makedonia batoma lungisa e nsatu zame. Kieleka, kiazola kituka se zitu kwa yeno ko muna mawonso, i wau mpe ikwamanana vanga.
10 Wau vo e ludi kia Kristu kina omu mono, kiyambula kuyisana ko mu kuma kia zunga ya Akaya.
11 Mu nkia kuma? Wau ndembele kunuzola e? Nzambi ozeye wo vo zola ikunuzolanga.
12 Kansi dina ivanganga ikwamanana dio vanga kimana yakakidila awana bazolele* kuyisia mfwanani yo yeto muna mambu* mana bekuyisaninanga.
13 Kadi wantu awaya ntumwa zaluvunu, nsadi mialuvunu, bekuyikitulanga se ntumwa za Kristu.
14 Ediadi ke diasivi ko, kadi Satana yandi kibeni okuyikitulanga se mbasi a ntemo.
15 Dianu vo, ke diasivi ko avo e selo yandi bayikitwidi se selo ya unsongi. Kansi e mbaninu au ikala mun’owu wa mavangu mau.
16 Mpovele wo diaka: Ke vakadi muntu ko oyindula vo mono i zowa. Kansi kana nkutu vo nuyindwidi wo, ozevo nuntambula nze zowa, kimana omono mpe yakisana fiakete.
17 Edi mpovele, kivovele dio mun’owu wa Mfumu ko, kansi sana kaka ikisanini nze zowa dia muntu.
18 Wau vo ayingi bekuyisananga mun’owu wa kinitu,* omono mpe sana ikuyisana.
19 Wau vo nu “akwa ngangu,” kuna kiese kiawonso nuzizidilanga e mazowa.
20 Kieleka, nuzizidila konso ndiona unubundwini, konso ndiona oyiyidi mavua meno, konso ndiona okutumwini kina nuna kiau, konso ndiona okuyitundidika vovo nwina, ye konso ndiona okunuwanda vana luse.
21 Mpovele wo muna luvezo lweto, wau dilenda moneka vo muna lutovoko tusadidi.
Kansi avo ankaka basongele unkabu—mpov’a uzowa mpovele—unkabu mpe nsongele.
22 Nga oyau Ayibere? Yo mono mpe. Nga oyau Aneyisaele? Yo mono mpe. Nga oyau mbongo a Abarayama e? Yo mono mpe.
23 Nga oyau selo ya Kristu e? Mvutwidi nze lau kia muntu, omono nkutu nsundidi: Salu yayingi yasala, pelezo zayingi yakota, ngwanda zayingi yawandwa, nkumbu miayingi yavuluka muna lufwa.
24 Kuna kwa Ayuda nkumbu tanu yazwabulwa nzwabula 49 katula imosi,
25 nkumbu tatu yawandilwa muna lubamba, nkumbu mosi yatubilwa matadi, nkumbu tatu yadimukw’e nzaza, nkumbu mosi yaviokesa fuku yo mwini muna mbu;
26 muna nkangalu miayingi, yabwilwa vonza ya nzadi, vonza ya mivi, vonza kwa nkangu ame, vonza ya zula yankaka, vonza muna mbanza, vonza muna makanga, vonza muna mbu, vonza vana vena mpangi zaluvunu,
27 sala yo funtuka, nkumbu miayingi yalembi leka, yakala mu nzala ye vuina, nkumbu miayingi yakondwa madia, muna kiozi ye kondwa mvuatu.*
28 Vana ntandu a mambu mama, vena ye diambu dikuntokanesanga lumbu yawonso: ntelamw’a moyo mu kuma kia nkutakani zawonso.
29 Nani otovokele, omono yalembi tovoka? Nani otele sakuba, omono yalembi kendalala?
30 Avo nzolele kuyisana, ikuyisanina muna mambu ma lutovoko lwame.
31 O Nzambi ye Se dia Mfumu Yesu, ona okembelwa yakwele mvu, ozeye wo vo kivunini ko.
32 Muna Damaseke, o nguvulu muna lutumu lwa ntinu Areta, wayingilanga e mbanz’a esi Damaseke kimana kambaka,
33 kansi yakulumunwa muna kitunga* vana vundu dia yaka kia mbanza, yavuluzwa vana moko mandi.
Mvovo vana yand'a lukaya
^ Sina, “vema kwa Nzambi.”
^ Yovo “bevavanga kuma kia.”
^ Yovo “kiyekwa kina.”
^ I sia vo, muna kiwuntu.
^ Sina, “nkonga.”
^ Yovo “mbangu.”
