2 Korinto 12:1-21
12 Sana kaka ikuyisana. Kana una vo ke diansongi ko, kansi yambula yavova oma ma mona-meso yo tusengomono twa Mfumu.
2 Nzeye muntu una ntwadi muna Kristu, se vioka mvu 14—kana muna nitu yovo ke mu nitu ko, kizeye kwame ko; Nzambi kaka ozeye—wazavunwa muna zulu diatatu.
3 Elo, nzeye muntu ndioyo—kana muna nitu yovo ke mu nitu ko, kizeye kwame ko; Nzambi kaka ozeye—
4 ndiona wazavunwa muna paradiso yo wá e mvovo ke milendi vovua ko, mina vo ke miavaninwa nswa kwa muntu ko mu vova mio.
5 Ikuyisana muna diambu dia muntu ndioyo, kansi kisinga kuyisana ko, nanga muna lutovoko lwame.
6 Kana nkutu vo nzolele kuyisana, kikala se zowa ko, kadi ludi ivova. Kansi, kizolele wo vanga ko, vekwa kala muntu okumpana zitu lutila una kamwene omu mono yovo dina kawidi kwa mono,
7 wau yatambula tusengomono twatu twanene.
Muna lembi kuyitundidika, yavewa lusende omu nitu, mbasi a Satana okungwandanga kimana yalembi kuyitundidika.
8 Nkumbu tatu yadodokela Mfumu muna diambu diadi, kimana lwakatuka omu mono.
9 Kansi umpovese vo: “E nsambu zame zafwana kwa ngeye, kadi nkum’ame uzikukidi muna lutovoko.” Dianu vo, ikuyisanina kuna kiese muna kuma kia lutovoko lwame, kimana o nkum’a Kristu wakala kaka omu mono nze fukwa.
10 Dianu vo, ngiangalele muna tutovoko, muna tuvezo, muna nkondelo, muna tubangamu, muna mpasi mu kuma kia Kristu. Kadi avo ntovokele, ozevo nkumamene.
11 Nkitukidi se zowa. Yeno nunkitwidi wo, kadi yeno nwadi vova muna wete diame. Kana una vo kina mfunu ko, kisidi songa ko vo mbuta za ntumwa zeno zisundidi, kana nkutu muna diambu dimosi.
12 Kieleka, yeno kibeni nwamona e ziku kia kintumwa muna luzindalalu lwayingi, muna sinsu yo masivi yo mavangu mankuma.
13 Kadi mu diambu dimosi kaka nusundilu kwa nkutakani zankaka, i sia vo mono kibeni kianukudikila zitu ko. Nundoloka muna bi wau.
14 Wau i nkumbu yantatu nkubamene mu kwiza kwa yeno, kansi kikala zitu ko kwa yeno. Kadi kivavanga tambula mavua meno ko, kansi yeno kaka; e kuma kadi, o wana ke yau ko belundilanga mase ye ngudi zau, kansi mase ye ngudi kaka belundilanga wan’au.
15 Kadi kuna diame sambu, nsadila yawonso ngina yau kuna kiese yo funtuka mu kuma kieno.* Avo zola itoma kunuzolanga, oyeno mpe nga ke nutoma kunzola ko e?
16 Kana una vo i wau, kikalanga zitu ko kwa yeno. Kansi, nuvovele vo, “mvunginiki” yakala, “muna ndekwa zambi” yanubakila.
17 Nga nluta yavavanga kwa yeno mun’awana yanutumina?
18 Yadodokela Tito, yatuma mpe mpangi mosi yo yandi. Nga Tito nluta kavava kwa yeno e? Ke mu mwanda umosi ko twakangadil’e? Ke mu ntambi zau zimosi ko twakangadil’e?
19 Nga nubenze vo mu kolo kiaki kiawonso tanina tuvavanga kuyitanina vana ndose eno? Vana ndose a Nzambi tuvovelanga muna Kristu. Azolwa, tuvanganga mawonso mama muna kunukumika.
20 Kadi wonga ngina wau, vava iluaka yalembi kunuwana wauna nzolele, omono mpe yalembi kala wauna nuzolele, kansi vekala ye nzonzi, kimpala, makasi, ntantani, nyidimu, makumbu, kuyitundidika ye mvuanga.
21 Nanga vava ivutuka diaka, o Nzambi ame okumfusulwisa e nsoni vana ndose eno, se yadila mu kuma kia ndonga y’awana bateka sumuka, kansi ke baviluka ntima ko muna usafu wau, zumba* ye mavangu mansoni* mana bavanga.
Mvovo vana yand'a lukaya
^ Yovo “mioyo mieno.”
^ Muna Kingerekia, por·neiʹa. Tala Nsas’a Mvovo.
^ Muna Kingerekia, a·selʹgei·a. Tala Nsas’a Mvovo.
