2 Korinto 13:1-14
13 Wau i nkumbu wantatu nkubamene mu kwiza kwa yeno. “Muna kimbangi* kia wantu wole yovo atatu i mu sikidisilwa mambu mawonso.”
2 Kana una vo kina vo ko, dina nze mono ngina vo muna nkumbu wanzole, ndukisi diaka awana bateka sumuka ye ankaka mpe, avo ngizidi diaka, kikubavukisa ko,
3 wau nuvavanga e ziku kana vo Kristu, ona walembi tovoka kwa yeno, kansi wakumama kaka vovo nwina, omu mono kikilu kevovelanga.
4 Kadi wavondelwa vana nti mu kuma kia lutovoko, kansi muna nkum’a Nzambi una o moyo. Oyeto mpe tutovokele yandi, kansi tukala o moyo yo yandi mu kuma kia nkum’a Nzambi kuna kwa yeno.
5 Nuyitontanga kana vo mu lukwikilu nwina; nuvavanga zaya owu nwina. Nga ke nuzeye wo ko vo Yesu Kristu una yeno entwadi e? Avo ke wau ko, ke nutondakana ko.
6 Ngina kikilu ye vuvu vo nusinga wo zaya vo oyeto twatondakana.
7 Owau tusambidi kwa Nzambi kimana nwalembi vanga diambu diambi, ke mu sia ko vo oyeto twamoneka vo twatondakana, kansi oyeno nwavanga edi diambote, kana nkutu tumonekene vo ke twatondakana ko.
8 Kadi katulendi vanga diambu ko muna telamena e ludi, kansi muna wete dia ludi kaka.
9 Tuyangalalanga avo tutovokele kansi oyeno nukumamene. I diau didi tulombanga muna sambu kimana nwasingama.
10 Ekiaki i kuma nsonekene mambu mama wau kina vo ko, vava ikwiza, yalembi kala nkwa ntim’a mbâdi muna sadila wisa kina yavewa kwa Mfumu muna kumika ke mu bangula ko.
11 Ampangi, muna fokola, nukwamanana yangalala, nusingama, nuyifiaulwisa, nukalanga yo nyindu mosi, nukalanga yo ungudi; o Nzambi a zola yo luvuvamu okala yeno.
12 Nukayisa muntu yo nkw’andi ye mfiba avelela.
13 Aveledi awonso banutumini mavimpi.
14 E nsambu za Mfumu Yesu Kristu yo zola kwa Nzambi yo mwand’avelela una tutambulanga kumosi wakala yo yeno awonso.
Mvovo vana yand'a lukaya
^ Sina, “nua.”
