2 Korinto 2:1-17
2 Ngina ye kani dia kwiza diaka kwa yeno, ke mu kunumwesa ntantu ko.
2 Avo inumwesese ntantu, nani okumbwes’e kiese, avo ke ndiona mbwesese ntantu ko e?
3 Dina mpangidi i diau nsonekene kimana vava nkwiza, yalembi mweswa e ntantu kw’awana bafwete kumbwes’e kiese, kadi ngina ye vuvu vo dina dikuntwasila e kiese, ditwasa mpe kiese kwa yeno awonso.
4 Kadi muna mpasi zayingi yo lukendalalu lwa ntima ye kinsanga kiayingi yanusonekena, ke mu kunumwesa ntantu ko, kansi mu kunusadisa nwazaya wo vo zola kwayingi ngina kwau omu yeno.
5 Avo muntu omwesese ntantu, ke mono ko kamweses’e ntantu, kansi yeno awonso—kizolele viokesa tezo ko muna diambu diadi.
6 E tumbu kina muntu ndioyo kaveno kwa wantu ayingi, kifwene kwa yandi;
7 owau nufwete loloka yo fiaulwisa muntu ndioyo, kimana kalembi sundwa* kwa ulolo wa ntantu.
8 Dianu vo, inukasakese nwasiamisa o zola kweno muna yandi.
9 Kiaki i kuma mpe inusonekene: yazaya kana vo nusonga e ziku kia nlemvo eno muna mambu mawonso.
10 Avo nulolokele muntu muna konso diambu, omono mpe ikunloloka. Konso diambu ndolokele (avo ndolokele konso diambu) i muna wete dieno vana ndose a Kristu,
11 kimana twalembi sundwa kwa Satana, kadi tuzeye makani* mandi.
12 Vava yaluaka kuna Teroa mu samuna nsangu zambote mu kuma kia Kristu, mwelo a salu wanziukila muna Mfumu,
13 yatelamwa o moyo wau yalembi solola Tito wa mpangi ame. Dianu vo, yabakanina yo kwenda kuna Makedonia.
14 Matondo kwa Nzambi, ona okutudiatisanga ntangwa zawonso muna nkembo a nsundidi kumosi yo Kristu, omu yeto kesayanesenanga* e nsunga za zayi wandi muna fulu yawonso!
15 Kadi kuna kwa Nzambi, oyeto tu nsunga zambote za Kristu vana vena awana bena muna nzila luvuluzu ye awana bena muna nzila lufwasu;
16 kuna kw’awaya, nsudi* a lufwa itwasanga lufwa, kuna kw’awana bena muna nzila luvuluzu nsunga za moyo zitwasanga moyo. Nani ofwanukini muna mambu mama?
17 Kadi oyeto ke tutekanga* diambu dia Nzambi ko nze wantu ayingi, kansi wau vo kwa Nzambi twatumwa, i tuvovelanga ye ziku kiawonso vana ndose a Nzambi kumosi yo Kristu.
Mvovo vana yand'a lukaya
^ Yovo “yoyeswa.”
^ Yovo “ntambu.”
^ Yovo “kewisisilanga.”
^ Yovo “nsunga.”
^ Yovo “ke tuvavanga vuila nluta muna.”
