2 Korinto 3:1-18
3 Nga twayantika kuyisunzula diaka kwa yeno e? Yovo, nkanda tuvuidi o mfunu muna kiyisunzula kwa yeno yovo mina mituka kwa yeno nze una uvanganga akaka e?
2 Oyeno i nkand’eto, usonamene muna ntima mieto, uzayakene yo tangwa kwa wantu awonso.
3 Kadi nusongele vo yeno i nkand’a Kristu wasonekwa kwa yeto selo yandi, ke wasonamena mu tinta ko, muna mwand’a Nzambi amoyo kaka, ke mu babu ya matadi ko, kansi muna ntima.
4 Tuna ye vuvu kiaki kuna kwa Nzambi muna Kristu.
5 Ke sia ko vo yeto kibeni tukuyifwanisanga mu sala e salu kiaki, kansi Nzambi kaka okutufwanisanga,
6 watufwanisa mu kala selo ya kangu diampa, ke mu nsiku wasonama ko kansi wa mwanda; kadi o nsiku wasonama tumbu kia lufwa uvananga, kansi una wa mwanda moyo uvananga.
7 Avo Nsiku una wa lufwa, una wasonama muna matadi, muna nkembo wayizila kimana wan’a Isaele balembi tungununa ndose a Mose mu kuma kia nkembo a ndose andi, o nkembo una wasukiswa,
8 nga una wa mwanda ke uvioka nkutu nkembo ko e?
9 Kadi avo Nsiku una wa ngielele wakala yo nkembo, una wa ndungidi uvioka kikilu nkembo.
10 Kieleka, una wakala yo nkembo ke una diaka yo nkembo ko, mu kuma kia nkembo una umviokele.
11 Kadi avo una wasukiswa mu nkembo wayizila, ozevo, o nkembo wa kangu diampa wanene kikilu.
12 Wau vo tuna ye vuvu kiaki, tuvovanga kuna unkabu wawonso,
13 ke tuvanganga ko nze Mose ona wasia e fukwa vana ndose andi kimana wan’a Isaele balembi tungununa o nkembo a Nsiku una wasukiswa.
14 Kansi e ntima miau miabala. Kadi yamu unu kiaki, vava kitangwanga e kangu diankulu e fukwa kiakina kiakinu, e kuma kadi muna Kristu kaka kiakatulwilwa.
15 Yamu unu kiaki, konso ntangwa kitangwanga mana kasoneka Mose, e fukwa kifukanga ntima miau.
16 Kansi avo muntu ovutukidi kwa Yave, e fukwa kikatulwanga.
17 O Yave i Mwanda, vana vena mwand’a Yave, i vena luvevoko.
18 Yeto awonso, wau tumwesanga nkembo a Yave nze pelo ye ndose zalembi fukwa, tukitwilu muna fwaniswa kiau kimosi tuka muna nkembo yamuna nkembo nze una kavanga o Yave una vo Mwanda.*
Mvovo vana yand'a lukaya
^ Dilenda kala vo, “muna mwand’a Yave.”
