2 Korinto 4:1-18
4 Dianu vo, wau tuna yo uselo wau muna nkenda twafwilwa, ke tuvutukidi manima ko.
2 Kansi tuyambwidi mambu mansweki, mansoni, ke tukangalelanga mu umpuki ko ngatu bendomona diambu dia Nzambi; kansi muna sengomona e ludi, tukitukidi se mbandu ambote kwa wantu awonso,* vana ndose a Nzambi.
3 Avo e nsangu zambote tusamunanga zifukilu, zifukilu vana vena awana bena muna nzil’a lufwasu,
4 vana bena o nzambi a tandu* kiaki ovondanga meso ma ntima mia mindembi-kwikila, kimana o ntemo a nsangu zambote za nkembo a Kristu, ona wina vo i fwaniswa kia Nzambi, walembi kubatemena.
5 Kadi ke tusamunanga oma ma yeto kibeni ko, kansi oma ma Yesu Kristu wa Mfumu, oyeto tu ntaudi zeno muna diambu dia Yesu.
6 Kadi Nzambi wavova vo: “Yambula muna tombe mwatemena ntemo,” yandi otemenanga muna ntima mieto kimana twabatemesa yo nkembo a zayi wa Nzambi vana ndose a Kristu.
7 Kansi, oyeto tuna yo lusalu lwalu muna yinzu yatûma, kimana ulolo wa nkuma wakala wa Nzambi, ke wa yeto kibeni ko.
8 Tuniemenenwanga muna mpila zawonso, kansi ke yamu tezo kia lembi nikuka ko; tuyangamene mioyo, kansi ke tudimbwidi vuvu ko;
9 tubangikwanga, kansi Nzambi katuyambwidi ko; tubwiswanga, kansi ke tufwasilu ko.
10 Mwawonso tukwendanga tulwakilwanga e vonza kia lufwa nze Yesu, kimana o moyo a Yesu wasengomokena omu nitu zeto.
11 Kadi oyeto tuna o moyo tuyekolwanga muna lufwa mu diambu dia Yesu kimana o moyo a Yesu wasengomokena omu nitu zeto zamfwe.
12 O lufwa luna omu yeto, kansi moyo omo yeno.
13 Wau tuna yo mwanda wau umosi wa lukwikilu, wauna wasonama vo: “Nkwikidi, i dianu mpovele”; oyeto mpe tukwikidi i dianu tuvovele,
14 tuzeye wo vo Ndiona wafula Yesu okutufula mpe yo Yesu, okutusunzula kumosi yo yeno.
15 Kadi mawonso mama i muna wete dieno, kimana o ulolo wa nsambu za Nzambi zawokela diaka mu kuma kia matondo ma ndonga muna nkembo a Nzambi.
16 Dianu vo, ke tuvutukidi manima ko, kanele vo e kiwuntu kieto kia ku mbazi kikuyifwilanga, e kiwuntu kieto kia kati kivangululwanga lumbu ke lumbu.
17 Kana una vo e mpasi zeto za kolo kiandwelo kaka yo zeza, zikututwasila nsendo ampwena, wa mvu ya mvu;
18 wau tulembele sia meso muna lekwa imonekene, kansi muna ina ilembi moneka kaka. Kadi e lekwa imonekene ya kolo kiandwelo kaka, kansi ina ilembi moneka ya mvu ya mvu.
